“ʻE Tokoniʻi Fēfē Nai Au ʻe he Fakamoʻuí?,” Liahona, Māʻasi 2023.
Haʻu, ʻo Muimui ʻIate Au
ʻE Tokoniʻi Fēfē Nai Au ʻe he Fakamoʻuí?
Ko Hono Fakamoʻui ʻo e Tangata Kiliá, tā fakatātaaʻi ʻe E. S. Hardy © Providence Collection / licensed from Goodsalt.com
Naʻe “faʻa feʻaluʻaki ʻa [Sīsū Kalaisi] ʻo fai lelei” (Ngāue 10:38): Naʻá Ne fakamoʻui ha tangata kilia (vakai, Mātiu 8:2–3). Naʻá Ne fakamoʻui e tamaioʻeiki ʻa e ʻeikitau, ʻa ia naʻá ne ongoʻi taʻe-taau kae tui pē ʻe tokoniʻi ia ʻe he Fakamoʻuí (vakai, Mātiu 8:5–13). Naʻá Ne foaki ʻa e nongá ki Heʻene kau ākongá ʻi he lolotonga ʻo ha taufa lahi ʻi he tahí (vakai, Mātiu 8:23–27). ʻI he taimi naʻe mamata ai ki ha fefine naʻe mamahi ʻi he mate ʻene tama tangata pē tahá, naʻá Ne fakafiemālieʻi ia mo ʻoange ha ʻamanaki lelei, pea toki fokotuʻu ʻene tamasiʻí mei he maté (vakai, Luke 7:11–15).
ʻEkitivitī
Te tau lava ʻo ongoʻi e mālohi ʻo e Fakamoʻuí ʻi he kuongá ni ʻi heʻetau tui kiate Iá. Lau ha taha ʻo e ngaahi fakamatala mei he laukonga ʻo e uike ní Haʻu, ʻo Muimui ʻIate Aú . Fakatokangaʻi ange ʻa e founga naʻe fakahoko ʻe he Fakamoʻuí ki he ngaahi fiemaʻu mo e tui ʻa e kakaí.
Fakalaulauloto pe aleaʻi ʻa e ngaahi fehuʻi ko ʻení ke fakakaukauʻi ʻa e founga kuo tokoniʻi ai koe ʻe he Fakamoʻuí, ʻi hoʻo moʻuí:
-
Ko e fē ha taimi kuó u tui ai ki he Fakamoʻuí mo ongoʻi ʻEne fai-fakamoʻui (fakaelotó, fakaʻatamaí, fakalaumālié, pe fakaesino)?
-
Ko e fē ha taimi kuó u ongoʻi ai ʻEne melinó?
-
Ko e fē ha taimi ne u maʻu ai ha tokoni taʻe-ʻamanekina mei he Fakamoʻuí?
-
Ko e fē nai ha taimi kuó u mamata ai ki Hono toʻukupú ʻi ha mana pe ha ʻaloʻofa ongongofua?
-
ʻI heʻeku moʻuí ʻi he taimí ni, te u fakamālohia fēfē nai ʻeku tui kiate Iá mo maʻu ʻEne tokoní?