Mga Sukaranan sa Ebanghelyo

Mahangtoron ang mga Pamilya

Ang pamilya mao ang sukaranan nga yunit sa katilingban ug sa Simbahan. Ang mga miyembro sa Ang Simbahan ni Jesukristo sa mga Santos sa Ulahing mga Adlaw nagtuo nga ang mga pamilya mahimong mahangtoron. Maningkamot kita sa pagpalig-on sa atong mga pamilya dinhi sa yuta. Kita adunay hugot nga pagtuo usab nga makadawat kita sa panalangin sa usa ka mahangtoron nga pamilya.

Ang Pamilya sa Dios

Ang tanang tawo espiritu nga mga anak nga lalaki o mga anak nga babaye sa langitnong mga ginikanan. Kitang tanan kabahin sa pamilya sa Dios. Kitang tanan adunay diosnong kinaiyahan ug kapalaran. Kon matarong kitang magpakabuhi, makabalik kita sa pagpuyo uban sa atong Langitnong Amahan isip kabahin sa Iyang pamilya sa kahangtoran.

Litrato sa kasal pinaagi ni Joseph Kaluba

Mahangtorong mga Pamilya

Kon ang usa ka lalaki ug usa ka babaye maminyo diha sa templo ug motuman sa ilang mga pakigsaad, ang ilang kaminyoon molungtad sa kahangtoran. Kini nga ordinansa sa templo gitawag og pagsilyo. Ang mga anak nga matawo human nasilyo ang ilang mga ginikanan natawo diha niana nga pakigsaad. Ang mga anak nga natawo sa wala pa nasilyo ang ilang mga ginikanan mahimong isilyo ngadto kanila diha sa templo aron mahimo silang pamilya sa kahangtoran. Ang mga miyembro sa Simbahan mohimo sa buhat sa family history ug templo aron ilang masilyo ang ilang mga pamilya latas sa tanang henerasyon. Ang panalangin sa usa ka mahangtoron nga pamilya nahimong posible tungod ni Jesukristo ug sa Iyang Pag-ula.

Kaminyoon

Ang kaminyoon tali sa usa ka lalaki ug usa ka babaye gi-orden sa Dios. Ang ebanghelyo ni Jesukristo nagtudlo sa mga bana ug mga asawa nga magmaunongon ngadto sa usag usa ug magmatinud-anon sa ilang mga pakigsaad sa kaminyoon. Kinahanglang magmatinuoron sila sa hunahuna, pulong, ug buhat. Ang kaminyoon usa ka patas nga panagkauban, ug ang mga kapikas kinahanglang modasig, mohupay, ug motabang sa usag usa.

Mga Ginikanan ug mga Anak

Ang Dios misugo ni Adan ug Eva nga magbaton og mga anak. Ang mga lider sa Simbahan nagtudlo nga kini nga sugo nagpabilin gihapon. Ang mga inahan ug mga amahan magtinabangay sa pagpadako sa ilang mga anak diha sa gugma ug pagkamatarong (tan-awa sa Doktrina ug mga Pakigsaad 68:25–28). Gitudloan ang mga anak sa pagtahod ug pagsunod sa ilang mga ginikanan (tan-awa sa Exodo 20:12).

Pagtudlo ug Pagkat-on

Ang mga ginikanan motudlo sa ilang mga anak sa paghigugma sa Dios ug pagsunod sa Iyang mga sugo. Ang kinabuhi sa pamilya maghatag kanato og mga kahigayonan sa pagbati og kalipay ug pagkat-on og pailob ug kawalay hinakog. Kini nga mga kinaiya motabang kanato nga mahimong mas sama sa Dios ug moandam kanato nga magpuyo nga malipayon isip mga pamilya sa kahangtoran.

Paglig-on sa mga Pamilya

Nagkinahanglan kini og paningkamot, pahinungod, ug pailob aron sa pag-ugmad og malamposon nga pamilya. Ang mga baroganan sa ebanghelyo sama sa hugot nga pagtuo, pag-ampo, pagpasaylo, gugma, trabaho, ug maayo nga kalingawan makatabang kanato nga makakaplag og kalipay sa kinabuhi sa pamilya. Makadawat usab kita og personal nga pagpadayag aron masayod kon unsaon sa pagpalig-on sa atong mga pamilya.

Christ’s Image [Imahe ni Kristo], ni Heinrich Hofmann

Mga Panalangin nga Anaa alang sa Tanan

Dili tanan adunay kahigayonan nga mahimong kabahin sa usa ka sulundon nga pamilya dinhi sa yuta. Apan ang Dios misaad nga ang tanan nga motuman sa Iyang mga sugo makadawat sa tanang panalangin sa usa ka mahangtoron nga pamilya. Makasalig kita Kaniya ug magbaton og hugot nga pagtuo sa Iyang tukmang panahon.

Gikan sa mga Kasulatan

Ang mga ginikanan motudlo sa ilang mga anak sa paghigugma ug pagserbisyo sa usag usa (tan-awa sa Mosiah 4:14–15).

Ang pag-ampo mopalig-on sa mga pamilya (tan-awa sa 3 Nephi 18:21).

Kadtong kinsa nasilyo diha sa templo makadawat og mahangtoron nga mga panalangin (tan-awa sa Doktrina ug mga Pakigsaad 132:19).

Mga Pulong nga Hinumdoman

Diosnong kinaiyahan: Mga kinaiya nga atong napanunod gikan sa Dios isip Iyang espiritu nga mga anak.

Mga Pakigsaad: Mga saad nga atong gihimo sa Dios. Siya misaad og mga panalangin kanato.

Gi-orden: Gi-set up, gitukod, o gihan-ay. Ang “orden” mahimong magpasabot usab sa paghatag og awtoridad sa usa ka tighupot sa pagkapari diha sa usa ka katungdanan sa pagkapari, sama sa deacon o elder.

Pagpadayag: Inspirasyon gikan sa Dios ngadto sa Iyang mga anak sa yuta.

Pagkaplag pa og Dugang

Aron makat-on kon unsay gitudlo sa mga propeta sa ulahing mga adlaw mahitungod sa mga pamilya, mahimo ninyong basahon ang “Ang Pamilya: Usa ka Pamahayag ngadto sa Kalibotan” diha sa ChurchofJesusChrist.org o diha sa Gospel Library nga app. Ang mga ward ug mga branch adunay Primary, Young Men, ug Young Women nga mga organisasyon alang sa mga bata ug mga tin-edyer. Mahimo kamong makig-istorya ngadto niadto nga mga lider ug ngadto sa inyong tigpangalagad nga mga brother o mga sister mahitungod kon sa unsang paagi sila makatabang sa pagpalig-on sa inyong mga anak.