Kon ang Laygay nga Sakit [Chronic] Moabot Kanimo

Ni Norman C. Hill

Ang pagsagubang sa inadlaw-adlaw nga kalisdanan makatabang kanato sa paglambo sa kaluoy, pagbati, ug pagbangon.

Imahe

usa ka kamot sa tawo naggunit sa laing kamot sa tawo

Sa wala pa siya mitaliwan gikan sa makadaot nga sakit, ang akong inahan kanunayng mopahiyom ug moingon, “Walay usa kanato nga makagawas dinhi nga buhi, busa mas maayo nga mobuhat kita kutob sa atong mahimo sa unsay anaa kanato.”

Mao kana atol sa iyang maayong mga panahon. Ug sa iyang kinabuhi, daghan siya og maayong panahon.

Apan aduna usab siyay mga panahon nga dili kaayo haruhay. Niadtong mga panahon nga siya moingon, “Dawata unsa ang moabot sa inyong dalan ug siguroa nga kamo makabuhat gihapon og mga maayo sa kalibotan.”

Sa tibuok kalibotan, ang mga tawo nabuhi og mas dugay kay sa karaan.¹ Apan bisan og kita nabuhi og mas dugay, kita mas adunay kalagmitan nga makaugmad og laygay nga sakit: diabetes, Parkinson’s, kanser, depresyon, Alzheimer’s, ug daghan pa. Busa, kon ang laygay nga sakit moabot sa inyong dalan, unsay inyong tubag?

Padayon sa Unahan uban sa Hugot nga Pagtuo

“Atubanga ang problema, bisan kon kini lisod,” miingon ang usa ka brother nga napugos sa pagkuha og disability leave sa dihang ang iyang asawa mibalik na sa pagtrabaho sa pagsuporta sa ilang pamilya. Siya nagtuo nga kasagaran kaayo nga kita mopakita og kamaya sa panagway aron mapugngan ang atong mga pagbati o mapalambo ang atong panagway. “Imbis mopadayon sa unahan uban sa hugot nga pagtuo kita moungot samtang kita magpaabot alang sa usa ka milagro o magbagolbol kon walay moabot” miingon siya. Siya naglahutay pinaagi sa pagpaminaw sa mga kasulatan ug sa pakigpulong sa kinatibuk-ang komperensiya ug pinaagi sa pagpakig-istorya sa mga higala ug mga pamilya diha sa telepono.

“Kining pagkaordinaryo sa matag adlaw ang makapaluya kanako,” miingon ang usa ka sister kansang bana nasakit og laygay. “Ang panglawas sa akong bana dili na gayod maayo. Ako modawat niana. Apan ang kalaay sa pagbuhat og balik-balik sa mao gihapon, makalaay nga mga buluhaton makaluya sa hunahuna, lawas, ug mahago sa espirituhanong paagi.” Nagpasalamat siya sa mga pagbisita gikan sa mga tigpangalagad nga mga sister. “Kon mohapit sila tinuod gyod nga makalipay sa akong adlaw.”

“Usahay, ang akong asawa ug ako makalimot sa mga butang ug saputon sa usag usa,” miingon ang lain nga tigulang na nga brother. “Kami masagmuyo sa pagkamalimtanon , ug ilabi na magmahay pagkahuman sa mga pulong sa kasuko nga among gisulti sa usag usa.” Nagkat-on sila sa pagsulat aron matabangan sila sa paghinumdom. Gitugtan nila ang usag usa sa pagpaabot nga mokalma sa dili pa mosulti. “Ug,” siya nag-ingon, “nagkat-on gani kami sa kaimportante sa pagsulti og, ‘Salamat,’ ug ‘Gihigugma ko ikaw.’”

Laing tigulang na nga magtiayon naningkamot sa pagpaigo sa gamay nga kinitaan hangtod ang presyo sa ilang tambal midoble. Salamat sa mga sakop sa pamilya ug sa ilang ward, ang ilang mga panginahanglan natubag. “Sa sinugdanan kami maulaw sa pagpangayo og tabang, ilabi na gikan sa among mga anak,” miingon ang brother. “Apan ang tanan matinguhaon sa pag-abag.”

Imahe

Si Jesus nga nag-ayo og usa ka tawo

Detalye gikan sa He Healed Many of Diverse Diseases [Siya Miayo og Daghan sa Nagkadaiyang Sakit], ni J. Kirk Richards, dili mahimong kopyahon

Mga Sugyot ug mga Obserbasyon

Ania ang pipila ka mga sugyot ug mga obserbasyon gikan niadtong kinsa nagsagubang og laygay nga sakit:

Kadtong modangop sa Manluluwas makakaplag og paglaom. “Nagtuo ko nga walay makasabot sa akong giagian,” matod pa sa usa ka brother nga adunay chronic fatigue syndrome (CFS). “Dayon usa ka Dominggo samtang nag-ambit sa sakramento, nakaamgo ko nga ang Manluluwas nakasabot sa akong pag-antos. Nasayod ko nga makalahutay ko pinaagi sa pagpaduol ngadto Kaniya.” (Tan-awa sa Alma 7:11–12; Doktrina ug mga Pakigsaad 121:8; 122:8.)
Ang kapuangod madugangan niadtong kinsa “maayong molahutay niini” (Doktrina ug mga pakigsaad 121:8). “Kinsa ang atong hunahunaon, sa panahon sa kasubo ug katalagman, alang sa panabang ug kahupayan? … Sila ang mga lalaki ug mga babaye nga nag-antos, ug gikan sa ilang kasinatian sa pag-antos ilang gidala ang kabuhong sa ilang simpatiya ug pahasubo isip usa ka panalangin niadtong nanginahanglan karon. Mahimo ba nila kini kon wala pa sila mismo nag-antos sa ilang kaugalingon?”²
Lihok sa paagi nga molampos sa hinay-hinay. “Pipila ka tuig ang milabay, ang kasakit hilabihan ka grabe nga dili na ko kahibalo kon makaagwanta pa ba ko. Misugod ko sa pagbati og paghikog,” miingon ang usa ka sister nga nag-antos gikan sa multiple sclerosis (MS). Siya nagpasusi sa iyang kaugalingon ngadto sa mental health unit sa usa ka ospital. Atol sa pagtambag, ang iyang motto nahimong dili lang “lahutay hangtod sa kataposan” (1 Nephi 22:31) apan “lahutay hangtod sa kataposan sa adlaw.”
Pag-ugmad og bag-o nga mga tinguha ug pagkaplag og bag-ong paagi sa pagserbisyo. Imbis maguol sa unsay dili na nimo mahimo, diskobriha ang bag-ong mga hilig. Usa ka sister nga dunay MS nakakaplag nga siya dili makahimo sa mga butang nga iyang gusto sa una, sama sa pagsakay og kabayo o softball. Hinoon, siya nakat-on og calligraphy. Karon siya naggamit sa iyang bag-ong gipalambo nga talento sa paghimo og nindot nga manuskrito sa Basahon ni Mormon alang sa iyang pamilya.

Kon ang laygay nga sakit matinuod sa kinabuhi, kini gayod usa ka hagit. Apan uban sa hugot nga pagtuo, paglaom ni Kristo, ug usa ka tinguha sa pagpadayon sa pagserbisyo, ang pagsagubang sa inadlaw adlaw nga kalisdanan makatabang kanato sa paglambo sa kalooy, pagbati, ug pagbangon.

Ang tagsulat nagpuyo sa Utah, USA.