O Le Lototele e Fesili Atu

Saunia e Lillian Arp

O le olaga o Te Awhina a o teineitiiti sa faigata. Sa tausia o ia e lona tinamatua seia aulia le 8 o ona tausaga, ma sa oo ina siitia mai lea fale i lea fale, o fualaau faasaina ma sauaga sa faigofie ona maua nai lo meaai po o le faatuatua. “Sa leai se talanoaga i le Atua,” sa ia fai mai, “Leai se talanoaga mo le sailia o le faamalologa ma le faamagaloga . . . Sa ou ola ae i le oona o le inoino ma le matuitui aua sa lei aoaoina au i se auala sili atu.”

I lona talavou, sa ia leiloa. “Sa leai sou taialaga, leai se saogalemu, ma leai se na fai ma faataitaiga. Sa ou le mautonu ma sa leai se mea e maua ai le filemu,” sa ia manatua. Sa na o le tasi le ituaiga olaga sa ia iloa i lena taimi, ma mulimuli ane, sa taitaiina atu o ia i le nofoaga toe fotuai mo lona lava vaisu tau ava malosi.

E lei umi talu ona tatalaina mai o ia, sa ia feiloai atu ai i faifeautalai mai Le Ekalesia a Iesu Keriso o le Au Paia o Aso e Gata Ai. Sa ia vaaia muamua ia i latou, o lea sa masani ai o ia iā i latou, ae peitai mo se mafuaaga i lea aso sa lagona e Te Awhina se uunaiga malosi e valaau atu ia i la’ua.

“E iai la’u fesili,” sa ia manatua. “E te ono manatu o se fesili faavalevalea lenei, peitai pe a e ola a’e e aunoa ma se iloa o le Atua . . . Ou te matua leiloa lava.” Sa ia faapea atu i faifeautalai, “Pe a oulua talia mai lau fesili e tasi, O le a ou faalogo atu i le [lua savali].”

Ona ia fesili atu lea: “O le Atua se tane poo se fafine?”

O se tasi o faifeautalai sa tali atu, “O le Atua o lo tatou Tama Faalelagi alofa.”

O lenei tali sa aumaia se lagona e lei faamoemoeina o le manino ma le filemu ia Te Awhina. Sa ia manao e aoao atili. “Ua lelei,” sa ia fai atu ai i faifeautalai. “O le a ou faalogo atu ia oulua.”

O lea ua 10 tausaga talu ona papatisoina Te Awhina o se tagata auai o Le Ekalesia a Iesu Keriso o le Au Paia o Aso e Gata Ai. Sa avea o ia lava ma faifeautalai, e lei umi lava talu na uma lona papatisoga, sa auauna atu ai i le Misiona a Brisbane i Ausetalia. Ona, i le 2020, sa ia faaipoipo atu ia Josh, ‘o se alii o a’u miti.’ O loo tulimatai atu le ulugalii e faamauina o le tasi i le isi—mo le taimi nei ma le faavavau atoa—i le taimi lava e toe tatalaina ai le Malumalu o Hamilton i Niu Sila.

I le toe to manatu i le amataga o lana malaga ofoofogia i se fesili faigofie, sa matauina ai e Te Awhina o le Perofeta o Iosefa Samita sa ia maua foi lana faaaliga maoae ona sa ia te ia le lototele e fesili atu i le Atua . . . ma e faapei o Iosefa Samita, sa aoaoina e Te Awhina o nisi taimi e le sau gofie le tali.

Ina ua mua’i faamatalaina atu e faifeautalai le Upu o le Poto ia te ia, o le tali muamua lava a Te Awhina’s o le, “Leai faafetai.” Peitai tusa pe o ia tauivi ma le manatu o le taofia o nei mea leaga, sa ia faaofoina o ia lava mai le vave ona ia usiusitai. Tusa la, “i le faaiuga o lena lesona [faifeautalai], ua taofi lau inu kofe,” sa ia ata.

E le o mea uma foi sa pau tonu e aunoa ma se faatinoga, peitai sa tutumau Te Awhina ma sa tauia i le faamalologa ma le faamagaloga e ala lea i le Togiola a Iesu Keriso. I le aluga o tausaga, na aumaia ai ia te ia le malosi ma le faamoemoe e iloa ai o Iosefa Samita ao talavou sa tauivi foi ma se pogisa matautia, a o le i maua lona aafiaga patino i le Uluai Faaaliga ofoofogia, lea o le a aumaia se tisipenisione fou o le talalelei i le lalolagi.

O upu a Elder Jeffrey R. Holland sa fesoasoani ia Te Awhina e malamalama ai i lenei faatulagana:

“O le meamoni manino ma matua loloto a’ia’i lea ao lumanai taimi sili, e mautinoa lava a o lumanai taimi sili faaleagaga, o le a oo mai puapuaga, faafeagai, ma le pouliuli. E iai lava taimi faapenei o le olaga mo i tatou, ma o nisi taimi e oo mai ai a o tatou tulalata atu i se faaiuga taua poo se laasaga taua i o tatou olaga.”¹

“A o ou faamanatuina lo’u 10 tausaga o le sau ai lea i totonu o le lafu, ua ou maua ai le faamalologa lea e pau le vaega e maua ai ole tatou vaavaai atu ia Keriso ma salamo,” saunoaga lea a Te Awhina. “Ou te faafetai mo faifeautalai, mo mea moni sa o latou aoao ai a’u . . . ma mo mea ua faia e le talalelei i lou olaga.”