ការងារបម្រើនៅទូទាំងសកលលោករបស់ពួកសាវកនៅតែបន្ត
អែលឌើរ ដាវីឌ អេ បែដណា បានធ្វើទស្សនកិច្ចនៅ ប្រទេសស្វីស ប្រទេសអូទ្រីស ប្រទេសអាល់បានី និងប្រទេសហុងគ្រី ក្នុងខែ តុលា ឆ្នាំ ២០២២ ។ នៅប្រទេសស្វីស លោកបានជួបជាមួយអ្នកការទូតជាន់ខ្ពស់របស់អង្គការសហប្រជាជាតិ និងអ្នកតំណាងអង្គការពិភពលោកដែលសហការជាមួយសាសនាចក្រលើគម្រោងមនុស្សធម៌ ។ នៅប្រទេសផ្សេងៗទៀត លោកបានជួបជាមួយសមាជិក ដែលភាគច្រើនជាអ្នកត្រួសត្រាយក្នុងសេចក្ដីជំនឿនៅក្នុងប្រទេសទាំងនោះ ។
លោកបានមានប្រសាសន៍ថា ៖ « យើងកំពុងរួមគ្នាជាមួយពួកបរិសុទ្ធដែលកំពុងកសាងគ្រឹះនៃសាសនាចក្រដែលនឹងនៅរឹងមាំទៅមុខជាច្រើនជំនាន់ទៀត » ។
ចេញពីមជ្ឈមណ្ឌលសម្រាប់អ្នកទស្សនានៅព្រះវិហារបរិសុទ្ធ សៅ ប៉ូវឡូ នៅថ្ងៃទី ១០ ខែ វិច្ឆិកា ឆ្នាំ ២០២២ អែលឌើរ រ៉ូណល អេ រ៉ាសបាន បានចូលរួមក្នុងការផ្សាយបន្តផ្ទាល់តាមបណ្ដាញសង្គមហ្វេសប៊ុក ដោយចែកចាយសក្ខីភាពរបស់លោកអំពីព្រះអង្គសង្គ្រោះព្រះយេស៊ូវគ្រីស្ទ ។
« សូមចងចាំជានិច្ចថា ព្រះយេស៊ូវគ្រីស្ទគឺជាស្ដេចលើអស់ទាំងស្ដេច ។ ទ្រង់ជាព្រះអម្ចាស់លើអស់ទាំងព្រះអម្ចាស់ និងជាម្ចាស់នៃមេត្រីភាព » អែលឌើររ៉ាសបាន បានថ្លែងទីបន្ទាល់ ។
នៅខែ វិច្ឆិកា អែលឌើរ ហ្គែរី អ៊ី ស្ទីវ៉ែនសុន បានថ្លែងសុន្ទរកថាទៅកាន់វេទិកាសាសនា ជី២០ នៅបាលី ប្រទេសឥណ្ឌូនេស៊ីផងដែរ ។ លោកបានមានប្រសាសន៍ថា ជំនឿអាចជួយដោះស្រាយបញ្ហាពិភពលោកបានល្អបំផុត នៅពេល « ពួកគេស្មោះត្រង់ចំពោះគោលការណ៍ចម្បងរបស់ពួកគេ ខណៈដែលត្រូវបានណែនាំដោយពន្លឺ និងចំណេះដឹងដ៏ទេវភាពបន្ថែមទៀតផងដែរ » ។
ប្រធាន អិម រ័សុល បាឡឺដ ជាប្រធានស្តីទីក្នុងកូរ៉ុមនៃពួកសាវកទាំងដប់ពីរនាក់បានថ្លែងទៅកាន់អ្នកផ្សព្វផ្សាយសាសនានៅមជ្ឈមណ្ឌលបំពាកបំប៉នអ្នកផ្សព្វផ្សាយសាសនាទីក្រុង ម៉ិកស៊ិក កាលពីខែ ធ្នូ ឆ្នាំ ២០២២ និងបានធ្វើជាសាក្សីអំពី « ឯកសិទ្ធិនៃការប្រកាសទៅកាន់ពិភពលោកថា ព្រះយេស៊ូវគ្រីស្ទគឺជាព្រះអង្គសង្គ្រោះ និងជាព្រះប្រោសលោះរបស់មនុស្សជាតិទាំងអស់ » ។
អែលឌើរ ជែហ្វ្រី អ័រ ហូឡិន បានទៅទស្សនកិច្ចថ្នាក់សិក្ខាសាលានៅ រដ្ឋកាលីហ្វ័រញ៉ា ស.រ.អា. និងបានថ្លែងទៅកាន់សមាជិកនិយាយភាសាអេស្ប៉ាញក្នុងស្តេកចំនួនប្រាំបីនៅជុំវិញទីក្រុងវេនធូវ៉ា រដ្ឋកាលីហ្វ័រញ៉ា កាលពីខែ ធ្នូ ឆ្នាំ ២០២២ ។ លោកបានមានប្រសាសន៍ជាភាសាអង់គ្លេស និងអេស្ប៉ាញ ។ លោកបានជំរុញសមាជិកឲ្យផ្តោតយកចិត្តទុកដាក់ទៅលើយុវវ័យ និងបានសុំឲ្យយុវវ័យ និងថ្នាក់ដឹកនាំដែលបានចូលរួមនោះក្លាយជាអ្នកផ្សព្វផ្សាយសាសនាឥឡូវនេះដោយសារតែ « ព្រះមានព្រះជន្មរស់ បងប្អូនប្រុសស្រីអើយ ព្រះមានព្រះជន្មរស់ ។ សាសនាចក្រគឺពិត ! »
