iYaloyalo ni Vakabauta

O sa Dau Kila Tu Ga

Mai vei José G. Franco, Utah, Amerika

Au sa mai ciqoma e dua na ivakadinadina ni kosipeli vakalesuimai, ia se vo tu ga e 10 na vula ena noqu konitaraki ni noqu veiqaravi tiko ena dua tale na lotu.

iTaba mai vei Leslie Nilsson

Niu se qai yabaki ciwa, a mosi kaukauwa sara na batiqu. Sa sega ni taqei rawa na mosi, ia sa sega na ilavo me keitou gole vei dauveicavubati. Ena gauna o ya, au a tiko vata kei buqu agilosi mai Mexico.

Ena tonawanawa ni matana, a qai tarogi au, “O vakabauti Jisu beka ka rawa ni vukei iko o Koya?”

Au tukuna vua niu vakabauta. A kerei au o koya meu gole ki na rumu ka tarava, tekiduru, ka masulaka e dua na cakamana. Au a sovaraka na yaloqu ena masu, ia a sega ni yaco e dua na ka. Ena noqu rarawa, au a vakaukauwataka na galegalequ ka cabora na ikarua ni masu. Sega ni dede sa yali na mosi! Niu cici yani meu laki tukuna vei buqu, au raica ni a tekiduru tiko, ka vakatakekere vua na Kalou me vukea na makubuna tagane lailai. Au sega vakadua ni guilecava na gauna oya, kau sa vakavinavinaka vei buqu.

Eso tale na veika vakayalo a qai muri mai.

Niu sa yabaki 14, au a toki ki Texas, Amerika, meu laki tomani rau na noqu itubutubu kei na taciqu. Au a kunea e dua na lotu e kea ka tekivu soqoni kina vakawasoma. Ena vuku ni veika au sotava kei na Kalou, au vinakata meu wasea na Yacana kei na kosipeli vei ira kece era na rogoci au. Niu se qai yabaki 15, au a lewena na koronivuli ni veiqaravi meu dua na italatala. Ena rua na yabaki, au dau tiko ena veikalasi ni iVolatabu ni bera na vuli, ni oti na vuli, kei na mua ni macawa.

Ena dua na mataka ena koronivuli torocake, au rogoca na rorogo ena nodra rumu ni loka na gonetagane. “O iko Momani” a kaila mai e dua. Au se bera mada vakadua ni rogoca na vosa oya, ia e rogorogo vaka e dua na veivakamaduataki.

E muri au qai kila ni o koya e kailavaki tu o ya na noqu itokani vinaka o Derek.

“Vosota ni o sa kacivi ena Momani,” au a kaya.

A matadredredre o Derek ka taroga, “O sega beka ni kila se cava na Momani, se cava?”

A tukuna vei au o koya ni yacabuli vei ira na lewe ni Lotu i Jisu Karisito ni Yalododonu Edaidai.

“Io, o iko beka e dua na lotu Vakarisito?” Au a taroga.

Ena nona kaya io, au marau niu kila ni keirau wasea na vakabauti Jisu Karisito.

“Ko sa taroga li vua na Kalou?”

“O cei o ira na Momani oqo,” au a vakasamataka, “kei na cava era vakabauta?”

Au a gole ki na initaneti meu kila. Ni oti e vica na miniti, au nanuma sara ni o noqu itokani e sega ni Lotu Vakarisito, ka na lako sara ki eli. Koya gona, au sa tekivu sara meu sa na vakabulai koya.

Ena rua na yabaki ka tarava, au a wilika na ivola yadua au rawa ni kunea baleta na Lotu, oka kina na iVola i Momani taucoko—vakarua. Au a sotavi Derek talega kei rau na daukaulotu tudei meu tovolea meu vukei iratou.

Niu sa yabaki 17, au a taurivola mai na koronivuli ni cakalotu, tabaki meu italatala, ka yaco me italatala ni dua na ivavakoso lailai e Texas. Ni oti e rua na vula na noqu tabaki, au tiko tale ena dua na veivosaki kei rau na daukaulotu.

