“Au sa Solia vei Kemudou na Noqu Vakacegu,” Liaona, Maji 2023.
“Au sa Solia Vei Kemudou na Noqu Vakacegu”
Na vosa vata ga a cavuta o Jisu ki na Wasawasa o Kalili ena bogi ni cava oya, e kaya vei keda ena gauna ni cava ni noda bula: “Me cegu, mo maravu mai.”
iTaba mai na Getty Images
Na noqu matavuvale vata kei au, na vulaibatabata ni 1944 a gauna ni rere kei na veilecayaki. Ni tu vakayawa sara o tamaqu ena ra ni vanua, a saga dredre sara o tinaqu me vakania ka me ratou katakata tiko na luvena ni sa yaco na veivaluvaluti ena neitou itikotiko e Czechoslovakia.
Ena veisiga yadua sa toro voleka sara mai na veika rerevaki. Kena itinitini, a navuca o tinaqu me dro ki na nodrau vale na nona itubutubu ena tokalau kei Jamani. Ia, a mani saga me kauti keitou kece ena dua na sitimanivanua ni tamata era dro tiko me gole ki na ra ni vanua. Na veika sa kacabote voleka, na mata ni lomaleqa, kei na kete lala a veivakananumi ki na tamata kece ena sitimanivanua ni keimami sa lakova tiko e dua na vanua ni ivalu.
Ena dua na bogi ni sa kele na sitimanivanua me vakavodo iyaya, a kusa yani o tinaqu me laki vaqara kakana. Ni lesu mai, a kurabui vakalevu, ni sitimanivanua a kauti keitou tiko na gone sa yali!
Ena lomaleqa levu, a vuki vua na Kalou ena masu nuiqawaqawa ka tekivu vaqaqara ena siteseni ni sitimanivanua butobuto. A cici yani ena sala ki na dua tale mai na sitimanivanua ki na dua tale. E kila o koya ni kevaka sa biubiu na nona sitimanivanua ni bera ni raica, sa na rairai sega tale ni raici keitou vakadua.
Cava ena Noda Bula
Ena gauna ni nona veiqaravi eke na iVakabula, era a vulica na Nona tisaipeli ni rawa ni vakamaravutaka o Koya na cava ena noda bula. Ena dua na yakavi, ni oti e dua na siga taucoko ni veivakavulici e matasawa, a vakatura na Turaga me ra “lako yani ki tai kadua” ni Wasawasa o Kaleli (Marika 4:35).
Ni ratou sa biubiu oti, a raica o Jisu e dua na tikina ena waqa me vakacegu kina ka mani moce sara. Sega ni dede sa buto mai na lomalagi, “a sa tubu e dua na cagi levu sara, a sa seva na waqa na biau, a sa qai luvu kina” (raica na Marika 4:37–38).
Eda sega ni kila na balavu ni nodratou sasaga na tisaipeli me vude tikoga na waqa, ia sa yaco me ratou sa sega tale ni wawa. Era sa rere, era sa kailavaka yani, “Vakavuvuli, ko sa wele beka ga, ni da sa mate?” (Marika 4:38).
Eda sotava kece na vakasauri mai ni cava. Ena noda bula oqo ni veivakatovolei kei na veivakasagai, eda na vakila beka na lomaocaoca, yalolailai, kei na yalorarawa. Sa kavoro na yaloda ena vukuda sa vakakina vei ira eda lomana. Eda lomaleqa ka rere ka so na gauna e yali noda inuinui. Ena veigauna vakaoqori, e rawa talega ni da tagi, “Vakavuvuli, ko sa wele beka ga, niu sa mate?”
Niu se itabagone kina e dua na noqu serenilotu taleitaki na “Jisu sa Laba na Cagi.”1 Au rawa ni raitayalotaki au ena loma ni waqa ni “ua [a] levu mai.” E vakaoqo na tikina bibi ka totoka duadua ena serenilotu: “I cagi kaukauwa ka tu edai Ruru mai.” Sa qai yaco mai na itukutuku bibi: “Sa cata ka rawa na waqa ga, Ni moce ko ko ya ka dau lewa.”
Kevaka eda kidavaki Jisu Karisito, na Ravouvou ni Sautu, ki na noda waqa, e sega ni dodonu meda rere. Eda na kila ni rawa ni da kune vakacegu ena loma ni cava e tovuki tu e lomada ka voliti keda tu. Ni oti nodratou kaci veivuke yani na Nona tisaipeli, a “sa tucake [ko Jisu] sa kaya ki na wasawasa, Mo cegu, mo maravu mai. A sa ruru na cagi, a sa maravu levu mai” (Marika 4:39).
