“Ngaahi Tāpuaki ʻo e Lakanga Fakataulaʻeikí,” Liahona, Māʻasi 2023.
Ngaahi Tefitoʻi Meʻa Mahuʻinga ʻo e Ongoongoleleí
Ngaahi Tāpuaki ʻo e Lakanga Fakataulaʻeikí
Ko e Fakanofo ʻe Kalaisi e Kau ʻAposetolo ʻe Toko Hongofulu Mā Uá, tā fakatātaaʻi ʻe Harry Anderson
ʻOku foaki ha tāpuaki ʻo e lakanga fakataulaʻeikí ʻo fakafou ʻi he ueʻi fakalaumālié ʻe ha taha ʻokú ne maʻu ʻa e Lakanga Taulaʻeiki Faka-Melekisētekí. ʻOku fakaʻatā ʻe he ngaahi tāpuaki ʻo e lakanga fakataulaʻeikí ke maʻu ʻe he fānau kotoa ʻa e ʻOtuá ʻa Hono mālohí, fakamoʻuí, fakafiemālié, mo e fakahinohinó.
Ko e Lakanga Fakataulaʻeikí
Ko e lakanga fakataulaʻeikí ko e mālohi mo e mafai ia ʻo e ʻOtuá. ʻOku ngāue ʻa e houʻeiki tangata moʻui taau ʻoku nau maʻu ʻa e Lakanga Taulaʻeiki Faka-Melekisētekí ʻi he huafa ʻo Sīsū Kalaisí, ʻi he taimi ʻoku nau foaki ai ʻa e ngaahi tāpuaki ʻo e lakanga fakataulaʻeikí. ʻI he taimi ʻoku nau foaki ai ʻa e ngaahi tāpuaki ko ʻení, ʻoku nau muimui ki he sīpinga ʻa e Fakamoʻuí ʻi hono tāpuakiʻi ʻo e niʻihi kehé.
Faitaaʻi ʻe David Winters
Founga ʻOku Foaki Ai ʻa e Ngaahi Tāpuakí
ʻOku foaki ʻa e ngaahi tāpuaki ʻo e lakanga fakataulaʻeikí ʻaki hono hilifaki ʻo e ongo nimá. ʻE hilifaki ʻe ha taha maʻu Lakanga Taulaʻeiki Faka-Melekisēteki hono ongo nimá ʻi he ʻulu ʻo e tokotaha ʻokú ne maʻu ʻa e tāpuakí. Peá ne toki foaki ha tāpuaki ʻo fakatatau mo e fakahinohino ʻa e Laumālié. Ko kinautolu ʻoku nau foaki ʻa e ngaahi tāpuakí pea mo kinautolu ʻoku nau maʻú, ʻoku nau tui ki he ʻOtuá mo falala ki Hono finangaló mo ʻEne taimí.
Ko e Fakahingoa mo e Tāpuakiʻi ʻo e Fānaú
Hili hono fanauʻi ʻo ha kiʻi tamasiʻi/taʻahine, ʻe foaki ʻe ha taha maʻu lakanga fakataulaʻeiki ha hingoa mo ha tāpuaki kiate ia (vakai, Tokāteline mo e Ngaahi Fuakava 20:70). ʻOku faʻa hoko ʻeni ʻi ha houalotu ʻaukai mo e fakamoʻoni. ʻOku ʻuluaki foaki ki he fānaú ha hingoa. Pea toki foaki leva ʻe he taha maʻu lakanga fakataulaʻeikí ha tāpuaki ki he kiʻi tamasiʻí.
Ngaahi Tāpuaki ki he Puké
ʻE lava ke faingāue ʻa e kau maʻu Lakanga Taulaʻeiki Faka-Melekisētekí ki he kakai ʻoku puké. Ko e faingāue ko ʻení ʻoku konga ua: ko e tākai ʻaki e loló mo hono fakamaʻu ʻo e tākaí. ʻUluakí, ʻoku ʻai ʻe he tokotaha maʻu lakanga fakataulaʻeikí ha tulutā lolo ʻōlive kuo ʻosi fakatapui, pe tāpuakiʻi, ki he ʻulu ʻo e tokotahá pea fai ha kiʻi lotu nounou. Pea ʻe fakamaʻu leva ʻe ha maʻu lakanga fakataulaʻeiki ʻe taha ʻa e tākaí mo foaki ki he tokotahá ha tāpuaki ʻo fakatatau mo e fakahinohino ʻa e Laumālie Māʻoniʻoní.
Ngaahi Tāpuaki ʻo e Fakafiemālié mo e Faleʻí
ʻE lava ʻe he kau maʻu Lakanga Taulaʻeiki Faka-Melekisētekí ke foaki ha ngaahi tāpuaki ʻo e fakafiemālié mo e faleʻí ki he kau mēmipa ʻo e fāmilí mo ha niʻihi kehe ʻoku nau kole. ʻE lava ke foaki ʻe ha tamai ʻokú ne maʻu ʻa e Lakanga Taulaʻeiki Faka-Melekisētekí ha ngaahi tāpuaki fakaetamai ki heʻene fānaú. Mahalo ʻe mātuʻaki tokoni lahi ʻeni ʻi he taimi ʻoku fehangahangai ai ʻa e fānaú mo ha ngaahi faingataʻa makehe.
Ko e Vaheʻi ʻo e Kāingalotú ke Ngāue ʻi ha Ngaahi Uiuiʻí
ʻI he taimi ʻoku maʻu ai ʻe he kāingalotu ʻo e Siasí ha ngaahi uiuiʻí, ʻoku foaki leva kiate kinautolu ha tāpuaki ʻi he taimi ʻoku vaheʻi ai kinautolu ke ngāué. ʻOku tāpuakiʻi kinautolu ʻe ha taki lakanga fakataulaʻeiki ʻaki e mafai ke ngāue ʻi he uiuiʻí. ʻE toe foaki ange foki ʻe he taki lakanga fakataulaʻeikí ha tāpuaki ke tokoni ʻi heʻenau ngāué.
Faitaaʻi ʻe Shauna Stephenson
Ngaahi Tāpuaki Fakapēteliaké
ʻE lava ke maʻu ʻe he mēmipa moʻui taau kotoa pē ʻo e Siasí ha tāpuaki fakapēteliake. ʻOku ʻomi ʻe he tāpuaki ko ʻení ha faleʻi fakataautaha mei he ʻEikí. Te ne lava ʻo ʻomi ha fakahinohino mo ha fakafiemālie ʻi he moʻui ʻa ha taha. ʻOkú ne toe fakahā foki ʻa e hako ʻo e tokotahá ʻi he fale ʻo ʻIsilelí. Ko e pēteliake pē kuo ʻosi fakanofó te ne lava ke foaki ʻa e faʻahinga tāpuaki ko ʻení.