“Veivuke kei na iNuinui mai na Koniferedi Raraba,” Liaona, Maji 2023.
Domodra na Yalododonu Edaidai
Veivuke kei na iNuinui mai na Koniferedi Raraba
Au a sega ni namaka meu rogoca e dua na vosa taucoko ni koniferedi raraba me baleta sara ga na ka au sotava tiko.
iTaba nei dauvolaivola kei na nona matavuvale mai vei Cody Bell
Ni oti na sucu ni imatai ni luvequ, au a sotava na tadoka ni tinani gone. Sa dua dina na gauna vakasakiti ki na noqu bula baleta ni a tiko e dua na luvequ tagane, ia au a sega ni rawa ni vakila taucoko na reki niu va luveni lailai baleta niu sotava na tadoka ni tinani gone.
Ena gauna ni veivakatovolei oqo, au a masu vakalevu vua na Tamada Vakalomalagi. Au kerei Koya me vukei au meu lako curuma na veivakatovolei dredre oqo. Ni sa yaco tiko mai na koniferedi raraba ena gauna oya, au masulaka talega meu kune vakacegu mai na nodra vosa na iliuliu ni Lotu.
Niu rogoca na vosa ena imatai ni soqoni ni koniferedi raraba, au sa tekivu vakila na vakacegu. Ia, ena ikarua ni soqoni, a vosa o Elder Jeffrey R. Holland ena Kuoramu ni iApositolo Le Tinikarua me baleta na tadoka ni lomaocaoca. E kaya o koya ni lomaocaoca e rawa ni vakavuna meda vakila “vaka na waqa kavoro”1 (Same 31:12). Au a sega ni namaka meu rogoca taucoko na vosa me baleta sara ga na ka au sotava tiko.
E dua na gauna talei vei au. A vukei au na vosa meu kila ni lomani au na Tamada Vakalomalagi ka kilai au tiko o Koya. Sa kila vakavinaka tu o Koya na veika sa yaco tiko vei au. E vinakata o Koya me vukei au ka solia vei au na inuinui. A vakayacora oya ena vosa nei Elder Holland.