E dua vei rau a taroga, “O sa wilika na iVola i Momani, ka o sa taura na lesoni kece sara keirau sa solia, ia o sa taroga beka vua na Kalou kevaka e dina na neirau itukutuku? O na kila e dua na kena isau mai Vua, se vavei?”

“Io,” au a sauma yani ena qaqa.

“Na sala au raica eke, ni o sa na qaqa e yasana ruarua vei iko,” a sauma na daukaulotu. “Kevaka o taroga vua na Kalou kevaka e dina na nomu itokani ka kaya na Kalou sega, o sa qai rawata na ilesilesi o a tekivuna kina na ilakolako oqo. Ia kevaka e kaya o Koya ni dina na neirau itukutuku, qai vakasamataka na levu ni ka o rawa ni rawata.”

Au sega mada ni bau vakasamataka vaka oya. Ena bogi oya au a tekiduru ena noqu rumu ni oti noqu wilika na Moronai 10:3–5. Na noqu isaunitaro mai vua na Kalou e rawarawa ga ia e ka kaukauwa. Ena domo malua, lailai, a sauma mai o Koya: “O sa dau kila tu ga.”

E Dua na iWase Vou ena Noqu Bula Vakatisaipeli

Ia oqo sa tiko vei au e dua na ivakadinadina ni kosipeli vakalesuimai, sa qai vakacava na noqu cakalotu? Se vo tu e 10 na vula ena noqu konitaraki vaka-italatala. Ni oti e vuqa na masu kei na veivakasalataki kei na Kalou, au sa lewa meu vakacavara na noqu veiqaravi. Ena 10 na vula ka tarava, au a tomana tikoga na noqu wasea na dina vakaivolanikalou ni iVola Tabu, ia ena gauna veiganiti eso au a vakuria ena rai ni kosipeli vakalesui mai. Era sa semati ira na tamata ki na dina oqori, ka ra tubu cake na noqu qele ni sipi lalai mai na 20 ki na volekata na 150.

Niu sa mai vakacavara na noqu konitaraki, a soli vei au e dua na itutu tudei, ia au sa kila tu ni sa kena gauna meu papitaiso ki na Lotu. Sa kena gauna meu tekivutaka e dua na iwase vou ena noqu ilakolako vakatisaipeli.

Niu tukuna vei ira na lewe ni noqu matavuvale, eratou a sega ni marautaka—taumada. Ia ni oti e tolu na vula na noqu lewena na Lotu, au a papitaisotaki tinaqu kei na rua na taciqu. Niu veiqaravi oti vakadaukaulotu tudei ena Tabana ni Kaulotu na Oklahoma Oklahoma City, au a papitaisotaki ganequ gone.

Kevaka e dua e taroga se cava na vuna au veisautaka kina na noqu lotu, au dau sauma ga, “Au a sega ni veisautaka na noqu lotu—au se lotu Vakarisito yalodina tikoga. Ia, au a vaqaqacotaka ga na noqu veiwekani kei na iVakabula ena noqu sa yaco meu lewenilotu papitaisotaki ena Nona Lotu—Na Lotu i Jisu Karisito ni Yalododonu Edaidai. Au sa kilai Koya vakavinaka cake ena loloma ena gauna oqo mai na kena e liu ena vuku ga ni Vakalesuimai ni kosipeli, na iVola i Momani, ira na parofita ni gauna oqo, kei na veicakacaka tabu vakalotu ni veivakabulai kei na bula vakacerecerei sa vakarautaki tu ena valetabu.”

Nikua sa noqu na madigi meu cakacaka vakaqasenivuli tudei ni semineri. Au sa solia tikoga na noqu bula vei Jisu Karisito kei na Nona kosipeli. Kau sa tukuna tikoga vei ira na tamata era na rogoca na “itukutuku vinaka mo dou reki vakalevu kina” (Luke 2:10).