សូមស្វាគមន៍មកកាន់ច្បាប់នេះ
ការដកស្រង់ចេញពីសន្និសីទទូទៅប្រចាំឆ្នាំលើកទី ១៩៣
« យើងបានទទួលទានអាហារខាងវិញ្ញាណអំឡុងពេលពីរថ្ងៃមកនេះ » ប្រធាន រ័សុល អិម ណិលសុន បានមានប្រសាសន៍នៅចុងបញ្ចប់នៃសន្និសីទទូទៅប្រចាំឆ្នាំលើកទី ១៩៣ នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ( សូមមើលទំព័រ ១២៧ ) ។ អាហារនោះរួមមាន ការប្រឹក្សាដើម្បីធ្វើតាមគំរូព្រះអង្គសង្គ្រោះព្រះយេស៊ូវគ្រីស្ទ—ជំនួសការឈ្លោះប្រកែកគ្នាដោយសេចក្តីសប្បុរស សេចក្តីមេត្តាករុណា និងភាពសុខសាន្ត ( សូមមើលប្រធាន ណិលសុន ទំព័រ ៩៨ សូមមើលផងដែរ អែលឌើរ គ្រីស្តូហ្វឺសិន និង សូរ៉េស ទំព័រ ៧៧ និង ៨៥ ) ។
ប្រធានណិលសុនបានមានប្រសាសន៍ថា ៖ « ខ្ញុំសូមអញ្ជើញបងប្អូនឲ្យពិនិត្យមើលភាពជាសិស្សរបស់បងប្អូន ក្នុងបរិបទនៃរបៀបដែលបងប្អូនប្រព្រឹត្តចំពោះអ្នកដទៃ » ។ « ខ្ញុំសូមផ្ដល់ពរជ័យឲ្យបងប្អូនកែតម្រូវ ដើម្បីឲ្យឥរិយាបថរបស់បងប្អូនបានខ្ពង់ខ្ពស់ ពេញដោយការគោរព និងជាតំណាងឲ្យអ្នកដើរតាមដ៏ពិតរបស់ព្រះយេស៊ូវគ្រីស្ទ » ( ទំព័រ ៩៨ )
ជាមួយ ប្រធាន ណិលសុន អ្នកដឹកនាំសាសនាចក្រផ្សេងទៀតបានប្រកាសថា ចម្លើយចំពោះសំណួរ បញ្ហាប្រឈម ការខកចិត្ត និងការបាត់បង់របស់យើងមាននៅក្នុងគំរូ ការបង្រៀន ដង្វាយធួន និង ការមានព្រះជន្មរស់ឡើងវិញរបស់ព្រះអង្គសង្គ្រោះព្រះយេស៊ូវគ្រីស្ទដែលផ្តល់ឲ្យយើងនូវ « អំណោយទាននៃភាពសុខសាន្ត » ( ប្រធាន អាវរិង ទំព័រ ២៩ សូមមើលផងដែរ ប្រធាន អូក ទំព័រ ១០២ ប្រធាន ចនសុន ទំព័រ ៨១ និង អែលឌើរ មើរស្ស ទំព័រ ៣៩ ) ។ អ្នកនិយាយបានលើកទឹកចិត្តយើងឲ្យផ្ដោតលើព្រះអង្គសង្គ្រោះ ( សូមមើលអែលឌើរ ខាម៉ាហ្គូ ទំព័រ ៦៤ ) ថ្វាយបង្គំទ្រង់ ( សូមមើល អែលឌើរ ស្ទីវ៉ែនសុន ទំព័រ ៦ ) មករកទ្រង់ ( សូមមើល ប្រធាន ខ័រឌុន ទំព័រ ១០ ) ពង្រឹងទីបន្ទាល់របស់យើងអំពីទ្រង់ ( សូមមើល ប្រធាន បាឡឺដ ទំព័រ ១០៥ ) ផ្តល់ការងារបម្រើដូចទ្រង់ ( សូមមើល អែលឌើរ ហ្គង និង យូសេដា ទំព័រ ១៦ និង ៧០ ) ហើយកែលម្អភាពជាសិស្សរបស់យើង ( សូមមើល អែលឌើរ បែដណា, រ៉ាសបាន និង ប៊្រេហ្គ ទំព័រ ១២៣, ១០៨, និង ៦០ ) ។
ថ្នាក់ដឹកនាំសាសនាចក្រក៏បានលើកទឹកចិត្តយើងឲ្យផ្តល់តម្លៃដល់ពររបស់លោកអយ្យកោផងដែរ ។ អស់អ្នកដែលមិនបានទទួលពររបស់លោកអយ្យកោរបស់ខ្លួន ត្រូវបានទូន្មានឲ្យអធិស្ឋានអំពី « ពេលវេលាត្រឹមត្រូវ » ដើម្បីទទួលយកពរនោះ ( សូមមើលអែលឌើរ បិនណ្ណិត និង យ៉ាម៉ាស៊ីតា ទំព័រ ៤២ និង ៨៨ ) ។
ប្រធានណិលសុន បានប្រកាសអំពីការសាងសង់ព្រះវិហារបរិសុទ្ធថ្មីចំនួន ១៥ បានរំឭកយើងថា ៖ « ព្រះយេស៊ូវគ្រីស្ទគឺជាមូលហេតុដែលយើងសាងសង់ព្រះវិហារបរិសុទ្ធ » ( ទំព័រ ១២៧ សូមមើលផងដែរ អែលឌើរ រិនឡាន់, ដេ ហូយូស និង ដាន់ខិន ទំព័រ ៣៥, ៥២, និង ៩៥ ) ។
យើងបានគាំទ្រពួកចិតសិបនាក់ដែលមានសិទ្ធិអំណាចទូទៅថ្មីចំនួនប្រាំរូប គណៈប្រធានយុវនារីទូទៅថ្មី និងសមាជិកថ្មីមួយរូបនៃគណៈប្រធានយុវជនទូទៅ ខណៈដែលថ្លែងអំណរគុណយ៉ាងស្មោះស្ម័គ្រចំពោះអ្នកដែលត្រូវបានដោះលែង ឬនឹងត្រូវបានដោះលែងនៅថ្ងៃទី ១ ខែ សីហា ឆ្នាំ ២០២៣ ។
នៅពេលយើងពិនិត្យមើលសន្និសីទទូទៅឡើងវិញ សិក្សាសារលិខិតទាំងនោះ ហើយ « គិតពីសេចក្ដីពិតដែលបានបង្រៀន » ( ប្រធាន ណិលសុន ទំព័រ ១២៧ ) នោះយើងនឹងយល់ស្របនឹងអ្នកដែលបាននិយាយ មានអារម្មណ៍ចង់និយាយ មានភាពរីករាយក្នុងការចែកចាយ និងថ្លែងទីបន្ទាល់អំពីព្រះយេស៊ូវព្រះគ្រីស្ទ—ជាប្រភពនៃសេចក្ដីសង្រ្គោះរបស់យើង ( សូមមើល នីហ្វៃទី២ ២៥:២៦ ) ។