“ʻE Lelei Pē ʻa e Meʻa Kotoa,” Liahona, Māʻasi 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
ʻE Lelei Pē ʻa e Meʻa Kotoa
Ne hangē naʻe fuʻu lōloá ʻa e ngaahi houá kae tālunga e haʻu ha taha ʻo e kau faitafá ki heʻeku fineʻeikí ʻi he loki tataliʻangá.
Tā ʻo Lāsolo M. Nalesoní naʻe fai ʻe Eldon K. Linschoten
ʻI he konga kimuʻa ʻo e taʻu 1980 tupú, naʻe fakahoko ai ha tafa mafu ʻo ʻeku tangataʻeikí he naʻe tofanga ʻi ha mahaki mafu faingataʻa, ne mau ʻamanaki te ne fakalōloaʻi siʻene moʻuí.
Ko e taimi ko iá, ko e founga foʻou naʻe fakaʻaongaʻi ʻe he kau faitafá naʻe kei foʻou ʻi ʻUlukuai. Naʻe fetongi ʻe he kau faitafá ʻa e foʻi vaolo lahí ʻaki ha foʻi vaolo faʻu. Naʻe fāifai pea hoko ʻa e founga ko iá ʻo angamaheni ʻaki pea kuó ne fakahaofi ha ngaahi moʻui ʻe taʻe-faʻa-laua.
Koeʻuhí naʻe kau ʻi he tafá ʻa e founga tafa foʻoú ni, naʻe ʻi ai ha kau toketā mafu ʻe niʻihi naʻe ʻi ai, ʻo mamata ʻi he tafá. Lolotonga e tafa ʻa e kau toketā faitafá, naʻe tangutu tailiili pē siʻeku fineʻeikí ʻi he loki tataliʻangá. Naʻe hangē he ʻikai toe ʻosí.
Naʻa mau fiefia ʻi he taimi ne mau ʻilo ai kuo ola lelei ʻa e tafá. ʻI heʻenau hū mai mei he loki tafá, naʻe mavahe ha toketā ʻe taha, mei he toenga ʻo e kau faitafá, ʻo ʻalu ki he loki tataliʻangá. Ko ha toketā faitafa ʻaʻahi mai pē ia naʻe haʻu ki ʻUlukuai ke tokangaʻi ʻa e tafá.
Naʻe lue mai ki heʻeku fineʻeikí, tuʻu, pea ala māmālie hifo ki hono umá. Pea, ʻi heʻene vakai ki siʻono fofongá, naʻá ne pehē ange, “ʻE lelei pē ʻa e meʻa kotoa.”
Naʻe tonu ʻa e toketā faitafá. Naʻe moʻui ʻeku tangataʻeikí ʻi ha toe taʻu ʻe 24, ʻo ngāue maʻá e ʻEikí ʻaki hono lotó kotoa—kuo moʻui lelei—ʻo aʻu ki he ʻaho fakaʻosi ʻo ʻene moʻuí.
ʻI he lolotonga ʻo e konifelenisi lahi ʻa e Siasí kimui ní, naʻe fakamanatu ki siʻeku fineʻeikí e ʻaʻahi makehe ko ia ʻi he ngaahi taʻu lahi kuo hilí. Ko hono moʻoní, ʻokú ne manatuʻi ʻa e taimi kotoa pē ʻoku lea ai e toketā faitafa ʻaʻahi ko iá—Palesiteni Lāsolo M. Nalesoni—ki he Kāingalotú.
ʻOku makehe kotoa ʻa e kau palōfita ʻa e ʻEikí kiate kimautolu, ʻi ha faʻahinga founga. ʻOku makehe ha niʻihi koeʻuhí he naʻa nau hoko ko e Palesiteni ʻo e Siasí ʻi heʻemau kei īkí. ʻOku makehe ha niʻihi koeʻuhí he naʻa nau hoko ko ha Palesiteni ʻi he taimi ne mau papitaiso aí. Ka ki siʻeku fineʻeikí mo au, ʻoku makehe ʻa Palesiteni Nalesoni koeʻuhí he ʻokú ne ʻiloʻi ko e ngāue fakafaitoʻo kotoa pē ʻoku ʻikai ngata pē ʻi heʻene ongo ki he tokotaha puké ka mo e siʻi ngaahi ʻofaʻanga ʻo e tokotaha puké foki. ʻOkú ne ʻiloʻi ʻoku fiemaʻu ʻe he kau mēmipa ʻo e fāmilí ha ngaahi lea fakalotolahi, ha mālohi mo ha fakamahino ki he taimi ʻoku tuʻu ai e moʻui ʻo ha ʻofaʻanga ʻi ha tuʻunga fakatuʻutāmaki.
ʻE hounga maʻu pē kiate kimautolu e ngaahi lea fakalotolahi ʻa Palesiteni Nalesoni ne fai fuoloa ʻi ʻUlukuaí pea mo siʻene moʻui tokoni ki he Tamai Hēvaní mo e fānau ʻa e Tamai Hēvaní.