Magmahimong Anaa alang sa Inyong Batang Lalaki

Ni Ross J. Davidson Jr., Texas, USA

Human ang Espiritu namulong sa akong amahan atol sa akong ordinasyon sa pagkapari, mihimo siya og dako nga mga kausaban sa iyang kinabuhi.

Nahimo akong aktibo sa Simbahan sa dihang ang akong Uyoan nga si Bill midala sa akong duha ka managsoong babaye ug nako ngadto sa Primary. Ang akong magtutudlo sa Primary, si Jean Richardson, usa ka mabination nga inahan. Ganahan ko niya ug sa akong bag-o nga mga higala sa simbahan, kinsa mas mabination kanako kay sa mga bata sa akong kasilinganan. Maong nakahukom ko nga magpabilin.

Samtang nagkaduol ang akong ika-12 nga adlawng natawhan, si Bishop Dal Guymon midapit kanako sa pagdawat sa Aaronic nga Pagkapari ug maorden nga usa ka deacon. Dili ako segurado kon unsay gipasabot niana, apan miingon ako og oo. Dayon miingon siya, “Unsa kaha kon imong hangyoon ang imong papa sa pagdala kanimo dinhi sa sunod nga Dominggo, ug kami ang moorden kanimo.”

Si Papa ug ang iyang pamilya mihunong sa pagtambong sa simbahan sa dihang mga 13 anyos siya. Isip usa ka hamtong, gigahin niya ang kadaghanan sa mga tapos sa semana diha sa lokal nga mga bar o mamasol [fly-fishing]. Miserbisyo siya sa US Navy atol sa Ikaduhang Gubat sa Kalibotan ug sa Koren War. Siya nanabako og tustos, moinom og mga makahubog, ug mamalikas, apan aduna siyay dungog sa pagkamatinuoron ug pagkamakiangayon sa among gamay nga lungsod sa Montana.

Sa dihang gidala ko ni Papa ngadto sa simbahan pagkasunod Dominggo, importante gayod kaayo kadto. Sa dihang miabot na ang higayon, gitawag ko ni Bishop Guymon ug gihangyo ko sa paglingkod diha sa usa ka lingkoranan. Pipila ka lalaki—apan dili ang akong papa—mibutang sa ilang mga kamot sa akong ulo ug mipahigayon sa ordinansa.

Nabati nako ang kabug-at sa pipila ka dagko nga mga kamot kanako. Si Papa, nga naglingkod diha sa usa ka bangko pipila ka piye ang gilay-on, mibati og lahi nga matang sa kabug-at—diha sa iyang dughan. Usa ka tingog ang namulong sa sulod kaniya, nag-ingon, “Kinahanglan magmahimong anaa ka alang sa imong batang lalaki sa sunod nga higayon nga kini mahitabo.”

Sa mga semana nga misunod, si Papa mihimo og dako nga mga kausaban sa iyang kinabuhi ug nagsugod sa pagtambong sa simbahan matag Dominggo. Sa wala madugay, ang Simbahan nahimong sentro nga gitutokan sa among kinabuhi sa pamilya.

Si Papa nahimo nakong tigtambag sa korum sa mga deacon, sa mga teacher, ug sa mga priest, akong magtutudlo sa Sunday School; ug akong coach sa basketball, softball, ug volleyball. Samtang kami mga kompanyon sa home teaching, si Papa mitabang sa ubang lalaki ug mga pamilya nga makabalik ngadto sa pagkaaktibo sa Simbahan.

Giabagan sa akong papa, nasinati nako ang akong kaugalingon nga personal ug makapausab nga pagkakabig. Sukad niadto, naningkamot ako nga mahimong sensitibo ngadto sa mga lalaki kinsa, sama sa akong papa, mahimong mosanong sa usa ka pagdapit nga mahimong labing maayo nga papa nga sila mamahimo.

Magmapasalamaton gayod ako sa kahangtoran alang sa unsay gibuhat sa akong Uyoan nga si Bill, sa usa ka mabination nga magtutudlo sa Primary, sa usa ka maalamon nga bishop, ug sa akong papa alang kanako 60 ka tuig ang milabay.