“Ko e Falala ki he Mālohi ʻo e ʻEikí mo ʻEne Kau Palōfitá,” Liahona, Māʻasi 2023.
Maʻá e Ngaahi Mātuʻá
Ko e Falala ki he Mālohi ʻo e ʻEikí mo ʻEne Kau Palōfitá
Faitaaʻi ʻe Ravell Call, Deseret News
Siʻi Ngaahi Mātuʻa,
ʻI hotau māmani fakautuutu ko ʻeni ʻo e moveuveú, ʻe lava ʻo faingofua ke tau ongoʻi manavahē mo taʻepauʻia. Ka ʻi he taimi ʻoku tau tafoki ai kia Sīsū Kalaisi ke maʻu ha fakafiemālié, te Ne lava ʻo ʻomi ha nonga kiate kitautolu ʻi he ngaahi ʻahiʻahi ʻo e moʻuí. Lau ʻa e ngaahi fakamatala ʻi he makasini ko ʻení ke ʻiloʻi e founga ʻe lava ke tokoniʻi ai koe ʻe he Fakamoʻuí ʻi ho ngaahi faingataʻaʻiá.
Ngaahi Fealēleaʻaki ʻi he Ongoongoleleí
ʻOku Foaki Fiefia ʻe he Fakamoʻuí ʻa e Nongá ʻi he Ngaahi Taimi Faingataʻá
Lau mo ho fāmilí e fakamatala ʻa ʻEletā ʻUkitofa ʻi he peesi 4 fekauʻaki mo e founga ʻe lava ai ʻe he falala ki he mālohi fakaivia ʻo Kalaisí ke ʻomi ha nonga ʻi he ngaahi tūkunga faingataʻá. Aleaʻi fakataha ha ngaahi founga ʻe niʻihi ʻoku ʻomi ai ʻe Sīsū ha fakafiemālie. Ko e hā te ke lava ʻo fai ke fakaafeʻi ai Hono mālohí ki hoʻo moʻuí?
ʻOku Tāpuekina Fēfē Nai ʻe he Lakanga Fakataulaʻeikí Hotau Fāmilí?
Lau ʻa e fakamatala ʻi he peesi 22 ki he ngaahi tāpuaki ʻo e lakanga fakataulaʻeikí. Fakaafeʻi e kau mēmipa ʻo e fāmilí ke nau vahevahe ha ngaahi taimi ne nau maʻu ai ha tāpuaki ʻo e lakanga fakataulaʻeikí. Ne nau ongoʻi fēfē nai? Naʻe tokoni fēfē nai ʻa e tāpuakí kiate kinautolu? ʻOku ʻi ai nai ha tāpuaki ʻe lava ʻo tokoni ki ha mēmipa ʻo e fāmilí he taimí ni?
ʻOku Fakaʻaongaʻi ʻe he ʻEikí ʻEne Palōfitá ke Tokoniʻi Kitautolu ke Tau Tanumaki ʻa e Loto-toʻá
ʻI he fakamatala ʻi he peesi 30, ʻoku fakamatala ai ʻa ʻEletā Sikāhema ki he founga naʻe tokoni ai e ngaahi akonaki fakaepalōfitá ke ne tuʻu maʻu ʻi he tuí mo e ngaahi tuʻunga moʻuí ʻi he lolotonga ʻo ʻene ngāue maʻuʻanga moʻuí ko e tokotaha vaʻinga fakapalofesinale ʻi he ʻakapulu faka-ʻAmeliká pea ʻi he kotoa ʻo ʻene moʻuí. Hili haʻo lau e fakamatala ko ʻení, te ke lava ʻo ʻai ke fakamatalaʻi ʻe he mēmipa takitaha ho fāmilí ha taimi naʻe tokoniʻi ai kinautolu ʻe he muimui ki he palōfitá ke nau maʻu ha loto-toʻá.
Haʻu, ʻo Muimui ʻIate Au Fiefia Fakafāmilí
Tupulaki, Tupulaki, ʻi he ʻAho Kotoa Pē
ʻI heʻetau hoko ko e kāingalotu ʻo e Siasi ʻo Sīsū Kalaisi kuo fakafoki maí, ʻoku tau fatongia ʻaki e tokoni ke fakatupulaki ʻa e puleʻanga ʻo e ʻOtuá ʻi he māmaní. ʻOku pehē ʻe heMātiu 13:31–32:
“ʻOku tatau ʻa e puleʻanga ʻo e langí mo e foʻi tengaʻi mūsita, ʻa ia naʻe tō ʻe ha tangata ʻi heʻene ngoué:
“ʻA ia ʻoku siʻi hifo ʻi he tengaʻi ʻakau kotoa pē: ka ʻo ka tupu ia, ʻoku lahi taha pē ʻi he faʻahinga ʻakau īkí, pea hoko ia ko e fuʻu ʻakau.”
-
Tangutu fuopotopoto ʻo fāʻū hangē ha kiʻi tengaʻi mūsitá.
-
ʻAi ke taufetongi ʻa e taha kotoa ʻi hono fakahingoa ha ʻekitivitī te nau lava ʻo fai ʻi he ʻaho takitaha ke tokoni ke tupulaki ʻa e Siasí (fai ʻenau fakamoʻoní, vahevahe ha potufolofola ʻi he mītia fakasōsialé, vahevahe ha moʻoni ʻo e ongoongoleleí mo ha kaungāmeʻa, mo e alā meʻa peheé).
-
Ko e taimi kotoa pē ʻe talamai ai ʻe ha taha ha ʻekitivití ʻoku tokoni ke tupulaki ai ʻa e Siasí, kiʻi tangutu hangatonu siʻisiʻi hake ʻa e taha kotoa pea kamata ke tuʻu ki ʻolunga kae ʻoua kuo nau tuʻu tonu kotoa.
-
Aleaʻi mo ho fāmilí ʻa e ʻuhinga ʻoku mahuʻinga ai ki he tokotaha takitaha ke ne fai ʻene tafaʻakí ke tokoni ki he tupulaki ʻa e Siasí.