Dali, Sunod Kanako

Mateo 3; Marcos 1; Lucas 3

Sa Unsang Paagi ang Bunyag Nagpakita og Pagkamasulundon?

Ang atong Manluluwas mao ang hingpit nga ehemplo sa pagkamasulundon ngadto sa Langitnong Amahan, nga mipahayag, “wala man ako magtinguha pagbuhat sa akong kabubut-on kondili sa kabubut-on sa [Amahan nga] nagpadala kanako” (Juan 5:30).

Nabunyagan ang Manluluwas aron sa pagpakita sa iyang hingpit nga pagkamasulundon ngadto sa Langitnong Amahan. Sa samang paagi, kon atong ipakita ang atong pagkamasulundon pinaagi sa pagpabunyag, mosulod kita ngadto sa usa ka pakigsaad sa Dios aron mahimong mapahinungoron, masulundon nga mga disipulo ni Jesukristo. (Tan-awa sa 2 Nephi 31:5–13.)

Usa ka paghulagway sa pagkamasulundon sa Manluluwas makita diha sa asoy sa Iyang bunyag:

“Unya gikan sa lalawigan sa Galilea miadto si Jesus sa Jordan aron magpabunyag kang Juan.

“Dili unta mobunyag kaniya si Juan nga miingon, ‘Ako ang angay nimong bunyagan apan nganong ako na man hinuon ang mobunyag kanimo?

“Apan gitubag siya ni Jesus, ‘Pasagdi lang nga mahitabo kini kay niining paagiha makatuman kita sa tanan nga gisugo sa Dios’” (Mateo 3:13–15).

John Baptizing Jesus [Si Juan nga Nagbunyag ni Jesus], ni Harry Anderson

Sulati ang Blangko

Unsaon man ninyo pagkompleto ang mosunod nga pamahayag? Ang bunyag mao ang _____________. Alang sa mga ideya, tan-awa sa 2 Nephi 31:17–18; tan-awa usab sa J. Devn Cornish, “Ang Ganghaan nga Gitawag og Bunyag,” Liahona, Peb. 2015, 17.

Panaghisgotan

Isip usa ka pamilya o sa inyong kinaugalingon, rebyoha ang pakigsaad nga inyong gihimo sa bunyag (tan-awa sa Mosiah 18:8–10; Doktrina ug mga Pakigsaad 20:37). Unsa nga mga butang ang inyong mabuhat aron sa pagsunod niini nga pakigsaad sa inyong inadlaw nga kinabuhi?