Andama ang Inyong Espirituhanong Yuta

Ni Brother Milton Camargo

Unang Magtatambag sa Kinatibuk-ang Kapangulohan sa Sunday School

Ang sambingay sa magpupugas makatabang kanato nga maandam sa atong pagtuon sa Dali, Sunod Kanako sa Bag-ong Tugon niining tuiga.

Usa sa akong paborito nga mga sambingay sa Bag-ong Tugon mao ang sambingay sa magpupugas, ingon nga makita diha sa Mateo 13:3–23 (tan-awa usab sa Marcos 4:3–20; Lucas 8:5–15). Niini nga sambingay, ang mga paagi nga ang mga tawo midawat sa pulong (ang binhi) gitandi ngadto sa lainlaing matang sa yuta. Atong nakat-onan nga ang matag yuta adunay importante nga kinaiya, maayo o dili maayo.

Kanunay natong mabasa kini nga sambingay ug naghunahuna nga kini naghulagway sa kaandam sa mga tawo sa pagdawat ug pagsunod sa ebanghelyo. Samtang tinuod kini, nagtuo ko nga ang sambingay mahimong maghulagway usab sa atong indibidwal nga pag-uswag samtang molambo kita sa hugot nga pagtuo ug sa kahibalo sa ebanghelyo. Sa laing pagkasulti, dili kita kanunayng anaa sa usa ka piho nga matang o lebel sa pagtuo. Kita makahimo, uban sa hugot nga pagtuo ug paningkamot, sa pagpalambo sa atong espirituhanong yuta aron kini mohatag og mas maayo nga bunga.

Ganahan nakong tukion kini nga hunahuna nganha kaninyo tungod kay kini nakatabang kanako nga makasabot niini nga sambingay sa mas halawom nga paagi. Nagtuo ko nga samtang mangandam kita alang sa atong pagtuon sa Dali, Sunod Kanako sa Bag-ong Tugon alang sa umaabot nga tuig, ang pagrebyo sa sambingay sa magpupugas makatabang kanato sa pag-andam sa atong kasingkasing nga makadawat sa kamatuoran sa ebanghelyo.

Pagdawat sa mga Binhi sa Ebanghelyo

Diha sa sambingay, atong nakat-onan nga sa pagsabod sa magpupugas sa mga binhi:

Ang ubang mga binhi nahulog sa agianan, ug gipanuka kini sa mga langgam.
Ang uban nahulog sa yutang batoon. Nanurok kini apan nalawos sa adlaw.
Ang uban nahulog sa mga tunok, ug ang mga tunok milupig niini.
Ang uban nahulog sa maayong yuta ug namunga.

Ang Ginoo mipasabot:

“Kadtong nakadungog sa mensahe mahitungod sa gingharian apan wala makasabot niini adtoon sa Yawa ug sakmiton gikan kaniya ang mga binhi nga napugas diha sa iyang kasingkasing. Sama niini ang binhi nga nahulog didto sa agianan.

“Ang binhi nga nahulog sa yutang batoon sama sa mga tawo nga malipayong midawat sa mensahe sa pagkadungog nila niini;

“Apan wala kini makagamot diha kanila busa dili sila molahutay. Sa pag-abot sa mga kalisdanan ug mga paglutos tungod sa mensahe, mobiya dayon sila.

“Ug ang binhi nga nahulog sa dapit sa mga tunokon nga sagbot sama sa mga tawo nga nakadungog sa mensahe. Apan ang mga kabalaka bahin niining kinabuhia ug ang gugma alang sa mga bahandi mipatigbabaw kay sa mensahe ug dili sila makabunga.

“Ug ang binhi nga napugas didto sa maayong yuta sama sa mga tawo nga nakadungog ug nakasabot sa mensahe. Mamunga silag tag-100, ang uban tag-60 ug ang uban tag-30” (Mateo 13:19–23).

Tan-awon nato ang matag matang sa yuta ug sutaon kon unsay mabuhat aron sa pagpalambo niini.

Mga paghulagway pinaagi ni David Green

Yuta sa Agianan

Si Presidente Dallin H. Oaks, Unang Magtatambag sa Unang Kapangulohan, miingon: “Ang mga binhi nga‘nahulog sa daplin sa dalan’ (Marcos 4:4) wala makaabot sa mortal nga yuta diin kini posible unta nga motubo. Kini sama sa mga pagtulun-an nga gipresentar ngadto sa usa ka kasingkasing nga gahi o dili andam.”¹

Agig dugang, usahay dili kita makasabot sa unsay atong madungog o mabasa diha sa mga kasulatan tungod kay dili andam ang atong mga kasingkasing. Kon mao kana ang sitwasyon, unsay angay natong buhaton?