ប្រធាន ដាល្លិន អេក អូក ជាទីប្រឹក្សាទីមួយក្នុងគណៈប្រធានទីមួយបានថ្លែងទៅកាន់សមាជិក និងមិត្តទាំងឡាយនៃសាសនាចក្រក្នុង រដ្ឋអិលលីណយ រដ្ឋអ៊ិនឌីអាណា និងរដ្ឋវីសខនស៊ីន ស.រ.អា. នៅថ្ងៃទី ១១ ខែ កុម្ភៈ ឆ្នាំ ២០២៣ ។ លោកបានមានប្រសាសន៍ចេញពីមជ្ឈមណ្ឌលស្តេកនៅ វីលម៉េត រដ្ឋអិលលីណយ ជាមួយនឹងការប្រជុំដែលបានចាក់ផ្សាយទៅកាន់ស្តេកចំនួន ១៤ ។ នៅល្ងាចស្អែកឡើង លោកបានថ្លែងទៅកាន់យុវវ័យ និងយុវមជ្ឈិមវ័យប្រហែល ៩០០ នាក់ដែលបានប្រមូលផ្តុំគ្នានៅមជ្ឈមណ្ឌល ស្តេក រ៉ុកហ្វត រដ្ឋអិលលីណយ ។ ការប្រជុំនេះត្រូវបានចាក់ផ្សាយទៅកាន់ទីតាំងបន្ថែមទៀតនៅ រដ្ឋអិលលីណយ រដ្ឋអ៊ិនឌីអាណា និង រដ្ឋវីសខនស៊ីន ។
សមាជិក និងអ្នកស្ម័គ្រចិត្តបម្រើនៃសាសនាចក្រនៅក្នុងប្រទេសឥណ្ឌា បានស្វាគមន៍អែលឌើរ ឌៀថើរ អេហ្វ អុជដូហ្វ នៅពេលដែលលោកបានទៅទស្សនកិច្ចនៅទីក្រុង ញ៉ូវដេលី ហាយឌើរ៉ាបាដ និងបាងហ្គូរូ ចាប់ពីថ្ងៃទី ៦ ដល់ថ្ងៃទី ១៧ ខែ កុម្ភៈ ។ អែលឌើរ អុជដូហ្វ បានប្រកាសថា ៖ « ពួកយើងស្រឡាញ់ប្រទេសឥណ្ឌា និងប្រជាជនឥណ្ឌា » ។ « ពួកយើងមានអារម្មណ៍រំភើប និងមានក្ដីកោតសរសើរយ៉ាងក្រៃលែង » ។
អែលឌើរ ឃ្វីនថិន អិល ឃុក បានបង្រៀនពួកបរិសុទ្ធនៅម៉ាដាហ្គាស្កា ហ្សាំប៊ី និងម៉ូហ្សាំប៊ីក ក្នុងអំឡុងពេលទស្សនកិច្ចមួយនៅខែ កុម្ភៈ ។ មនុស្សជាង ៥០០ នាក់ដែលមិនមែនជាសមាជិកសាសនាចក្របានចូលរួមក្នុងសន្និសីទស្តេករួមគ្នាមួយនៅទីក្រុងម៉ាភូតូ ប្រទេស ម៉ូហ្សាំប៊ីក ដើម្បីស្តាប់សាវកមានប្រសាសន៍ ។ អែលឌើរ ឃុក បានមានប្រសាសន៍ថា ៖ « ដោយសារមានមនុស្សជាច្រើនដែលមិនមែនជាសមាជិកនៃជំនឿរបស់យើងនៅការប្រជុំថ្ងៃអាទិត្យ នោះយើងបានកែសម្រួលសារលិខិតរបស់យើងឲ្យផ្ដោតលើគោលការណ៍នៃគោលលទ្ធិ និងទុកនូវទិដ្ឋភាពធំនៃដំណឹងល្អមួយឡែក ណែនាំពីសារៈសំខាន់នៃព្យាការី និងកសាងសេចក្ដីជំនឿទៅលើព្រះយេស៊ូវគ្រីស្ទ និងដង្វាយធួនរបស់ទ្រង់ » ។
នៅខែ កុម្ភៈ អែលឌើរ ឌី ថត គ្រីស្តូហ្វឺសិន បានទៅសួរសុខទុក្ខសមាជិកនៅប្រទេស ហ្គាណា នីហ្សេរីយ៉ា កូតឌីវ័រ និងលីបេរីយ៉ា ក្នុងអំឡុងពេលទស្សនកិច្ចរយៈពេល ១២ ថ្ងៃនៅអាហ្វ្រិកខាងលិច ។ ដំណើរទស្សនកិច្ចនេះរួមមានការប្រជុំមួយជាមួយប្រធានាធិបតីនៃប្រទេសហ្គាណា ។ ពួកលោកបានពិភាក្សាអំពីការផ្តោតរួមគ្នាមួយទៅលើការអប់រំ និងពិនិត្យឡើងវិញនូវកម្មវិធី BYU–Pathway Worldwide និង Gathering Place ។