Na vosa vata ga a cavuta o Jisu ki na Wasawasa o Kalili ena bogi ni cava oya, e kaya vei keda ena gauna ni cava ni noda bula: “Mo cegu, mo maravu mai.”
“Au sa Sega ni Solia Vei Kemudou Me Vaka sa Solia ko Vuravura”
Eda na taroga vata kei ira na tisaipeli, “O cei beka oqo, ni sa talairawarawa vua na cagi kei na wasawasa?” (Marika 4:41).
O Jisu e dua na tamata e sega ni vaka e dua tale. Me vaka ni Luvena na Kalou, a kacivi o Koya me qarava e dua na ilesilesi ka sega tale ni dua e rawa ni cakava vakataucoko.
Ena Nona Veisorovaki, kei na sala eda na sega ni rawa ni kila taucoko, a taura vua na iVakabula “na mosi kei na veivakararawataki kei na veivakatovolei kecega” (Alama 7:11) kei “na bibi ni ca kecega vakayago.”2
E dina ga ni sega ni dinautaka na lewa dodonu, a sotava o Koya na “taucoko … gadrevi na lewa dodonu” (Alama 34:16). Ena vosa nei Peresitedi Boyd K. Packer (1924–2015), Peresitedi ni Kuoramu ni iApositolo Le Tinikarua, “E sega ni caka cala o Koya. Ia, a sotava kecega na vakilai ni cala, na yaluma na rarawa, na mosi kei na veivakacacani, na veimataqali veivakararawataki kecega ni vakasama, ni yalo, kei na yago e kila rawa na tamata—e a vakila kece o Koya.”3 Ka sa vakadrukai ira kece o Koya.
A parofisaitaka o Alama ni iVakabula “Ia ena mate ko koya, me tasereka kina na ivau ni mate sa vauci ira tu na nona tamata; ia sa ciqoma ko koya na nodra malumalumu, me vakasinaiti na lomana ena loloma cecere, me vaka na veika vakayago, me rawa kina ni vakila me vaka na veika vakayago na sala me vukei ira kina na nona tamata me vaka na nodra veimalumalumu” (Alama 7:12).
Mai na dua na edaumeni vakalou ka sucu mai ena veivakararawataki levu, mai na loloma ena vukuda, a sauma kina o Jisu Karisito na isau me vueti keda, me vaqaqacotaki keda, ka vakabulai keda. Ena Veisorovaki duadua ga eda na kunea kina na vakacegu eda vinakata ka gadreva ena bula oqo. E kaya na iVakabula, “Au sa solia vei kemudou na vakacegu, au sa solia vei kemudou na noqu vakacegu; au sa sega ni solia vei kemudou me vaka sa solia ko vuravura. Me kakua ni rarawa na yalomudou, se rere.” (Joni 14:27).
Na bula kei na ivakavuvuli i Jisu Karisito e solia vei keda na sala meda vakila kina na Nona vakacegu kevaka eda na gole Vua.
Na iRairai kei Karisito, mai vei Heinrich Hofmann
Sala ki na Vakacegu
O Jisu Karisito, o koya sa lewa na veigacagaca, e rawa talega ni vakamamadataka na noda icolacola. Sa tu vua na kaukauwa me vakabula na tamata yadua kei na veimatanitu. Sa vakaraitaka vei keda o Koya na sala ki na vakacegu dina, ni sai Koya na “Na Tui ni Sautu” (Aisea 9:6). Na vakacegu e solia na iVakabula e rawa ni veisautaka na bula kece vakatamata kevaka era vakatara na luve ni Kalou. Na Nona bula kei na nona ivakavuvuli e solia vei keda na sala me da vakila na Nona vakacegu kevaka eda na gole Vua.
“Mo vuli vei au,” a kaya o Koya, “ka muria na noqu vosa; mo bula ena yalomalua ni Yaloqu, ko na rawata kina na noqu vakacegu” (Vunau kei na Veiyalayalati 19:23).
Eda vuli mai Vua ni da laveta cake na yaloda ena masumasu, vulica na Nona bula kei na ivakavuvuli, ka “tudei … ena veivanua tabu,” oka kina na valetabu (Vunau kei na Veiyalayalati 87:8; raica talega na 45:32). Dau lakova wasoma na vale ni Turaga ena kena levu ga o rawata. Na valetabu e dua na idrodro veivakacegui mai na vei cava tubu cake tiko ni noda gauna oqo.