Mahimo kitang magtinguha og katin-awan gikan niadtong kinsa nakasabot. Mahimo kitang mangutana sa mga misyonaryo, sa atong magtutudlo sa Sunday School, sa atong lider sa pagkapari o organisasyon, sa atong magtutudlo sa seminary o institute, kadtong kinsa mangalagad kanato, o sa atong matinud-anon nga mga ginikanan ug mga sakop sa pamilya. Mahimo natong tun-an ang mga pakigpulong sa kinatibuk-ang komperensiya. Ang Gospel Library nga app naghatag og daghan kaayong kapanguhaan nga makatabang kanato sa pagtinguha og dugang nga pagsabot.

Kinahanglan usab kitang mag-ampo ug mangayo sa Dios og dugang nga kahayag. Kon sinsero ang atong kasingkasing, tinuod ang atong katuyoan, ug kita adunay hugot nga pagtuo kang Kristo, makadawat kita og kahibalo sa mga kamatuoran sa ebanghelyo (tan-awa sa Moroni 10:4–5). Ang Ginoo miingon:

“Pangayo, ug kini ihatag nganha kaninyo; pangita, ug kamo makakaplag; tuktok, ug kini pagaablihan nganha kaninyo.

“Kay ang matag usa nga mangayo, makadawat; ug siya nga mangita, makakaplag; ug ngadto kaniya nga motuktok, pagaablihan” (3 Nephi 14:7–8).

Yutang Batoon

Ang ubang mga tawo makadungog sa gipahiuli nga ebanghelyo pinaagi sa mga misyonaryo, mobati sa gugma ni Kristo, ug motambong ug malingaw sa mga miting sa Simbahan. Apan, sa paglabay sa panahon, ang mga kalisod sa kinabuhi magpadayon. Ilang makaplagan nga ang kinabuhi wala mahimong usa ka tinubdan sa walay kataposan nga mga panalangin. Ang ilang hugot nga pagtuo mominos ug sila maanod palayo.

Ang uban makakita usab sa “yutang batoon” kon sila motambong og miting o komperensiya ug mobati nga nadasig sa pagbuhat sa husto sa tanang butang sukad niana nga higayon. Apan pagka Lunes dayon mobalik sila sa ilang regular nga mga responsibilidad. Ang mga hagit sa trabaho nagpabiling lisod. Ang mga tintasyon ingon og madanihon gayod kaayo. Ug mao nga ang ilang tinguha nga espirituhanong molambo mokunhod o mawala.

Ilang makat-onan sa lisod nga paagi nga kon walay halawom nga espirituhanon nga mga gamot nga mogunit kanato atol sa malisod nga mga panahon, mopakaon kanato kon kita gigutom, o mopabugnaw kanato kon init ang adlaw, mahimong mamatay kita sa espirituhanong paagi.

Unsaon nato sa pagpalambo sa yutang batoon? Tangtangon ang mga bato ug palawman ang atong espirituhanon nga mga gamot.

Mahimong mahagiton ang pagtangtang sa mga bato. Kini mahimong magkinahanglan og palibot diin giawhag ang hugot nga pagtuo. Kini mahimong magkinahanglan sa pag-ugmad og bag-ong mga panaghigalaay ug sa paglikay sa tanang matang sa daotan (tan-awa sa 1 Mga Taga-Tesalonica 5:22).

Aron makabaton sa kusog sa pagtangtang sa mga bato, gikinahanglan nato ang tabang sa Manluluwas. Moabot kana kon atong dawaton ang mga pakigsaad nga Iyang gitanyag. Magsugod kini pinaagi sa pagdawat sa pagdapit nga magpabunyag. Kini nagpasabot nga makompirmahan ug makadawat sa gasa sa Espiritu Santo. Kini nagpasabot sa pagdawat sa bisan unsang pakigsaad diin kita nagkulang sa gihapon, sama sa pagdawat sa pagkapari o pag-adto sa templo. Kini nagpasabot sa pagtambong sa simbahan ug pagbag-o sa mga pakigsaad pinaagi sa pag-ambit sa sakramento matag semana.

