“Kon Siya Makahimo sa Tubig ngadto sa Bino … ,” Liahona, Ene. 2023.
Ang mga Milagro ni Jesus
Kon Siya Makahimo sa Tubig ngadto sa Bino …
Tulo ka butang nga akong nakat-onan gikan niini nga kanunayng mabaliwala nga milagro.
Si Juan mao lamang ang tigsulat sa Ebanghelyo nga nagsugilon sa Manluluwas nga mihimo sa tubig ngadto sa bino (tan-awa sa Juan 2:1–11). Kusog gayod ang iyang gibati mahitungod sa kasinatian nga mosulti kanato nga kini mao ang “[unang] milagro sa Manluluwas” (Juan 2:11).
Base sa kultura, ang mga sangpotanan nga mahutdan og bino nakadaot unta sa sosyal nga kahimtang niadtong nalambigit. 1 Ug samtang dili ko motuo nga ang usa ka milagro kinahangalang makapahingangha aron makapausab og kinabuhi, naghunahuna ko kon nganong gibati ni Juan nga importante kaayo kini nga milagro taliwala sa daghan kaayong milagro nga parehong dramatikanhon ug makapausab sa kinabuhi.
Nganong mga Milagro?
Nganong importante kaayo ang mga milagro sa tibuok pangalagad sa Manluluwas? Seguradong usa kini ka bahin niini tungod sa Iyang kaluoy alang niadtong nanginahanglan (tan-awa sa Marcos 1:41). Agig dungang, ang mga milagro importante nga ebidensiya sa Iyang balaan nga gahom ug awtoridad (tan-awa sa Marcos 2:5, 10–11). Ang milagroso nga mga panghitabo makapalig-on usab sa hugot nga pagtuo ug makahatag og pagtagad sa Iyang mensahe (tan-awa sa Juan 2:11; 6:2).
Dayon usa ka tawo ang mipasabot kanako nga ang mga milagro sa Manluluwas wala lang mag-aghat sa mga tawo nga maminaw sa mensahe; kini mitabang sa pagtudlo sa mensahe.2 Sa dihang gipangutana nako ang akong kaugalingon kon unsay akong makat-onan mahitungod ni Jesukristo ug sa Iyang balaan nga misyon gikan sa paghimo sa tubig ngadto sa bino; nagsugod ko nga makabaton og mas dako nga pagsabot.
Ania ang tulo ka leksiyon nga akong nakat-onan gikan sa milagro sa Cana mahitungod sa Manluluwas ug sa Iyang gahom sa pagluwas.
1. “Wala pa moabot ang akong panahon”
Sa dihang nangayo og tabang si Maria kang Jesus, Siya mitubag, “Wala pa moabot ang akong panahon” (Juan 2:4). Tungod kay walay dugang nga mga detalye, dili klaro gikan sa rekord ni Juan kon unsay eksaktong gilaoman ni Maria o kon unsay gipasabot ni Jesus sa Iyang tubag nga wala pa moabot ang Iyang panahon.
Nahunahunaan nako nga importante kini nga pulongan. Posible nga si Jesus nagpasabot og duol nga umaabot nga panghitabo, sama sa sinugdanan sa Iyang publiko nga pagpangalagad. Sa samang higayon, ang pulongan gipalanog sa tibuok rekord ni Juan, kasagaran nagtudlo sa umaabot nga kataposang milagro sa Iyang maulaong sakripisyo (tan-awa sa Juan 4:21–23; 5:25–29; 7:30; 8:20). Sa kataposan, ang pulongan gisubli pag-usab diha sa hinapos sa Iyang mortal nga pangalagad, sa dihang “Nasayod si Jesus nga miabot na ang panahon sa iyang pagbiya niining kalibotana ug pag-adto sa Amahan” (Juan 13:1, tan-awa usab sa Juan 12:23, 27; 16:32). Ug sa wala pa mibiya padulong sa Getsemani, nag-ampo Siya, “Amahan, miabot na ang takna. Ipadayag ang himaya sa imong Anak aron ipadayag sa Anak ang imong himaya” (Juan 17:1).
Ang pagkakita nga si Juan misubli niini nga pulongan sa iyang tibuok rekord nakatabang nako nga makakita sa kataposan gikan sa sinugdanan. Una, giusab ni Jesus ang tubig ngadto sa bino aron sa pagtagbaw sa pisikal nga kauhaw. Dayon, sa kataposan, gigamit Niya ang bino sa sakramento aron sa pagrepresentar sa Iyang maulaong dugo, nga mihimong posible sa kinabuhing dayon ug maoy nakaingon nga dili na gayod uhawon pag-usab kadtong kinsa motuo Kaniya (tan-awa sa Juan 4:13–16; 6:35–58; 3 Nephi 20:8).
2. “Buhata ninyo bisan unsay iyang isugo kaninyo”
Human mangayo og tabang ni Jesus, si Maria misulti sa mga sulugoon, “Buhata ninyo bisan unsay iyang isugo kaninyo” (Juan 2:5). Adunay usa ka leksiyon niini nga pamahayag ug sa makapadani nga mga pagkasusama tali niini nga asoy ug sa asoy ni Jose sa Ehipto.
