Veiqaravi ena iNuinui kei na Vakabauta

Ni da maroroya na noda veiyalayalati ena vakabauta, sa rawa ni da veivuke ena nodra liutaki eso ki na iVurevure ni vakanuinui.

e tara na beleni isulu ni iVakabula e dua na marama.

E Dua na iVakaraitaki ni iNuinui kei na Vakabauta

Ena Kosipeli i Marika, eda wilika kina e dua na italanoa veilauti me baleta e “dua na yalewa sa turidrabalavu ka yabaki tinikarua.” Eda vulica kina ni “sa levu na ka sa vosota vei ira na vuniwai era le vuqa, a sa vakayalia kina na nona iyau kecega, a sa sega ni bula, ia sa levu cake tiko na nona mate” (Marika 5:25–26).

Na yabaki tinikarua oqo sa gauna balavu sara ni vakararawataki. Na veika kece me vakayagataki sa iyau levu sara. Ka sa ca vakalevu cake ga o koya. Kevaka e dua e tu vua na dodonu me vakila ni sega nona inuinui, sai koya na marama oqo.

Ia, “ni sa rogoca na itukutuku kei Jisu, sa lako vata mai [o koya] kei ira na lewe vuqa [ki vua] ki dakuna, ka tara na nona isulu,” baleta ni sa vakabauta, “Kevaka kau na tara ga na nona isulu, au na vakabulai.”

E tukuna o Marika ena vuku ni nona vakabauta, “a sa mudu vakasauri nai davedave ni nona dra; a sa kila e na yagona sa bula mai na mate ca ko ya” (Marika 5:27–29).

A saumi na nona inuinui kei na nona vakabauti Jisu na marama oqo ena dua na veivakalougatataki. “A sa kaya vua ko koya, Na luvequ yalewa, sa vakabulai iko na nomu vakabauta; mo lako ena vakacegu, ka mo bula mai na nomu mate ca” (Marika 5:34).

Ena veibolebole cava ga, se cava ga na kena levu se na balavu ni gauna, e gadrevi vakalevu sara na inuinui. Na rere kei na yaluma e rawa ni vakaparalasetaki keda. Ia na inuinui kei na vakabauti Jisu Karisito ena sureta na Nona kaukauwa kei na veivakalougatataki ki na noda bula.

Vakayacori ni iNuinui kei na Vakabauta ena Veiqaravi

Oi keda na baraca kei na sisita dauveiqaravi, ka da na gadreva me da kaciva na inuinui kei na vakabauta vata ga oya. Na veiqaravi e rawa ruarua ni veivakacegui ka veibolei. Ni dua eda via veivuke e vaka me sega ni vinakata, ena rawarawa sara me yali na noda inuinui. E rairai o sotava tiko na ituvaki oqo kei na dua na lewe ni matavuvale, dua na itokani, se dua o sa lesi tiko mo veivuke vua ena gauna oqo. E rairai, me vaka na marama a tunidrabalavu tu, na Turaga duadua ga e kila na levu ni gauna kei na sasaga o a saga tiko mo kunea e dua na ka e veivuke. Ia me vaka na marama oya, kevaka eda kunea na inuinui me da tomana tiko noda dolele yani ena vakabauta, na kaukauwa ni iVakabula e rawa ni vakayaco veisau.

Ena so na gauna na bolebole sai koya na nodra qaravi o ira era sasaga bula tiko me ra vakila na inuinui me rawa ni ra cakacakataka na vakabauta. E tiko eso, me vakataki koya na marama e Marika, e rawa ni ra sotava na tauvimate bibi, dredre vakailavo, se vica na veivakatovolei dredre veiuabaleti. Na nodra kila ni ra sega ni tiko duadua ena nodra sasaga e rawa ni ivurevure kaukauwa ni inuinui. E rawa ni da vukei ira me ra kunea na inuinui oqo ni da vakaraitaka noda lomasoli me da colata na nodra icolacola, tagi vata kei ira, vakacegui ira, ka tu ka ivakadinadina ni Kalou (raica na Mosaia 18:9–10).¹

Vakatorocaketaki ni iNuinui kei na Vakabauta

E rawa vakacava ni da tara cake na ivakarau va-Karisito ni inuinui kei na vakabauta? Oqo e vica na vakasama:

E vakavulica o Elder Dieter F. Uchtdorf ena Kuoramu ni iApositolo Le Tinikarua ni inuinui sa vakabauta tiko ni na vakayacora o Jisu Karisito na Nona yalayala vei iko.² Baleta ni “inuinui sa isolisoli ni Yalo Tabu [raica na Moronai 8:26],”³ oqo e dua na ka eda rawa ni masulaka (raica na Vunau kei na Veiyalayalati 46:7–9).
E vakatavulica o Russell M. Nelson ni vakalevutaki na vakabauta e dau taura na cakacaka. A wasea na sala meda vakalevutaka kina na noda vakabauta ena vuli ivolanikalou, digitaka meda vakadinata, cakacaka ena vakabauta, vakaivotavota ena cakacaka tabu vakalotu ena kilikili, ka kerea na veivuke nei Tamada Vakalomalagi.⁴