O se Galuega o le Loto

Potu mo Talafou

Mai Iuta i Niu Sila, o se ata mamanu faafaata ua tuufaatasia ai tagata taitoatasi, aiga, ma afioaga.

O Vicki Wihongi o se tagatanu’u o Niu Sila sa suesue i se faletusi i Iuta, ISA i le tauamataga o lenei tausaga sa la feiloai ai ma Reid Turley, sa galue ai iina.

Sa o la talanoa ai ma sa ia faasoa atu o ia o se faatonu o fesootaiga galue fua mo Le Ekalesia a Iesu Keriso o le Au Paia o Aso e Gata Ai i Niu Sila. Sa ia ta’u atu ia Reid e masani ona ia maua le avanoa e feiloai ai ma uo mai isi faatuatuaga ma le lautele o le afioaga.

Sa ta’u atu e Reid ia Vicki e faapea sa ia tatalo mo se avanoa e faameaalofa atu ai se ata vali faapitoa lea o loo faaalia ai le faaliliuga a se tusiata o le aao o Iesu Keriso.

Sa ofo atu Vicki e fesoasoani ia Reid i le toe aveina atu o le ata vali i Niu Sila, na o la malilie faatasi o le a avea ma mataupu talosia i tatalo ina ia mafai e Vicki ma lona toalua, o Stranz, ona taitaiina i le tagata sao e mauaina le meaalofa.

I nai vaiaso na sosoo ai, o Vicki, Stranz ma le uso o Stranz o Troy sa o latou maua le avanoa e feiloai atu ai i le peresitene fou faatoa tofia o le Asosi o Tagata Fiti i Hamilton, o Samisoni Tikoinasau Speight. Sa o latou lagona se uunaiga e faapea o Mr Speight o le tagata tonu lea e tatau ona tuuina iai le ata vali.

O le ata i luga o le tapoleni o faaalia ai le aao o le Alii, o Iesu Keriso, faatasi ai ma le faailoga o le fao i Lona alofilima, o se faamanatu o Lona puapuaga i luga o le satauro o Kalevaria, o aapa atu mo le aao o se isi tagata e fesoasoani ma siitia le isi. E aumaia ai i le mafaufau le taua o le auauna atu faatasi i le Faaola ma fanau uma a le Atua, e pei lava ona aoao mai e le Alii i Lona faapea mai, “Aua na faia e outou i le tasi o e aupito itiiti o o’u uso nei, o a’u lea ua outou faia i ai” (Mataio 25:40).

I le faatoa uma ai o le tuuina atu o le meaalofa, ma talatalanoa atu i le toatele o tagata e silafia ia Speight, na malamalama atili ai Vicky, Strantz ma Troy i le taua o le filifiliga o le mauaina le meaalofa.

O Samisoni Speight, sa avea ma tagata politiki i Fiti, sa auauna atu i tagata o lona atunuu a o ia umia se tofiga o le Kapeneta o se Minisita o le Malo. Talu ona siitia atu i Hamilton, sa matua tautua o ia ile faapotopotoga o tagata o Fiti ma sa faamatalaina o ia e i latou e iloa lelei o ia o se tagata e mulimuli ia Keriso e fiafia e auauna atu i isi. O ia upu alofa lava e tasi sa fofogaina foi e uiga i lona faletua.

O se uo, o Seniana Tabudravu, sa faapea mai, “O se meaalofa fetaui lenei mo Sam. E te le iloa le matua atoatoa o loo iai. O Sam ma lona faletua e pei uma lava o Iesu foi. La te auauna ia i matou i taimi uma lava. E na te fesoasoani atu i o matou tagata Fiti i taimi uma lava. E na te faaavanoaina le taimi e fesoasoani ai i aiga i meataumafa poo tupe poo soo se mea foi latou te manaomia. O lenei ata ua faaalia ai le aao o Iesu o aapa atu e fesoasoani i isi tagata. O le mea lena o loo faia e Sam. Na te taumafai e siitia foi i luga, i matou, tagata o Fiti.”