O sa Kidavaki Mai ki na iLavelave Oqo

E Dua na iVakaruru mai na Cava

iTaba mai na Getty Images

O sa bau dabe mada ena ruku ni dua na ivakaruru ena gauna ni cava ni uca? Ni sa lako sobu mai na wai, sa taubi kaukauwa ena dela ni vale ka rogolevu duadua. O na mamaca tiko vakacava ena lomaloma ni cagilaba? Na kaukauwa kei na Nona tiko na iVakabula sa vaka na ivakaruru oya.

Na ilavelave oqo ni Liaona e vakanamata ena sala e kauta mai kina o Jisu Karisito na vakacegu ena cava ni bula. Eda na sega ni levea rawa na vakatovolei kei na ibolebole. Ia me vaka ga nida dau tu mamaca ena ivakaruru mai na uca, ka da sureti Jisu Karisito me lako vata mai kei keda ena noda ilakolako, ena vukei keda o Koya meda kune vakacegu ena cava. Au sureti iko mo wilika na itukutuku nei Elder Dieter F. Uchtdorf “Au sa Solia vei Kemudou na Noqu Vakacegu” (tabana e 4). E vakavulica o koya, “O Jisu Karisito, o koya sa lewa na veigacagaca, e rawa talega ni vakamamadataka na noda icolacola” ka “Me kakua ni kau tani mai yaloda na vakacegu, kevaka sara mada ga eda na rarawa, lolosi, ka waraka na Turaga.”

Au sa sotava talega na “cava” ena noqu bula. Na veivakatovolei oqo sa vakavulica vei au ni o Jisu Karisito sa ivurevure tudei duadua ga ni veivuke kei na vakacegu. Niu wasea tiko ena noqu itukutuku “Na Kaukauwa me Da Laveta Cake” (tabana e 40), sa rawa vua na iVakabula ka na lako vata kei keda ena noda ilakolako i vale. Sa tiko vata kei keda o Koya ni da waraka tiko na veivakalougatataki sa yalataki tu. Ka sa sega vakadua ni bera o Koya me laveti keda cake. E lomani iko o Koya. Sa noqu masu ni ko ni na vakatarai Koya me nomu ivakaruru ka vanua taqomaki se cava ga o ni sotava tiko.

Ena loloma,

Bonnie H. Cordon

Peresitedi Raraba ni Goneyalewa