« អែលឌើរ គ្រីស្តព ជី ជីរ៉ត-ខារៀល » លីអាហូណាខែ ឧសភា ឆ្នាំ ២០២៣ ។
អែលឌើរ គ្រីស្តព ជី ជីរ៉ត-ខារៀល
ពួកចិតសិបនាក់ដែលមានសិទ្ធិអំណាចទូទៅ
ឈានចូលភាពពេញវ័យ អែលឌើរ គ្រីស្តព ជី ជីរ៉ត-ខារៀល មានផែនការធំមួយ—គឺចាប់ផ្តើមមាគ៌ានៅមហាវិទ្យាល័យយ៉ាងម៉ត់ចត់ ទទួលបានការពន្យារការអប់រំដើម្បីបម្រើបេសកកម្មពេញម៉ោង រៀបការជាមួយសង្សារតាំងពីវ័យជំទង់របស់លោក ហើយបន្ទាប់មកចាប់ផ្តើមជីវិតគ្រួសារ និងអាជីពរបស់លោកជាវិស្វករនៅប្រទេសបារាំងស្រុកកំណើតរបស់លោក ។
ខណៈពេលដែលបេសកកម្ម និងអាពាហ៍ពិពាហ៍បានសម្រេចតាមការគ្រោងទុក តែការរំពឹងទុកផ្សេងទៀតមិនបានកើតឡើងនោះទេ ។ ការពន្យារពេលសិក្សាមិនបានកើតឡើងទេ ប៉ុន្តែការផ្ទេរទៅសាកលវិទ្យាល័យព្រិកហាំយ៉ង់ ( ប៊ី.វ៉ាយ.យូ ) បានកើតឡើង បន្ទាប់មកបំណងប្រាថ្នាបង្រៀននៅកម្រិតសាកលវិទ្យាល័យក៏បានសម្រេចដែរ ។ ការងារនៅសាកលវិទ្យាល័យនៅប្រទេសបារាំងគឺកម្រមានសម្រាប់មនុស្សម្នាក់ ដែលមានការអប់រំនៅក្រៅប្រទេស ដូច្នេះការចិញ្ចឹមបីបាច់គ្រួសារ ការមានអាជីពផ្សេង ហើយការបម្រើនៅក្នុងសាសនាចក្របានកើតមានឡើងនៅក្នុងប្រទេសផ្សេងៗ និងតាមតារាងពេលលវេលារបស់ព្រះអម្ចាស់ ។
អែលឌើរ ជីរ៉ត-ខារៀល បានមានប្រសាសន៍ថា ៖ « ការពិតគឺថារឿងតិចតួចមួយចំនួនបានកើតឡើង តាមរបៀបដែលយើងបានគ្រោងទុក បានអនុញ្ញាតឲ្យយើងទាំងពីរនាក់ដឹងថា ប្រសិនបើយើងអនុញ្ញាតឲ្យព្រះអម្ចាស់ធ្វើរឿងរបស់ទ្រង់ ហើយយកយើងទៅកន្លែងណា កន្លែងនោះហើយដែលទ្រង់សព្វព្រះទ័យឲ្យយើងទៅ ហើយនោះជាកន្លែងដែលយើងអាចបម្រើបាន » ។ « វាបានជួយឲ្យយើងរៀនទុកចិត្តលើទ្រង់ ទុកចិត្តថាទ្រង់អាចបង្កើតអ្វីៗជាច្រើនចេញពីជីវិតយើង ច្រើនជាងអ្វីដែលយើងអាចធ្វើបាន » ។
អែលឌើរ គ្រីស្តព ជី ជីរ៉ត-ខារៀល កើតនៅថ្ងៃ ទី ២១ ខែ មករា ឆ្នាំ ១៩៦៦ នៅទីក្រុងលីយ៉ុង ប្រទេសបារាំង ដែលមានឳពុកឈ្មោះ ជីរ៉ាត ជីរ៉ត-ខារៀល និងម្ដាយឈ្មោះ អាននី ជីរ៉ត-ខារៀល ។ លោកបានរៀបការជាមួយ អ៊ីសាប៊ែល សូហ្វី ម៉ូឃ្លែ នៅខែ កក្កដា ឆ្នាំ ១៩៨៨ នៅទីក្រុងឈូឡែត ប្រទេសបារាំង បន្ទាប់ពីបម្រើបេសកកម្មពេញម៉ោងនៅបេសកកម្ម ម៉ុនទ្រៀ កាណាដា ។ ពួកគាត់បានផ្សារភ្ជាប់បីថ្ងៃក្រោយនៅឯព្រះវិហារបរិសុទ្ធប៊ឺន ប្រទេសស្វីស ។ ពួកគាត់មានបុត្រប្រាំបីនាក់ ។
បន្ទាប់ពីទទួលបានសញ្ញាបត្របរិញ្ញាបត្រ អនុបណ្ឌិត និងបណ្ឌិតផ្នែកវិទ្យាសាស្ត្រកុំព្យូទ័រពី ប៊ី.វ៉ាយ.យូ. អែលឌើរ ជីរ៉ត-ខារៀល បានធ្វើការជាសាស្ត្រាចារ្យជាន់ខ្ពស់នៃសាកលវិទ្យាល័យប្រ៊ីសស្តូលរបស់អង់គ្លេស និងជាអ្នកចាត់ការទូទៅជាន់ខ្ពស់សម្រាប់ ELCA Informatique របស់ស្វីសមុនពេលចំណាយពេល ១៩ ឆ្នាំជាសាស្ត្រាចារ្យផ្នែកវិទ្យាសាស្រ្តកុំព្យូទ័រនៅ ប៊ី.វ៉ាយ.យូ. ។
នៅគ្រានៃការហៅរបស់លោកជាពួកចិតសិបនាក់ដែលមានសិទ្ធិអំណាចទូទៅ អែលឌើរ ជីរ៉ត-ខារៀល បានបម្រើជាប្រធានស្តេកនៃស្តេកប្រ៊ូវ៉ូ យូថាហ៍ទី ១៦ សម្រាប់មជ្ឈិមវ័យនៅលីវ ។ ការហៅក្នុងសាសនាចក្រពីមុនៗរួមមានការបម្រើជាប្រធានបេសកកម្មលីយ៉ុងប្រទេសបារាំង ទីប្រឹក្សាជាន់ខ្ពស់ និងប៊ីស្សព ។