អែលឌើរ ឌែល ជី រិនឡាន់ បានទៅទស្សនកិច្ចនៅប្រទេស ហុងដូរ៉ាស់ ប៊េលីស ប៉ាណាម៉ា នីការ៉ាហ្គូ និងហ្គាតេម៉ាឡា ក្នុងខែ កុម្ភៈ ។ ស៊ីស្ទើរ រ៉ុស ភរិយារបស់អែលឌើរ រិនឡាន់ បានអមដំណើរលោក ។ ក្នុងដំណើរទស្សនកិច្ចរបស់លោក លោកបានទៅកាន់មន្ទីរពេទ្យមួយនៅប្រទេសនីការ៉ាហ្គ័រ ហើយស៊ីស្ទើរ រិនឡាន់ បានជួយដល់ការបរិច្ចាគរបស់សាសនាចក្រនូវកញ្ចប់អនាម័យ និងសម្លៀកបំពាក់សម្រាប់ជនចំណាកស្រុកនៅ ប្រទេស ហុងឌូរ៉ាស ។
នៅខែ មិនា អែលឌើរ នែល អិល អាន់ឌើរសិន បានទៅទស្សនកិច្ចនៅប្រទេសប្រេស៊ីល ជាកន្លែងដែលលោកបានជួបជាមួយមេដឹកនាំស៊ីវិលដ៏លេចធ្លោ ទៅទស្សនាព្រះវិហារបរិសុទ្ធ ប្រាស៊ីលៀ ប្រទេសប្រេស៊ីល ដែលនឹងត្រូវធ្វើការឧទ្ទិសឆ្លងក្នុងពេលឆាប់ៗនេះ ហើយបានបង្រៀន និងធ្វើជាសាក្សីដល់សមាជិក អ្នកផ្សព្វផ្សាយសាសនា និងអ្នកដឹកនាំទូទាំងប្រទេស ។ ក្នុងដំណើរទស្សនកិច្ចនេះ លោក និងស៊ីស្ទើរ ខាត់ធី អែនឌើរសិន បានជួបជាមួយស្រ្តីទីមួយនៃប្រទេសប្រេស៊ីល ។
ក្នុងអំឡុងពេលធ្វើទស្សនកិច្ចនៅខែមីនាទៅកាន់ប្រទេសម៉ិកស៊ិក អែលឌើរ ហ្គើរីត ដបុលយូ ហ្គង បានជួបជាមួយលោក អាដាន់ អូហ្គូសតូ ឡូប៉េស រដ្ឋមន្ត្រីក្រសួងមហាផ្ទៃម៉ិកស៊ិក ។ ឡូប៉េស គឺជាមន្ត្រីជាន់ខ្ពស់ទីពីរនៅក្នុងរដ្ឋាភិបាលម៉ិកស៊ិក ។ នៅក្នុងការប្រជុំមួយនៅទីស្នាក់ការកណ្តាលនៃក្រសួងមហាផ្ទៃ អែលឌើរ ហ្គង បានមានប្រសាសន៍អំពីកិច្ចខិតខំដែលសាសនាចក្រធ្វើដើម្បីពង្រឹងដល់ក្រុមគ្រួសារក្នុងប្រទេសម៉ិកស៊ិក ។ លោកបានមានប្រសាសន៍ថា ៖ « តាមរយៈការធ្វើដូច្នេះ យើងកំពុងចូលរួមចំណែកក្នុងការជួយពង្រឹងដល់សង្គម » ។
អែលឌើរ អូលីសេស សូរ៉េស បានលើកទឹកចិត្តពួកបរិសុទ្ធថ្ងៃចុងក្រោយនៅក្នុងតំបន់ប៉ាស៊ីហ្វិក ឲ្យរក្សាការផ្តោតយកចិត្តទុកដាក់របស់ពួកគេទៅលើព្រះយេស៊ូវគ្រីស្ទ ។ លោកបានមានប្រសាសន៍នៅក្នុងខែ មីនា ក្នុងអំឡុងពេលទស្សនកិច្ចនៅប្រទេសនូវែលសេឡង់ តុងហ្គា និងហ្វីជីថា ៖ « នៅពេលយើងផ្តោតជីវិតរបស់យើងទៅលើព្រះអង្គសង្គ្រោះព្រះយេស៊ូវគ្រីស្ទ ហើយខិតខំរស់នៅតាមដំណឹងល្អដែលបានស្ដារឡើងវិញរបស់ទ្រង់ នោះយើងតែងតែអាចរកឃើញនូវភាពសុខសាន្ត ការសម្រាក និងអំណរក្នុងដំណើររបស់យើងជានិច្ច » ។