“Ngaahi Anga Fakafonua Faka-Siu ʻo e Tanu e Meʻafakaʻeikí,” Liahona, Māʻasi 2023.
Ngaahi Anga Fakafonua Faka-Siu ʻo e Tanu e Meʻafakaʻeikí
Ko Lasalosi, Māʻata, mo Mele ko e fānau pē taha naʻa nau nofo ʻi ha kolo lahi ko Pētani. Ko ha ngaahi kaungāmeʻa kinautolu ʻo e Fakamoʻuí, pea naʻá Ne toutou ʻaʻahi kiate kinautolu. ʻI ha taimi ʻe taha ʻo e ngāue ʻa Sīsuú naʻá Ne mavahe ai mei Siutea, ʻa ia naʻe tuʻu ai ʻa Pētaní, koeʻuhí he naʻe holi e kakai Siu ʻo e feituʻú ke fakapoongi Ia (vakai, Sione 10:39–40). Lolotonga e mamaʻo ʻa Sīsuú, naʻe puke ʻa Lasalosi, ʻo mate, pea naʻe tanu ia ʻo fakatatau ki he anga fakafonua ʻo e kau Siú (vakai, Sione 11:1–17).
Ko ha niʻihi ʻeni ʻo e ngaahi anga fakafonua ʻoku ngalingali naʻa nau muimui ki ai ʻi he mate mo e tanu ʻo Lasalosí.
Hili e mate ʻa e tokotahá, naʻe pooki hono ongo matá. Naʻe tatafi e sinó ʻaki e meʻa namu kakala hangē ko e lolo naʻatí, mulá, mo e ʻaloé (vakai, Luke 23:56; Sione 19:38–40).
Ngaahi tā fakatātā ʻa Noah Regan
Naʻe kofu ʻaki ʻa e sinó ha tupenu pea fata ki he ʻapi ʻo e fāmilí, ʻa ē ʻe lava ke ʻaʻahi ki ai ʻa e kāingá mo e kaungāʻapí (vakai, Ngāue 9:37).
Ko e angamahení naʻe faʻa fata ʻa e sinó ki he fonualotó ʻi loto he houa ʻe valu mei heʻene maté, ʻi ha fata ke lava ʻa e kau ʻaʻahí kotoa ʻo sio ki he sinó (vakai, Luke 7:12–14). Naʻe taki ʻe he houʻeiki fafiné ʻa e fonongá. Naʻe haehae ʻe he kau mēmipa ʻo e fāmilí honau valá ko ha fakaʻilonga ʻo e tēngihia.
ʻOku ʻi ai ha ngaahi fonualoto ʻe niʻihi naʻe tongi ki he loto maká (vakai, Mātiu 27:58–60). Ko e ngaahi fonualotó naʻe iiki ʻa e hūʻangá pea pau ai ke punou ʻa e kakaí ke nau hū ki ai.
Naʻe fakaʻeʻepa ʻa e sinó ʻi ha hiliʻanga meʻa naʻe tongi mei he maká. Naʻe tāpuni ʻa e fonualotó ʻaki ha fuʻu maka fuopotopoto lahi ke taʻofi ʻa e kau kaihaʻá pe fanga monumanú mei haʻanau hū ki ai.1
Hili hono fokotuʻu ʻe Sīsū ʻa Lasalosi mei he maté, naʻe maʻu leva ʻe Heʻene kau ākongá ha ʻuhinga mālohi ke ʻamanaki lelei kae ʻikai mamahi pē ʻi he mole ʻo ha ʻofaʻanga. Naʻe ʻikai ke nau lava ʻo fakaʻikaiʻi ia, koeʻuhí ko Sīsū Kalaisi, “ke ʻoua naʻa ikuna ʻa faʻitoka, pea ke ʻoua naʻa ʻi ai hano huhu ʻo e maté” (Mōsaia 16:7).