Tokoni mo e ʻAmanaki Lelei mei he Konifelenisi Lahí

Fai ʻe Bettina Monni, Loma, ʻĪtali

Naʻe ʻikai ke u teitei ʻamanaki te u fanongo kakato ki he lea ʻo e konifelenisi lahí fekauʻaki mo e meʻa naʻá ku aʻusiá.

ʻĪmisi

fāmili ʻoku maʻu-meʻatokoni fakataha ʻi peito

Tā ʻo e tokotaha ʻoku ʻaʻana e fakamatalá mo hono fāmilí naʻe fai ʻe Cody Bell

Hili hono fāʻeleʻi ʻeku fuofua pēpeé, ne u tofanga ʻi he kulukia tamaki ʻo e moʻuí. Ko ha taimi fakaʻofoʻofa ʻeni ʻi heʻeku moʻuí he kuo ʻi ai haku foha, ka naʻe ʻikai ke u lava ʻo aʻusia kakato e fiefia ʻo e maʻu ha pēpeé koeʻuhí he naʻá ku fuʻu loto-mafasia lahi.

Lolotonga e taimi faingataʻa ko ʻení, ne u lotu lahi ki he Tamai Hēvaní. Naʻá ku kole kiate Ia ke tokoni mai ke u lavaʻi ʻa e ʻahiʻahi faingataʻá ni. ʻI he fākaofi mai ʻa e konifelenisi lahí ʻi he faʻahitaʻu fakatōlau ko iá, naʻá ku toe lotu foki ke u maʻu ha fakafiemālie mei he ngaahi lea ʻa e kau taki ʻo e Siasí.

ʻI heʻeku fanongo ki he ngaahi lea ʻi he ʻuluaki fakatahaʻanga ʻo e konifelenisi lahí, naʻe kamata ke u ongoʻi fiemālie. Pea, ʻi he lolotonga ʻo e fakatahaʻanga hono uá, naʻe lea ai ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e loto-mafasiá. Naʻá ne pehē ʻe lava ʻe he loto-mafasiá ʻo ʻai ke tau ongoʻi “[hangē] ha ipu kuo maumaú”¹ (Saame 31:12). Naʻe ʻikai ke u teitei ʻamanaki te u fanongo kakato ki ha lea fekauʻaki mo e meʻa ne u aʻusiá.

Ko ha momeniti mahuʻinga ʻeni kiate au. Naʻe tokoni e leá ke mahino kiate au ʻoku ʻofa ʻa e Tamai Hēvaní ʻiate au pea ʻokú Ne ʻafioʻi au. Naʻá Ne ʻafioʻi ʻa e meʻa naʻá ku fouá. Naʻá Ne fie tokoni mai mo ʻomi ha ʻamanaki lelei kiate au. Naʻá Ne fai ia ʻo fakafou ʻi he ngaahi lea ʻa ʻEletā Hōlaní.