បងប្រុស ប្រាដលី អរ វីលខក់

ទីប្រឹក្សាទីមួយនៅក្នុងគណៈប្រធានយុវជនទូទៅ

ជាច្រើនឆ្នាំមុនពេលចូលបម្រើជាទីប្រឹក្សានៅក្នុងគណៈប្រធានយុវជនទូទៅ បងប្រុស ប្រាដលី អរ វីលខក់ និងភរិយាលោក ឌែប៊ី បានបញ្ជូនកូនប្រុសអាយុ ១៤ ឆ្នាំដែលស្ទាក់ស្ទើរទៅកម្មវិធីពិសេសសម្រាប់យុវជន ( EFY ) នៅសាកលវិទ្យាល័យ ព្រិកហាំ យ៉ង់ ។

ពួកគាត់ព្រួយបារម្ភថាគាត់ « គ្មានឆ្អឹងខាងវិញ្ញាណនៅក្នុងរាងកាយរបស់គាត់ » ។ កូនប្រុសគាត់បានមកផ្ទះវិញដោយមានការផ្លាស់ប្តូរ—ផ្ដោតអារម្មណ៍ និងយកចិត្តទុកដាក់ចំពោះរឿងខាងវិញ្ញាណជាងមុន ។ ច្រើនឆ្នាំក្រោយមក គាត់កំពុងបម្រើនៅក្នុងគណៈប៊ីស្សព និងណែនាំយុវវ័យនៅក្នុងវួដរបស់គាត់ផ្ទាល់ ។

នោះគឺជាអ្វីដែលបងប្រុស វីលខក់ បានសង្កេតឃើញម្តងហើយម្តងទៀតនៅរដូវក្តៅមុន ខណៈដែលយុវវ័យនៃពួកបរិសុទ្ធថ្ងៃចុងក្រោយនៅទូទាំងពិភពលោកបានចូលរួមក្នុងសន្និសីទដើម្បីកម្លាំងនៃយុវជន ( FSY ) ។ ម្តងហើយម្តងទៀត ពួកយុវវ័យដែល « មិនប្រាកដថាពួកគេចង់ទៅឬអត់នោះ » បានត្រឡប់មកផ្ទះវិញដោយមានការផ្លាស់ប្តូរ និងប្រសើរជាងមុន ។

បងប្រុស វីលខក់—ដែលបានកាន់តំណែងជាទីប្រឹក្សាទីពីរនៅក្នុងគណៈប្រធានយុវជនទូទៅតាំងពីឆ្នាំ ២០២០ និងត្រូវបានគាំទ្រជាទីប្រឹក្សាទីមួយអំឡុងសន្និសីទទូទៅនៅខែ មេសា ឆ្នាំ ២០២៣—បានមានប្រសាសន៍ថា នេះជាពេលវេលាដ៏រំភើបមួយដើម្បីបម្រើដល់យុវវ័យនៃពួកបរិសុទ្ធថ្ងៃចុងក្រោយ ។ គណៈប្រធានយុវជន និងយុវនារីទូទៅកំពុងធ្វើការជាមួយគ្នាជាទៀងទាត់ ហើយ « សន្និសីទដើម្បីកម្លាំងនៃយុវជន មគ្គុទ្ទេសក៍ និងទស្សនាវដ្ដីមានសម្រាប់យុវវ័យច្រើនជាងពេលមុនៗ » ។

ប្រាដលី រ៉េ វីលខក់ មានវ័យ ៦៣ ឆ្នាំ កើតនៅទីក្រុងប្រូវ៉ូ រដ្ឋយូថាហ៍ ស.រ.អា. នៅថ្ងៃ ទី ២៥ ខែ ធ្នូ ឆ្នាំ ១៩៥៩ ដែលមានឪពុកឈ្មោះ រ៉េ ធី វីលខក់ និងម្ដាយឈ្មោះ វ៉ាល ស៊ី វីលខក់ ។ លោកបានធំឡើងនៅទីក្រុងប្រូវ៉ូ និងបានចំណាយកុមារភាពពីរបីឆ្នាំនៅប្រទេស អេត្យូពី ។

បន្ទាប់ពីបានបំពេញបេសកកម្មពេញម៉ោងនៅ វីណា ឌែល ម៉ា ប្រទេសឈីលី បងប្រុស វីលខក់ បានរៀបការជាមួយ ដេបូរ៉ា ហ្គីណែល នៅឯព្រះវិហារបរិសុទ្ធ ប្រូវ៉ួ យូថាហ៍ នៅខែ តុលា ឆ្នាំ ១៩៨២ ។ ពួកគាត់មានបុត្របួននាក់ និងរស់នៅរដ្ឋប្រូវ៉ូ យូថាហ៍ ។

បងប្រុស វីលខក់ មានបរិញ្ញាបត្រ និងបរិញ្ញាបត្រជាន់ខ្ពស់ពីសាកលវិទ្យាល័យ ព្រិកហាំ យ៉ង់ ( ប៊ី.វ៉ាយ.យូ. ) និងបណ្ឌិតផ្នែកអប់រំពីសាកលវិទ្យាល័យ វ៉ាយអូមីង ។ លោកគឺជាសាស្ត្រាចារ្យនៅនាយកដ្ឋានព្រះគម្ពីរបុរាណនៅ ប៊ី.វ៉ាយ.យូ. ។ ចាប់តាំងពីឆ្នាំ ១៩៨៥ លោកបានលះបង់ពេលសម្រាកនៃរដូវក្តៅរបស់លោកដើម្បីចូលរួមកម្មវិធី EFY របស់ ប៊ី.វ៉ាយ.យូ. ។

បងប្រុស វីលខក់ បានបម្រើជាប៊ីស្សព និងក្នុងគណៈប្រធានស្តេក ជាប្រធានបេសកកម្ម ឈីលី សានទីអាហ្គោ ខាងកើត និងនៅក្រុមប្រឹក្សាភិបាលទូទៅសាលាថ្ងៃអាទិត្យ ។