Ang Gahom sa Ehemplo

Ni Agim Deda, Tiranë, Albania

Nasayod ako nga ang paagi lamang nga akong madala ang akong asawa sa Simbahan mao ang pinaagi sa akong ehemplo. Sa dihang giusab nako ang akong kinaiya, nagsugod siya nga makabati sa Espiritu sa Dios.

Usa ka adlaw sa pagpadulong sa trabaho nakakita ko og duha ka batan-ong lalaki nga nagsangyaw sa pulong sa Dios diha sa dalan. Gipahunong ko nila ug nangutana kon gusto ba kong masayod og dugang mahitungod sa Ang Simbahan ni Jesukristo sa mga Santos sa Ulahing mga Adlaw. Nianang panahona, wala ko masayod kon asa paingon sa espirituhanon nga paagi ang akong pamilya. Kami walay espirituhanon nga kompas nga motultol sa among agianan.

Miinom ko og ilimnong makahubog nianang buntaga, maong wala kaayo ko makahinumdom sa unsay gisulti kanako sa mga misyonaryo. Apan gihatagan ko nila og Basahon ni Mormon ug usa ka pampleta mahitungod ni Propeta Joseph Smith, uban sa ilang numero sa telepono. Sa ulahing bahin nianang adlawa, nagsugod ko sa pagbasa. Dunay butang nga mitandog sa akong kalag sa dihang gibasa nako ang Basahon ni Mormon, ug natingala ko kon sa unsang paagi ang usa ka 14 anyos nga batang lalaki adunay nindot kaayo nga panan-awon.

Nangita ko sa kamatuoran, maong nagsugod ko sa pagpakigtagbo sa mga misyonaryo. Human sa pagpaminaw sa kadaghanan sa mga leksiyon, nasayod ko nga kinahanglan kong mabunyagan. Apan samtang nagkaduol ang adlaw sa akong bunyag, kami adunay usa ka leksiyon nga lisod nakong dawaton. Kana nga leksiyon mao ang bahin sa Pulong sa Kaalam.

Kana nga leksiyon lisod alang kanako tungod kay kusog kaayo kong moinom. Lisod ang akong palibot sa trabaho. Ang tanan nga akong katrabaho moinom, ug maong moinom usab ko. Kasagaran moinom ko human sa trabaho ug dugay nga mauli sa panimalay sa gabii.

Apan ang mga misyonaryo mihimo og maayo kaayo nga paningkamot. Gimahal gihapon nako sila tungod niini. Gitudloan ko nila nga gusto sa Dios nga mahimo kitang lig-on ug nga Siya mihatag kanato sa Pulong sa Kaalam aron sa pagpanalangin kanato. Ang pagtuman niini nga balaod lisod kaayo alang kanako, apan hinay-hinay, nagsugod ko sa pagtuman niini. Nakahinumdom ko nga manawag sa mga misyonaryo kada adlaw, mo-update kanila sa akong pag-uswag, ug mosulti kanila nga wala ako moinom nianang adlawa. Nalipay kaayo sila sa akong pag-uswag.

Uban sa ilang tabang, nabunyagan ko ug misulod sa panon ni Jesukristo. Nabati nako ang Espiritu nianang matahom nga adlaw! Apan nag-inusara ko sa dihang mipasakop ko sa Simbahan. Gusto nakong makauban nako ang akong pamilya.

Sa dihang nakig-istorya ko sa akong asawa, si Clirime, mahitungod sa Simbahan, dili siya maminaw sa sinugdanan. Ang iyang lolo nahisakop sa laing relihiyon, ug naghunahuna siya kon nganong Ang Simbahan ni Jesukristo sa mga Santos sa Ulahing mga Adlaw miabot pa sa Albania. Nasayod ako nga ang paagi lamang nga ako siyang madala sa ebanghelyo mao ang pinaagi sa akong ehemplo. Pinaagi sa atong mga buhat, ang mga tawo makakita kon kinsa gayod kita.

Si Clirime nakamatikod og mga kausaban kanako samtang gisalikway nako ang mga ilimnong makahubog ug nagsugod sa pag-uli og sayo gikan sa trabaho. Tungod sa mga kausaban nga akong gihimo, nagsugod siya nga makabati sa Espiritu sa Dios samtang giistoryahan nako siya mahitungod sa Simbahan. Dili ako makahulagway sa akong malipayong pagbati sa dihang gisultihan ko niya nga ugma damlag mabunyagan usab siya. Sa wala madugay nagsugod siya sa pagpaminaw sa mga leksiyon sa misyonaryo, diin mitabang ako sa mga misyonaryo sa pagtudlo. Malipayon gayod kaayo ako sa dihang mitakda siya og petsa alang sa iyang bunyag, unom ka bulan human ako nabunyagan.

Uban sa iyang bunyag, ug sa bunyag sa among duha ka anak kon mag-otso anyos na sila, nabati nako nga mahimo kaming mahangtoron nga pamilya. Apan ang bunyag mao lang ang sinugdanan. Aron mangandam sa pag-adto sa templo, nasayod kami nga kinahanglan namong mosunod sa Dios hangtod sa kataposan sa among kinabuhi, motuman sa mga sugo, mosimba, moambit sa sakramento, moserbisyo sa mga calling, mobasa sa mga kasulatan, ug magkat-on pa og dugang mahitungod sa mga pakigsaad ug sa plano sa kaluwasan.

Ang adlaw nga nasilyo kami isip usa ka pamilya didto sa Frankfurt Germany Temple usa ka laing matahom nga adlaw. Sa templo, mas nasabtan nako ang mahitungod sa plano sa kalipay nga ang atong Dios anaa alang kanato, ug nabati nako ang Iyang gugma.

Nakahinumdom pa gihapon ko sa mga saad nga si Clirime ug ako mihimo didto sa templo. Kon adunay dili maayo nga nahitabo o kon naglisod kami, ang akong hunahuna mobalik ngadto niadto nga mga saad.

Isip usa ka pamilya naningkamot kami nga magpuyo nga magkauyon sa usag usa tungod kay mao kana ang unsay nabati namo didto sa templo. Sa matag higayon nga maghunahuna ko sa templo, mobati ako nga malipayon ug bulahan. Nasayod ako nga tinuod ang Dios ug nga Siya nahigugma kanato ug gusto nga magmalipayon kita.