ស៊ីស្ទើរ អេនឌ្រា មូណូស ស្ពែនណោស

ទីប្រឹក្សាទីពីរនៅក្នុងគណៈប្រធានយុវនារីទូទៅ

ក្នុងនាមជាកុមាររស់នៅប្រទេសអាហ្សង់ទីន អេនឌ្រា មូណុស ស្ពែនណោស និងបងស្រីរបស់នាងបានចូលរៀននៅសាលាកាតូលិកមួយ ។ ពួកគេមិនដែលធ្លាប់ទទួលការបង្រៀនអំពីសាសនាផ្សេងទេរហូតដល់ អេនឌ្រា មានអាយុប្រាំបួនឆ្នាំ ។ នោះគឺនៅពេលដែលអ្នកផ្សព្វផ្សាយសាសនានៃពួកបរិសុទ្ធថ្ងៃចុងក្រោយ បានចាប់ផ្ដើមបង្រៀនគ្រួសាររបស់នាងអំពីដំណឹងល្អដែលបានស្ដារឡើងវិញ ។

មិនយូរប៉ុន្មានបន្ទាប់ពីអ្នកផ្សព្វផ្សាយសាសនាបានបញ្ចប់មេរៀនរបស់ពួកគេ ហើយចាកចេញ នោះម្ដាយរបស់អេនឌ្រាបានពន្យល់ថា មានសាសនាច្រើនជាងមួយ ។ អេនឌ្រាបានសួរម្តាយរបស់គាត់ថា តើសាសនាចក្រមួយណាដែលគាត់គិតថាតំណាងឲ្យព្រះបំផុត ។ ម្ដាយរបស់នាងបានឆ្លើយតបថា ៖ « ម៉ាក់គិតថាសាសនាចក្រនេះហើយ »—គឺសាសានាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលអ្នកផ្សព្វផ្សាយសាសនាទើបតែបង្រៀនពួកគេ ។

ពេញមួយជីវិតរបស់គាត់ អេនឌ្រា តែងតែ « ចង់អោយព្រះសព្វព្រះទ័យ » ដូច្នេះគាត់ព្រួយបារម្ភពីការឱបក្រសោបជំនឿថ្មី ។ ទោះជាយ៉ាងណាក៏ដោយ អារម្មណ៍នេះមានរយៈពេលតែពីរបីនាទីប៉ុណ្ណោះ និងត្រូវបានជំនួសដោយបំណងប្រាថ្នាដើម្បីរៀនបន្ថែមទៀតអំពីសាសនាចក្រ ។

ស៊ីស្ទើរ ស្ពែនណោស បានមានប្រសាសន៍ថា ក្រុមគ្រួសារបានទទួលបុណ្យជ្រមុជទឹក « ហើយយើងបានចាប់ផ្តើមជីវិតថ្មី » ។ « របៀបដែលជីវិតគ្រួសារយើងបានផ្លាស់ប្ដូរសម្រាប់យើងទាំងអស់គ្នាគឺវាពិតជាអស្ចារ្យណាស់ » ។

អេនឌ្រា វើរ៉ុននីកា មូណូស ស្ពែនណោស កើតនៅថ្ងៃទី ១៨ ខែ ឧសភា ឆ្នាំ ១៩៦៨ នៅទីក្រុង ប៊ូណូស អ៊ែ ប្រទេស អាហ្សង់ទីន ដែលមានឳពុកឈ្មោះ ខាឡូស មូណូស និងម្ដាយឈ្មោះ អ៊ែលដា មែនីសឃូស៊ី ។ គាត់បានធំឡើងនៅ បែកខ័រ ប្រទេសអាហ្សង់ទីន ។ គាត់បានរៀបការនឹង អាលីន ស្ពែនណោស នៅឯព្រះវិហារបរិសុទ្ធ ប៊ូណូស អ៊ែ អាហ្សង់ទីន នៅខែ ធ្នូ ឆ្នាំ ១៩៩២ ។ ពួកគាត់មានកូនស្រីពីរនាក់ ។

ស៊ីស្ទើរ ស្ពែនណោស ទទួលបានសញ្ញាបត្រផ្នែកការអប់រំកុមារតូចៗ ហើយគាត់បានសិក្សាផ្នែកសិល្បៈ និងផ្នែកឌីហ្សានផ្ទៃខាងក្នុង ។ បច្ចុប្បន្ន គាត់កំពុងបម្រើជាក្រុមប្រឹក្សាផ្តល់យោបល់ទូទៅនៃសមាគមសង្គ្រោះ ។ កាលពីមុន គាត់បានបម្រើក្នុងគណៈកម្មាការសន្និសីទ ដើម្បីកម្លាំងនៃយុវជន នៅ អាមេរិកខាងត្បូង ក្នុងតំបន់ខាងត្បូង ក្នុងគណៈកម្មាការសន្និសីទ ដើម្បីកម្លាំងនៃយុវជន សម្រាប់ជនជាតិឡាទីនក្នុងរដ្ឋយូថាហ៍ និងបានបម្រើជាមួយស្វាមីរបស់គាត់ជាអ្នកដឹកនាំបេសកកម្ម គូណាវ៉ាកា ម៉ិកស៊ិក ។

គាត់ក៏បានបម្រើជាប្រធានសមាគមសង្គ្រោះ ប្រធានថ្នាក់យុវនារី និងប្រធានថ្នាក់កុមារវួដ គ្រូបង្រៀនថ្នាក់សិក្ខាសាលាពេលព្រឹកព្រលឹម អ្នកផ្ដល់ប្រឹក្សាដល់មជ្ឈិមនៅលីវក្នុងវួដនិយាយភាសាអេស្ប៉ាញ និងអ្នកផ្សព្វផ្សាយសាសនានៅបេសកកម្ម រ៉េស៊ីស្ទិនស៊ីអា អាហ្សង់ទីន ។