“Sa dihang giabot na sa gutom ang tibuok Ehipto, nangayog pagkaon ang katawhan kang Paraon. Ug giingnan ni Paraon ang tanang Ehiptohanon, “Pangadto kamo kang Jose ug sunda ang iyang isulti kaninyo” (Genesis 41:55).
Tingali wala gituyo ni Maria nga mohimo niini nga koneksiyon, ug tingali si Juan wala usab. Apan samtang akong nabantayan ang mga pagkasusama, duha ka ideya ang misantop sa hunahuna.
Una, akong nakita ang laing paagi nga si Jose ug ang ubang mga tawo gikan sa Daang Tugon naghulagway ni Jesukristo ug sa Iyang misyon. Apan, mas importante, ang mga istorya sa Ehipto ug sa Cana mipahinumdom kanako nga si Jesukristo dili lang makaluwas kanato gikan sa sala ug kamatayon pinaagi sa Iyang Pag-ula—nga sa kaulahian Iyang girepresentar sa pan ug bino—apan Siya usab makaluwas kanato gikan sa pisikal, sosyal, ug ubang mga hagit. Sa dihang nahutdan og pan ang mga tawo, si Paraon misulti kanila sa pagbuhat sa bisan unsay isulti ni Jose. Gibuhat nila ug gihatagan og pan ug naluwas gikan sa pisikal nga pag-antos. Sa dihang nahutdan og bino ang mga sulugoon, si Maria misulti kanila sa pagbuhat sa bisan unsay isulti ni Jesus. Gibuhat nila ug gihatagan og bino, ug kadtong mga hingtungdan naluwas gikan sa pagkapakyas sa ilang mga katungdanan.
Kon andam kita nga mobuhat sa bisan unsay isulti ni Jesus, makahimo Siya og mga milagro sa atong mga kinabuhi.
Balm in Gilead [Tambal diha sa Gilead], ni Annie Henrie Nader, dili mahimo nga kopyahon
Kon andam kita nga mobuhat sa bisan unsay isulti ni Jesus, makahimo Siya sa susama alang kanato ug makahimo og mga milagro sa atong mga kinabuhi (tan-awa sa Mga Hebreo 10:35–36). Ang mamahimong maluwas mao ang labing dako sa tanan sa Iyang mga milagro, ug nagkinahanglan kini og pagkamasulundon sa atong bahin (tan-awa sa Doktrina ug mga Pakigsaad 14:7; Mga Artikulo sa Hugot nga Pagtuo 1:3).
3. “Ug kini ilang gipangpuno hangtod sa baba.”
Ang Manluluwas misugo sa mga sulugoon nga pun-on sa tubig ang unom ka banga nga bato. “Ug kini ilang gipangpuno hangtod sa baba” (Juan 2:6–7).
Samtang ang mga eksperto misugyot og lahi-lahi nga mga gidaghanon, tingali maayo ra nga banabana ang pag-ingon nga ang matag banga adunay pipila ka litro. Kon mas lisod man ang paghimo sa usa ka litro o 100 ka litro sa tubig ngadto sa bino, wala ko kahibalo. Unsay nakapausab sa akong kinabuhi mao ang ideya nga si Jesus adunay gahom sa pag-usab sa usa ka butang ngadto sa usa ka butang nga lahi gayod kaayo. Wala lang siya mihimo og tubig nga lasa og bino; Gikuha Niya ang tubig, uban sa yano nga molecular nga estruktura niini, ug gihimo kini nga bino, usa ka komplikado nga sagol sa gatosan ka kemikal nga mga compound.
Kon mabuhat Niya kana, nan mausab Niya ang akong mga hagit ngadto sa mga panalangin—dili lang magdugang og timailhan sa paglaom apan tinuorayng mousab sa unod sa pagsulay ngadto sa usa ka butang nga makapanalangin kanako (tan-awa sa Mga Taga-Roma 8:28; 2 Nephi 2:2).
Ug kon mabuhat Niya kana sa usa ka hagit, mabuhat Niya kini sa tanan niini. Mao nga kon ang kinabuhi ingon og napuno gayod sa mga pagsulay, hinumdomi nga Siya makausab sa tubig ngadto sa bino. Siya makahatag kanila ug purongpurong nga bulak inay abo (tan-awa sa Isaias 61: 3). Siya makakuha sa daotan ug himoon kini nga maayo (tan-awa sa Isaias 50: 20). Siya makahimo sa akong mga kasaypanan ngadto sa paglambo ug makakuha sa akong mga sala ug usbon kini gikan sa panghimaraot ngadto sa pag-uswag.3
Ug, para nako, kana nga pagkaamgo mao ang labing mahinungdanon sa tanan. Kini nga milagro nga akong gibaliwala kaniadto mitudlo kanako nga pinaagi sa Iyang gahom, kon kita adunay hugot nga pagtuo sa pagbuhat sa unsay Iyang gihangyo, Siya makausab kanato gikan kon unsa kita kaniadto ngadto sa unsay atong maabot—sama Kaniya.