Leʻo ʻo e Kau Māʻoniʻoni ʻi he Ngaahi ʻAho Kimui Ní

Ko ʻEku Vakai mei ʻOlungá

Fai ʻe Milla Ray Acevedo Carrasco, Malapolo, Nuʻu Sila

Naʻá ku meimei liʻaki ʻa e meʻa ko ē naʻá ku fiemaʻu ke u aʻusia ai ʻeku taumuʻá.

Tā ʻo e feituʻu Tumuʻaki ʻo Uloí, faitaaʻi ʻe he taha fakamatalá

Ne u ʻalu kimuí ni ʻi ha fononga lue lalo ʻiloa ki he Tumuʻaki ʻo Uloí ʻi he ʻotu moʻunga fakaʻofoʻofa ʻo e Motu Saute ʻo Nuʻu Silá. Koeʻuhí naʻe laulau houa ʻa e lue laló, naʻá ku ʻave pē ʻa e meʻa naʻá ku fiemaʻú: ko ha fanga kiʻi meʻakai mo e vai lahi.

Naʻe ʻosi mamafa pē ʻeku kato āfei ʻi hoku tuʻá ʻi he taimi naʻá ku kamata aí. Hili ha haafe houa ʻo ʻeku kaká, kuó u ongoʻi ʻoku lahi ange mamafa ʻeku kató ʻi hoku umá mo hoku tuʻá. Naʻá ku fakakaukau ʻi ha kiʻi taimi ke laku ha niʻihi ʻo ʻeku vaí. Ka, naʻá ku ʻiloʻi vave, te u fiemaʻu ia.

Toe ha houa ʻe taha mo e konga peá u aʻu ki he tumuʻaki moʻungá, ne fakaʻau ke tahake hangatonu lahi ange kiʻi halá pea ʻufiʻufi ʻe he sinoú. Ne kamata ke u fakakaukau he ʻikai ke u aʻu ki ʻolunga, ka naʻe fakaʻaiʻai au ʻe heʻeku taumuʻá ke u hoko atu.

ʻI he taimi naʻe fāifai ai peá u aʻu ki ʻolungá, ne u ongoʻi naʻe maʻamaʻa ange ʻeku kato āfeí. ʻI he taimi ko iá, kuó u ʻosi kai ʻe au ʻeku meʻakai maʻamaʻá mo inu e konga lahi ʻo ʻeku vaí. Naʻá ku fakakaukau ki heʻeku fonongá, ʻi heʻeku mālōlō mo houngaʻia ʻi he ʻasi fakaʻofoʻofa hake ki ʻolungá—ki he tumuʻaki moʻungá pea ʻi he moʻuí.

Kuo lau houa, mo ʻeku kaka ki ʻolunga, pea fafangaʻi mo fakafonu vai hoku sinó ke u maʻu ha ivi ke kei hoko atu. Ko e meʻa naʻe hangē ha kavenga mafasia ʻi he kamataʻangá—ʻa e vai fakahaofi moʻuí—kuó ne tāpuakiʻi au ke u aʻusia ʻeku taumuʻá.

ʻOku tau aʻusia kotoa ha fetōʻaki, ka ʻoku tokoni mai e Laumālie Māʻoniʻoní ke tau fai ha ngaahi fili lelei. Naʻá ku meimei liʻaki ha konga lahi ange ʻo e vai lita ʻe tahá ʻi he halá, ka naʻá ku ongoʻi ke kei ʻave pē.

Naʻá ku fakafetaʻi ki he Tamai Hēvaní ʻi he loʻimataʻia, ʻi he ngaahi fakakaukau ko ʻení. Naʻe ueʻi au ʻe heʻeku ʻi he ʻotu moʻunga ʻufiʻufi sinoú he ʻaho ko iá ke u vakavakaiʻi ʻeku moʻuí, ʻeku ngaahi filí, ʻeku ngaahi taumuʻá, mo ʻeku kato āfei fakatāutahá.

Kimuʻa ʻi heʻeku fononga laló, naʻá ku taʻepauʻia ʻi heʻeku moʻuí mo ʻeku ngāue ʻi ha fonua mulí. Ka ʻoku ou ongoʻi ʻeni ʻe lelei ʻa e meʻa kotoa pē. ʻOku ou ʻilo ʻe tokangaʻi au ʻe he ʻEikí.

ʻI heʻeku feohi mo e Laumālié, ʻoku ou ʻilo te u lava ʻo fai ha ngaahi fili totonu te nau hiki hake fakaʻatamai, fakatuʻasino, mo fakalaumālie au. Pea ʻi he taimi ʻoku ou ongoʻi mafasia aí, te u lava ʻo tafoki ki hotau Fakamoʻuí, ʻa e maʻuʻanga ʻo e “vai [ʻo e] moʻuí” (Sione 4:10). ʻOku ou ʻilo te Ne fafangaʻi au mo fakamaʻamaʻa ʻeku kavengá (vakai, Mātiu 11:28–30).