Na noqu itokani lomani o Peresitedi Thomas S. Monson (1927–2018) a vakavulica: “Ni da gole ki na [valetabu], ni da nanuma na veiyalayalati eda cakava kina, sa na rawa ni da vosota na veivakatovolei kece ka ulabaleta na veitemaki yadua. Na valetabu e vakarautaka na inaki ni noda bula. E kauta mai na vakacegu ki yaloda—sega ni vakacegu e vakarautaka na tamata ia na vakacegu a yalataka na Luve ni Kalou.”4
Eda rogoca na Nona vosa ni da muria na Nona ivakavuvuli ena ivolanikalou tabu kei ira na Nona parofita bula, vakatotomuria na Nona ivakaraitaki, ka lako mai ki na Nona Lotu, eda sa veitokani, vakavulici, ka susugi cake ena vosa vinaka ni Kalou.
Eda sa lako ena yalomalua ni Yalona ni da loloma me vaka na Nona loloma, veivosoti me vaka na Nona veivosoti, veivutuni, ka cakava na noda itikotiko me rawa ni da vakila kina na Yalona. Eda lako talega ena yalomalua ni Nona Yalotabu ni da vukei ira na tani, qarava ena reki na Kalou, ka segata me da yaco me “tisaipeli veivakacegui i Karisito” (Moronai 7:3).
Na veikalawa ni vakabauta kei na cakacaka oqo e veimuataki ki na buladodonu, vakalougatataki keda ena noda ilakolako ni bula vakatisaipeli, ka kauta mai vei keda na vakacegu kei na inaki tudei.
“Mo Dou na Rawata na Vakacegu ena Vukuqu”
Ena dua na bogi buto ena dua na siteseni ni sitimanivanua ena vuqa na yabaki sa oti, a sotava o tinaqu e dua na digidigi. E rawa ni dabe ka lolositaka na vakacalai ni nodra yali na luvena, se rawa ni biuta na nona vakabauta kei na inuinui me cakacakataki. Au vakavinavinakataka ni a uabaleta nona rere na nona vakabauta ka vakadruka na nona yaluma na nona inuinui.
Kena itinitini, ena dua na vanua yawa ni siteseni, a kunea o koya na neitou sitimanivanua. E kea, keitou sa mani duavata tale. Ena bogi oya, ena vuqa na cava ena siga kei na bogi ena yaco mai, na ivakaraitaki nei tinaqu me cakacakataki na vakabauta a tokoni keitou ena neitou vakanuinui ka cakacaka me rarama na veisiga ni mataka.
Nikua, e vuqa vei ira na luve ni Kalou era raica ni sa tokitaki talega na nodra sitimanivanua. Na nodra vakanuinui kei na tatadra me baleta na veisiga ni mataka sa kau tani ena ivalu, matedewa, kei na yali ni bula, cakacaka, madigi vakavuli, kei na daulomani. Era yalolailai, galili, ka vakuwai.
Kemuni na taciqu kei na ganequ, itokani lomani, eda bula tiko ena gauna vakadomobula. Era sa veilecayaki na veimatanitu, sa tau na veilewai ena vanua, ka sa kau tani mai vuravura na vakacegu (raica na Vunau kei na Veiyalayalati 1:35; 88:79). Ia me kakua ni kau tani mai yaloda na vakacegu, kevaka sara mada ga eda na vakararawataki, lolosi, ka waraka ga na Turaga.
Ena vukui Jisu Karisito kei na Nona Tucaketale, ena saumi mai na noda masu. Na gauna sa nona na Kalou, ia au vakadinadinataka ni noda gagadre dodonu ena yaco ena dua na siga ka na vakatau vei keda na veika kece eda vakayalia, vakarautaka meda vakayagataka na isolisoli vakalou ni veivutuni ka yalodina tikoga.5
Eda na vakabulai—vakayago ka vakayalo.
Eda na tu ena savasava ka tu vakalou ena mata ni idabedabe ni veilewai.
Eda na duavata tale kei ira na noda daulomani ena dua na tucake tale lagilagi.
Ia, meda sa vakacegui ka vakayaloqaqataki ni da vakararavi ki na yalayala ni iVakabula: “Dou na rawata na vakacegu ena vukuqu” (Joni 16:33).