« ប្រធាន អេមីលី ប៊ែល ហ្វ្រីមែន » លីអាហូណាខែ ឧសភា ឆ្នាំ ២០២៣ ។
ប្រធាន អេមីលី ប៊ែល ហ្វ្រីមែន
ប្រធានយុវនារីទូទៅ
មនុស្សជាច្រើនប្រហែលជាធ្លាប់ស្គាល់ អេមីលី ប៊ែល ហ្វ្រីមែន រួចហើយថា ជាវាគ្មិន អ្នកនិពន្ធ ពិធីការនី និងគ្រូបង្រៀន ។ ប៉ុន្តែសម្រាប់អ្នកដែលមិនស្គាល់គាត់—ហើយសូម្បីអ្នកដែលស្គាល់គាត់ក៏ដោយ—ក៏ ប្រធាន អ៊ែមី ប៊ែល ហ្វ្រីមែន សង្ឃឹមថា រឿងដំបូងដែលពួកគេដឹងអំពីគាត់គឺថា គាត់មានជំនឿដ៏ជ្រាលជ្រៅ និងស្ថិតស្ថេរទៅលើព្រះយេស៊ូវគ្រីស្ទ ។
ប្រធាន ហ្វ្រីមែន បានមានប្រសាសន៍ថា « គឺតាមរយៈបទពិសោធន៍ផ្ទាល់ខ្លួនជាមួយទ្រង់ ដែលខ្ញុំបានស្គាល់ព្រះវរបិតាសួគ៌ និងបានទទួលវិវរណៈ » ។ « នោះគឺជាកត្តាកំណត់ក្នុងជីវិតរបស់ខ្ញុំ—ថាជាដៃគូពេញមួយជីវិតជាមួយទ្រង់ » ។
នៅពេលគាត់ចាប់ផ្ដើមការងាររបស់គាត់ជាអ្នកនិពន្ធ និងពិធីការនី គាត់បានសួរខ្លួនឯងថា តើគាត់ចង់ផ្តោតអារម្មណ៍លើអ្វី ។ ចម្លើយនោះគឺថ្លែងទីបន្ទាល់អំពីព្រះយេស៊ូវគ្រីស្ទ និងដង្វាយធួនរបស់ទ្រង់ ។
គាត់កើតនៅថ្ងៃទី ៣១ ខែ ធ្នូ ឆ្នាំ ១៩៦៩ នៅទីក្រុង បូស្តុន រដ្ឋម៉ាសាឈូសេត ស.រ.អា. ខណៈដែលឪពុករបស់គាត់គឺ ម៉ាកឃីនលី ម៉ាកវីឈី អស់វ៉ល់ បានចូលរៀននៅសាកលវិទ្យាល័យហាវើត ។ ប្រធាន ហ្វ្រីមែន បានមានប្រសាសន៍ថា ម្តាយរបស់គាត់ លេសស៊ី ជេមស៍ អស់វ៉ល់ គឺជាស្ត្រីម្នាក់ក្នុងចំណោមស្ត្រី « ដែលពោរពេញដោយថាមពល និងសេចក្តីស្រឡាញ់ខ្លាំង » ។
ប្រធាន ហ្វ្រីមែន ដែលជាបងគេបង្អស់ក្នុងចំនោមកូនប្រាំមួយនាក់ បានធំឡើងនៅទីក្រុង សានឌី រដ្ឋយូថាហ៍ ។ ជីវិតរបស់គាត់បានផ្លាស់ប្តូរក្នុងអំឡុងពេលឆ្នាំសិក្សានៅវិទ្យាល័យ ជាពេលដែលឪពុកម្តាយរបស់គាត់ត្រូវបានហៅឲ្យដឹកនាំបេសកកម្ម វេនធូរ៉ា កាលីហ្វ័រញ៉ា ។ គាត់ និងបងប្អូនរបស់គាត់បានចូលរួមរាល់សន្និសីទរបស់បេសកកម្ម ហ្សូន និងស្តេកជាមួយឪពុកម្ដាយរបស់គាត់ ។ បន្ទាប់ពីវិទ្យាល័យ គាត់បានចាកចេញពីរដ្ឋកាលីហ្វ័រញ៉ាដើម្បីទៅសិក្សានៅសាកលវិទ្យាល័យ ព្រិកហាំ យ៉ង់ ។
នៅពេលដែល ហ្គ្រេហ្គូរី ហ្គាត ហ្វ្រីមែន ដែលបម្រើនៅបេសកកម្ម វេនធូរ៉ា កាលីហ្វ័រញ៉ា បានត្រឡប់មកផ្ទះវិញនៅ បោនទីហ្វូល រដ្ឋយូថាហ៍ អ្នកដឹកនាំបេសកកម្មរបស់គាត់ បានស្នើឲ្យគាត់ទៅមើលកូនស្រីរបស់ខ្លួននៅឯការនិយាយរបស់នាងក្នុងពិធីភ្ជាប់ពាក្យមួយនៅរដ្ឋយូថាហ៍ ។ ក្រោយមក អេមីលី និង ហ្គ្រេហ្គូរី បានចាប់ផ្តើមដើរលេងជាមួយគ្នាភ្លាមៗ ហើយបានរៀបការនៅខែ ធ្នូ ឆ្នាំ ១៩៨៩ នៅឯព្រះវិហារបរិសុទ្ធ ឡូស អេនជែលឡេស កាលីហ្វ័រញ៉ា ។ ពួកគេមានបុត្រប្រាំនាក់ ។
ប្រធាន ហ្វ្រីមែន បាននិពន្ធសៀវភៅជាងដប់ពីរក្បាល និងបាននិយាយនៅក្នុងសន្និសីទ សិក្ខាសាលា និងការជួបជុំជាច្រើន ។ គាត់បានបង្រៀនអស់រយៈពេលជាច្រើនឆ្នាំនៅក្នុងប្រព័ន្ធអប់រំសាសនាចក្រ ហើយបានបម្រើជាគ្រូបង្រៀនគោលលទ្ធិដំណឹងល្អ និងជាប្រធានយុវនារី និងប្រធានសមាគមសង្រ្គោះវួដ ។