“Ko ʻEku Fafangu Fakamanatu ʻi he Tauá,” Liahona, Māʻasi 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e ʻEku Fafangu Fakamanatu ʻi he Tauá
Kapau naʻá ku talangofua ki he ueʻi fakalaumālié, naʻe mei maʻu ha ma taimi lahi ange ke akoʻi ʻa e ongoongoleleí kia Kīsepi (Guiseppe).
ʻI ha ʻaho teuteu ʻe taha, ne u ʻaʻahi ai mo hoku hoa faifekaú ki ha falelotu Katolika ʻi Pama, ʻĪtali. Lolotonga ʻeku ofo ʻi he ngaahi tā valivali fakaʻofoʻofa aí, naʻá ku fakatokangaʻi ha pātele ʻoku lautohi ofi mai pē. Naʻá ku maʻu ha ueʻi ke u talanoa ki ai fekauʻaki mo e Tohi ʻa Molomoná, ka naʻá ku toe manavasiʻi.
ʻE tali fēfē nai ʻe he pātele Katoliká ha faifekau malanga ʻi ha loto falelotu Katolika? Naʻe toe ongo mai ʻa e ueʻi fakalaumālié, ka naʻá ku toe tukunoaʻi pē.
ʻOsi ha ngaahi uike siʻi mei ai, naʻe talamai ʻe he ongo ʻeletā kehe ʻi homau fale nofo totongí naʻá na ʻaʻahi ki ha pātele ko Kīsepi ʻi heʻena lolotonga kumi fiefanongo ʻi he halá. Hili ʻena akoʻi ange ha lēsoní, naʻá ne tali ʻa e tatau ʻo e Tohi ʻa Molomoná.
ʻI he taimi naʻe toe talanoa ai ʻa e ongo faifekaú mo Kīsepi ʻi he ʻosi ha uike ʻe tahá, kuó ne ʻosi lau ha konga lahi ʻo e tohí. Naʻá ne fiefia ʻaupito ai.
Kimuʻa pea toe talanoa ʻa e ongo faifekaú mo Kīsepí, kuo hiki hoku hoá ʻoʻoku, peá u hoa [tolu] leva mo kinaua. ʻI he taimi naʻa mau ō ai ke akoʻi ʻa Kīsepi ʻi he falelotu Katoliká, naʻe ʻikai ke u ʻohovale heʻeku ʻilo ko e pātele tatau pē ia naʻe ueʻi fakalaumālie au ke u lea ki ai kimuʻá.
Naʻe talamai ʻe Kīsepi kiate kimautolu naʻá ne lau e tohi ʻa ʻAlamaá, ʻa ia naʻá ne fakafehoanaki ki he ʻAposetolo ko Paulá. Naʻa mau pehē leva ke akoʻi ki ai e lēsoni hono uá, ʻa ia ʻoku fakaʻosi ʻaki ha fakaafe ke papitaiso. ʻI he fakaʻosinga ʻo ʻemau lēsoní, kimuʻa pea mau fakaafeʻi ʻa Kīsepi ke muimui ʻi he sīpinga ʻa Sīsū Kalaisí ke papitaiso, kuo kamata ke tā ʻa e ngaahi fafangu ia ʻo e falelotú, ʻo mau ʻohovale ai.
Ne ʻikai toe manatuʻi ʻe Kīsepi ia ʻa e taimí peá ne pehē ʻoku fiemaʻu ke kau fakataha mo e kau pātele kehé ʻi he lotu ʻo e hoʻataá. Pea kole fakamolemole mai ʻo ne pehē he ʻikai toe ʻatā ʻi he kahaʻú koeʻuhí he ʻe ʻalu ki ha fakataha ako ʻa e kau pātelé. ʻE hoko mai ai mo hono fakanofo ia ko ha pātelé.
Naʻa mau ʻohovale ʻi he mole ʻa e momeniti mahuʻinga ko iá. Kapau naʻá ku talangofua ki he ueʻi fakalaumālie ne u maʻu kimuʻá, naʻá ma mei maʻu ha taimi lahi ange ke akoʻi ʻa Kīsepi pea naʻá ne mei maʻu ha taimi lahi ange ke fakaʻosi hono lau ʻo e Tohi ʻa Molomoná. Ko e meʻa pē ʻoku ou ʻiloʻí, naʻe ʻikai ke toe akoʻi ia ʻe he kau faifekaú.
Hili e aʻusia ko iá, mo e fakamanatu mai ʻe he ongo ʻo e fafangu ʻo e uasi ʻi he tauá, hono mahuʻinga mo e nounou hotau taimí. ʻI he toenga ʻo ʻeku ngāue fakafaifekaú, ko e taimi kotoa pē ne u ongona ai ha fafangu ʻo ha taua ʻoku tā, naʻe ueʻi au ke u lea ki ha taha pē te u lavá, fekauʻaki mo e ongoongoleleí. Ko e ʻaho ní, ʻoku ou kei feinga pē ke muimui ki he ngaahi ueʻi mei he Laumālié.