“Ni sa Butobuto na Noqu Vuravura, au a Vuki vei Karisito,” Liaona, Maji 2023.
iTabagone Qase Cake
Ni sa Buto na Noqu Vuravura, Au a Vuki vei Karisito
Ni sa yaco wavoliti au tu e vuqa na ka butobuto, au sega ni kila na kena ibalebale me dua na yavu vei Karisito.
iTaba mai na Getty Images, matataka na dauvakaraitaki
Ena dua na itukutuku ni koniferedi raraba se qai oti toka ga oqo, a vosa kina o Peresitedi Henry B. Eyring, na iKarua ni Daunivakasala ena Mataveiliutaki Taumada me baleta na gauna ni veivakararawataki e vuravura: “A volavola kina o Paula na iApositolo vei Timoci, ‘Sa kila talega oqo, ni na yaco mai na iotioti ni gauna ni veivakararawataki’ (2 Timoci 3:1).
“E sa na dredre vakalevu kina, sega ni rawarawa, me dokai na veiyalayalati sa dodonu meda cakava ka maroroya me bulataki kina na kosipeli i Jisu Karisito.”1
Niu rogoca na veivosa oqo, au sa lomatarotaro saraga. Au sa sotava tiko na veibolebole e noqu vale mai Venezuela. Ia na taro vakaoqo, “Meu na yalodei tiko vakacava ni sa butobuto sara ko vuravura?” kei na “Meu na rai rawa vakacava ki na dua na veisiga ni mataka ramase ena gauna oqo?” a tu e lomaqu ena gauna oya.
Ia a qai solia o Peresitedi Eyring na kena iwali. A cavuta na Ilamani 5:12, ka tukuna me baleta na tarai cake ni noda yavu “ena uluvatu ni noda iVakabula, sai Koya na Karisito.”
Au dau vakabauta ni dina na ivolanikalou oqo, ia na tarai cake ni noqu yavu ena iVakabula e vaka me rawarawa cake na kena tukuni mai na kena caka. Ia, niu sa toro voleka ga vei Karisito, au sa raica ni veika kece e vinaka vei iko ni sa dei tu na nomu vakabauti Koya (raica na Vunau kei na Veiyalayalati Vunau kei na Veiyalayalati 90:24).
Vakilai na Galili
Ena vica na vula sa oti, au a ciqoma e dua na itukutuku veivakayalolailaitaki mai na noqu matavuvale. Sa vaka me kakasurasura e mataqu na noqu vuravura. Au vakila na nunu, veilecayaki, kau lomaleqa vakalevu kau sa tauvimate!
Au sega ni kila na vuna keitou sotava tiko kina na dredre vakaoqori niu saga tiko meu yalodina. Au vakananuma keu cakava e dua na cala. Sa malumu mai na siga ni mataka, kau vakila ni rau sa yawaki au na Tamada Vakalomalagi kei Jisu Karisito.
Ena lomadonu ni noqu rarawa, au a vosa vua e dua na itokani vinaka. A tukuna o koya vei au e dua na ka au na sega vakadua ni guilecava: “Au vakabauta ni ituvaki oqo e sa dua na madigi Vinaka mo vakasamataka vakatitobu na nomu veiwekani kei na Turaga. Se cava ga e yaco, sa vakatau vei iko mo gole Vua mo vukei. Kevaka o vakayacora vakakina, ena solia vei iko o Koya na loloma kei na veivuke o gadreva ena gauna sara ga oqo.”
Na veivosa oqori e veisautaka na noqu rai. Au a cudru ka mosi ka veilecayaki ena ituvaki ni noqu bula, ia e tiko na noqu digidigi. Se cava ga eda lako curuma tiko, na veika eda rerevaka tiko, se na veika dredre cava eda sotava tiko, o Jisu Karisito e dau tikoga e yasada. Sa noda na digidigi meda gole yani Vua ena vakabauta, sega ni yawa mai Vua, ena veigauna dredre.
Oqori na sala eda vaqaqacotaka kina na noda yavu ni vakabauti Koya ka sotava na dredre e vuravura. Ena noda digitaki Koya.
Me vaka a vakatavulica o Elder D. Todd Christofferson ena Kuoramu ni iApositolo Le Tinikarua: “Ena loma ni bukawaqa ni dausava koula oqo, ka sega ni cudruva na Kalou, toro voleka vua na Kalou. Dou masuta na Tamada ena yaca ni Luvena. Lako vata kei Rau ena Yalo, ena veisiga yadua. Solia Vei Rau e dua na gauna me vakaraitaka na Nodrau yalodina vei iko. Yaco vakaidina mo kilai Rau ka kilai iko.2
A waraki au tiko o Karisito meu gole Vua me vukei. E sega ni kena ibalebale o ya ni na vakayalia se vakavinakataka vakasauri na veika kece ena noqu bula kei na matavuvale, ia a vukei au o Koya meu vinaka cake, kunea na reki, ka yaco me savasava cake.
Ni toso na gauna, niu vakasaqara na iVakabula ena masu, vuli ivolanikalou, kei na vakabauta, a vukei au o Koya meu vosoti ira na lewe ni noqu matavuvale ka sureta tale na reki ki na noqu bula, dina ga ni so na bolebole era se sega ni wali rawa.
Na Yalayala ni Veitaqomaki
Oqo e sa rui veivakararawataki ena iotioti ni gauna. Eda rogoca na ivalu kei na irogorogo ni ivalu, na matedewa, na leqa vakatamata—kau vakadeitaka ni na yaco na gauna ni dredre e liu. Ia, na tarai cake ena vatu sai Jisu Karisito ka vakararavi Vua ena dau vakarautaka vei keda na vakacegu kei na reki, se cava ga na ka eda sotava tiko. Me vaka e vakatavulica o Peresitedi Eyring, “Kivei keda o ni kauwataki keda tiko vata kei ira eda lomana, sa tiko na vakanuinui ena yalayala sa cakava tu na Kalou ena vanua ni tataqomaki ni cava sa tu mai liu.”3
Sa dua dina na yalayala kaukauwa ka totoka. Kau sa raica ni sa vakataucokotaki na yalayala oqori ena noqu bula. Au kila ni oqo na kosipeli vakalesui mai i Jisu Karisito ka sai Koya na ivurevure ni veivakalougatataki kecega. Sai Koya na rarama, sai Koya na noda iVakabula, ka da sa Nona sipi. Me da digitaki Koya ka digitaka na vakabauta.
Na dauvolaivola e vakaitikotiko mai Zulia, Venezuela.