Veivakalougatataki ni Matabete

Sa Tabaki Ira na iApositolo Le Tinikarua na Karisito

Na veivakalougatataki ni matabete e soli ena veivakauqeti vakayalo mai vua e dua na lewe ni Matabete i Melikiseteki. Na veivakalougatataki ni matabete e rawa kina vei ira kece na luve ni Kalou me ra ciqoma na Nona kaukauwa, veivakabulai, veivakacegui, kei na veituberi.

Na Matabete

Na matabete sa ikoya na kaukauwa kei na lewa ni Kalou. O ira na tagane bula kilikili e tu vei ira na Matabete i Melikiseteki era cakacaka ena yaca i Jisu Karisito ena nodra solia na veivakalougatataki ni matabete. Ni ra solia na veivakalougatataki oqo, era na muria na ivakaraitaki ni iVakabula ena nona vakalougatataki ira na tamata.

iTaba mai vei David Winters

Na Sala ena Soli Kina na Veivakalougatataki

Na veivakalougatataki ni matabete e soli ena veitabaki ni liga. E dua na lewe ni Matabete i Melikiseteki ena tabaka e ligana na ului koya me ciqoma na veivakalougatataki. Ena qai solia na veivakalougatataki ena veidusimaki ni Yalo. O ira era solia na veivakalougatataki kei ira era ciqoma ena vakabauta na Kalou ka nuitaka na Lomana kei na kena gauna.

Vakatokayacataki kei na Vakalougatataki ni Gonelalai

Ni sa sucu oti e dua na gone, e dua na lewe ni matabete ena vakatoka vei gone e dua na yacana kei na dua na veivakalougatataki (raica na Vunau kei na Veiyalayalati 20:70). Oqo e dau yaco ena dua na soqoni ni lolo kei na soli ivakadinadina. Taumada na gone oqo ena vakatokai vua e dua na yaca. Oti me qai solia o lewe ni matabete vua na gone e dua na veivakalougatataki.

Na Veivakalougatataki vei ira na Tauvimate

E rawa ni ra veivakalougatataki na lewe ni Matabete i Melikiseteki vei ira na tamata era tauvimate. Na veivakalougatataki vakaoqo e rua na kena iwasewase: na veilumuti ena waiwai kei na kena vauci na veilumuti. iMatai, ena vakaturuma e dua na lewe ni matabete na waiwai ni olive ka sa vakatabui, se vakalougatataki, ena uluna na tamata oya ka cabora e dua na masu lekaleka. Me qai vauca e dua tale na lewe ni matabete na veilumuti ka solia vua na veivakalougatataki o ya me vaka na veidusimaki ni Yalo Tabu.

Veivakalougatataki ni Veivakacegui kei na iVakasala

E rawa vei ira na lewe ni Matabete i Melikiseteki me ra solia na veivakalougatataki ni veivakacegui kei na veivakasalataki vei ira na lewe ni matavuvale kei ira tale eso era kerea. Na tama e taura tu na Matabete i Melikiseteki e rawa ni solia na veivakalougatataki vakatama vei ira na luvena. Oqo ena rawa ni veivuke sara vakalevu ni ra sotava tiko na gone na veibolebole duatani eso.

Vakatikori ni Lewenilotu me ra Veiqaravi ena Veikacivi Eso

Ni ra ciqoma na lewe ni Lotu na veikacivi, ena soli vei ira e dua na veivakalougatataki ni ra sa vakatikori me ra veiqaravi. Ena vakalougatataki ira e dua na iliuliu ni matabete ena lewa me ra cakacaka ena veikacivi oqo. Na iliuliu ni matabete e solia talega vei ira e dua na veivakalougatataki me vukei ira ena nodra veiqaravi.

iTaba mai vei Shauna Stephenson

Veivakalougatataki Vakapeteriaki

Sa rawa vei ira yadua na lewe ni Lotu bula kilikili me ra ciqoma na nodra veivakalougatataki vakapeteriaki. Na veivakalougatataki oqo e solia na ivakasala ki na tamata yadua mai vua na Turaga. E rawa ni na veidusimaki ka veivakacegui ena bula taucoko ni dua na tamata. E tukuna talega na kawa ni tamata oqo ena mataqali i Isireli. Na peteriaki duadua ga sa tabaki ena rawa ni solia na mataqali veivakalougatataki vakaoqo.