“Ko ha Ungaʻanga mei he Matangí,” Liahona, Māʻasi 2023.
ʻOku Talitali Lelei Kimoutolu ki he Makasini ko ʻEní
Ko ha Ungaʻanga mei he Matangí
Tā mei he Getty Images
Kuó ke unga nai ki ha meʻa ʻi haʻo tangutu lolotonga ha ʻuha lōvai? ʻI he taimi ʻoku haʻahaʻaki hifo ai e ʻuhá, ʻoku patopatō ia ʻi he ʻató ʻo pulia atu ai e ngaahi ongo kehé. Te ke lava fēfē nai ke kei mātuʻu lotolotonga e matangí? ʻOku hangē ʻa e mālohi hotau Fakamoʻuí mo ʻEne ʻi aí ko e ungaʻanga ko iá.
ʻOku nofotaha ʻa e makasini ko ʻeni ʻo e Liahoná ʻi he founga hono ʻomi ʻe Sīsū Kalaisi ʻa e nongá ʻi he ngaahi matangi ʻo e moʻuí. He ʻikai ke tau lava ʻo kalo mei he ngaahi faingataʻá mo e ngaahi palopalemá. Kae hangē ko hono fakamalumalu kitautolu ʻe he palepalé ke tau kei mātuʻu ʻi he ʻuhá, ʻoku pehē mo e taimi ʻoku tau fakaafeʻi ai ʻa Sīsū Kalaisi ke kaungā fononga mo kitautolú, ʻokú Ne tokoni ke tau maʻu ha nonga ʻi he matangi mālohí. ʻOku ou fakaafeʻi kimoutolu ke mou lau e fakamatala ʻa Tieta F. ʻUkitofá “Ko ʻEku Melinó ʻOku Ou Foaki Kiate Kimoutolú” (peesi 4). ʻOkú ne akoʻi, “ʻE lava foki ʻe Sīsū Kalaisi, ʻa ia ʻokú Ne puleʻi ʻa e ngaahi ʻelemēnití, ʻo fakamaʻamaʻa ʻetau ngaahi kavengá” pea “ʻOku ʻikai fiemaʻu ke toʻo ʻa e nongá mei hotau lotó, neongo kapau kuo pau ke tau mamahi, loto mamahi, mo tatali ki he ʻEikí.”
Kuó u aʻusia foki ha “ngaahi matangi mālohi” ʻi heʻeku moʻuí. Kuo akoʻi au ʻe he ngaahi faingataʻá ni ko Sīsū Kalaisi pē ʻa e maʻuʻanga tokoni mo e nonga ʻoku tuʻuloá. Hangē ko ʻeku vahevahe ʻi heʻeku fakamatala “Ko e Mālohi ke Fokotuʻu Haké” (peesi 40), ʻe lava pea ʻe [kau fakataha] mo kitautolu hotau Fakamoʻuí ʻi heʻetau fononga ki ʻapí. ʻOkú Ne ʻiate kitautolu ʻi heʻetau tatali ki he ngaahi tāpuaki kuo talaʻofa maí. Pea ʻoku ʻikai teitei tōmui kiate Ia ke Ne tokoniʻi kitautolu. ʻOkú Ne ʻofa ʻiate koe. ʻOku ou lotua ke ke fakaʻatā Ia ke hoko ko ho ungaʻanga mo e maluʻangá neongo pe ko e hā ʻokú ke fehangahangai mo iá.
ʻOfa atu,
Bonnie H. Cordon
Palesiteni Lahi ʻo e Kau Finemuí