“Nganong Dili Ako Makapasaylo?,” Liahona, Ene. 2023.
Mga Tingog sa mga Santos sa Ulahing mga Adlaw
Nganong Dili Ako Makapasaylo?
Nag-ampo ako sa Langitnong Amahan sa pagtabang kanako nga mabuntog nako ang bati nga mga pagbati ug mopasaylo.
Paghulagway ni Allen Garns
Ako miapil sa pipila ka laing mga brother sa akong ward aron motabang sa usa ka sister nga mobalhin. Apan sa among pag-abot sa iyang apartment, usa ka van nga wala matarong sa pagkaparking nakababag sa among pag-agi sa iyang dapit dala among van.
Gitawag nako ang numero sa telepono diha sa kilid sa van aron mohangyo og tawo nga moanhi ug ibalhin ang van. Usa ka lalaki mitubag ug misaad nga moanhi na siya sa dili madugay.
Human sa 15 minutos, mitawag na usab, ko apan wala siya motubag. Sa kataposan, hunam sa usa pa ka tawag, mitunga siya dala ang duha ka bata. Nasuko siya ug misulti og butang nga nakapungot nako. Naningkamot ko nga kalimtan kini samtang kami mipadayon sa pagbalhin.
Nianang gabhiona naghunahuna ko kabahin sa kasinatian. Ako nag-ampo nga ang Langitnong Amahan motabang kanako nga makalimtan ang akong mga gibati ug mopasaylo sa tawo. Siya mitubag sa akong pag-ampo.
Pagkataud-taud lang human niana, bisan pa man, nagbasa nako sa lokal nga pamantalaan ug nakamatngon og usa ka artikulo kabahin niining tawhana. Naglakip kini sa iyang litrato. Ang akong negatibong mga pagbati ngadto kaniya mibalik. Busa, ako mibalik na usab agi sa samang proseso. Ako nangayo sa Ginoo nga kining dili mahinungdanong butang dili na mohasol nako bisan kanus-a ug nga Siya motabang nako sa pagpasaylo sa tawo. Usa ka maayong pagbati ang miabot.
Wala magdugay gikahinagbo na usab nako ang samang tawo didto sa usa ka tindahan. Ang akong bati nga mga pagbati mibalik na usab. Ako nahingangha. Akong gipangutana ang Ginoo kon nganong wala paman ko nakalagpas niini nga kasinatian. Paglabay sa pipila ka adlaw, Siya mitudlo nako og usa ka leksiyon.
Nag-atras ko gikan sa mga nataran sa Helsinki Findland Temple sa dihang nakabantay ko niining maong tawo nga nagtrabaho diha sa mga tanaman sa templo. Dili ko katuo sa akong nakita. Nabuksan ang akong hunahuna ug akong nasabtan nga siya, sama nako, nagserbisyo sa Ginoo ug nga siya, sama nako, adunay makasagmuyo nga mga adlaw kon ang mga panghitabo dili maayo. Dayon akong gitan-aw kining tawhana isip akong igsoong lalaki. Uban sa bag-ong pagtan-aw, ako mibati og respeto ug gugma ngadto kaniya. Human niana, ang tanan nga mga pagbati sa sinugdanan nahanaw, wala na gayod mobalik.
Kon kita motan-aw sa uban sama sa pagtan-aw sa Ginoo kanato, kita makasunod sa Iyang sugo nga pagpasaylo sa hingpit, (tan-awa sa Mateo 6:14–15; Doktrina ug mga Pakigsaad 64:9–10). Kini nga kasinatian usa ka halandumon, malumo nga kalooy sa Ginoo, nga gipamalandongan gihapon nako sa akong kasingkasing.