Kon moabot ang mga pagsulay ug mga tintasyon, makasalig gayod kita sa mga pakigsaad nga atong gihimo ngadto sa Ginoo. “Kita lig-on nga nabugkos ngadto ug uban sa Manluluwas samtang [kita] matinud-anong mohinumdom ug mohimo sa labing maayo sa pagpuyo sumala sa mga obligasyon nga atong gidawat,” miingon si Elder David A. Bednar sa Korum sa Napulog Duha ka Apostoles. “Ug kana nga pagkabugkos uban Kaniya mao ang tinubdan sa espirituhanon nga kalig-on sa matag panahon sa atong kinabuhi.”²

Yuta taliwala sa mga Tunok

Kini nga yuta motugot sa mga tanom nga motubo, lakip sa mga tunok. Ang mga tunok mao ang “mga kabalaka ug [ang] mga bahandi ug [ang] mga kahilayan sa kinabuhi” nga makaingon kanato nga ang “mga bunga dili mahinog” (Lucas 8:14).

Unsay mahitabo kon dawaton nato ang mga pakigsaad apan dili na maglakaw sa dalan sa pakigsaad? O moambit kita sa sakramento apan dili mangayo og kapasayloan, tungod kay dili na gani kita maghunahuna mahitungod sa atong mga sayop. O mahimong mangayo kita og kapasayloan apan modumili sa pagpasaylo sa uban. Atong gidawat ang mga pakigsaad sa templo apan napakyas sa pagpangalagad niadtong nanginahanglan. Atong gipadaplin ang mga kahigayonan sa pagpaambit sa ebanghelyo tungod kay nahadlok kita nga kini daw dili angay o makaulaw, o tungod wala na ta kahibalo unsay isulti.

Ang solusyon mao ang pagsunod sa pakigsaad nga atong gihimo sa dihang gibunyagan kita, “sa pagbangotan uban niadto nga nagbangotan; … sa paghupay niadto nga nagkinahanglan sa kahupayan, ug mobarog ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit nga [kita] mahimo nga maanaa, bisan hangtod sa kamatayon” (Mosiah 18: 9).

Atong matangtang ang mga sagbot kon maghinulsol kita kada adlaw, maghimo og ginagmay o dinagko nga mga pagpahiangay, ug mobalik ngadto sa higpit ug pig-ot nga agianan sa pakigsaad.

Dili kita motugot nga ang mga sagbot sa kinabuhi molupig kanato. Buhaton nato kini pinaagi sa pagbag-o sa atong mga panimalay ngadto sa mga santuwaryo sa hugot nga pagtuo. Atong tinguhaon ang bisan unsa nga magdapit sa impluwensiya sa Espiritu. Atong isalikway ang bisan unsa nga mopapahawa niana nga impluwensiya. Ug kita moserbisyo diha sa gingharian sa Dios—sa atong mga calling, sa templo, sa misyonaryo nga buhat, sa atong mga pamilya.

Ang Maayo nga Yuta

Adunay daghan kinsa maminaw sa pulong, makasabot niini, ug tugotan kining molambo diha sa ilang mga kasingkasing. Ngadto kanila ang Ginoo nagsulti, “Ako ang nagpili ug nagtudlo kaninyo aron kamo manglakaw ug mamunga ug bunga nga molungtad” (Juan 15:16). Alang niana nga mga tawo, ang tubag mao ang pagpadayon inubanan sa hugot nga pagtuo ug ang paglahutay diha sa maayong mga buhat.

Si Presidente Oaks nangutana, “Unsay atong buhaton sa mga pagtulun-an sa Manluluwas samtang padayon kitang nagpakabuhi?”³ Niining tuiga, samtang mangandam kita sa pagtuon sa Bag-ong Tugon, hinaot nga magpaduol kita sa Manluluwas ug palamboon ang atong espirituhanong yuta aron nga kita makadawat sa pulong. Dayon makahatag kita sa mga bunga nga Iyang gihangyo kanato nga dad-on pinaagi sa pagdawat ug pagbag-o sa mga pakigsaad nga nagbugkos kanato ngadto Kaniya, pinaagi sa pagserbisyo sa Dios ug paghigugma sa atong mga silingan, ug pinaagi sa pag-uswag subay sa dalan sa pakigsaad nga ugma damlag modala kanato balik ngadto sa atong langitnong panimalay.