« ស៊ីស៊ីស្ទើរ តាម៉ារ៉ា ដបុលយូ រុននៀ » លីអាហូណាខែ ឧសភា ឆ្នាំ ២០២៣ ។
ស៊ីស្ទើរ តាម៉ារ៉ា ដបុលយូ រុននៀ
ទីប្រឹក្សាទីមួយនៅក្នុងគណៈប្រធានយុវនារីទូទៅ
ពេញមួយជីវិត ស៊ីស្ទើរ តាម៉ារ៉ា ( ថាមមី ) ដបុលយូ រុញនៀ បានមានការហៅបម្រើផ្សេងៗគ្នា—គ្រូបង្រៀនថ្នាក់ព្រះគម្ពីរស្ដេក ទីប្រឹក្សានៅក្នុងគណៈប្រធានសមាគមសង្គ្រោះស្តេក ជាអ្នកដឹកនាំជាមួយស្វាមីរបស់គាត់នៅក្នុងបេសកកម្ម ស៊ីដនី អូស្ត្រាលី—ប៉ុន្តែគាត់បានចំណាយពេលភាគច្រើននៃការបម្រើរបស់គាត់ជាមួយយុវនារី ។
ស៊ីស្ទើរ រុននៀ ដែលធ្លាប់បម្រើជាប្រធានយុវនារីស្ដេកមានប្រសាសន៍ថា ៖ « ខ្ញុំស្រឡាញ់រាល់ការហៅបម្រើដែលខ្ញុំធ្លាប់មាន » ។ ប៉ុន្តែគាត់បានបន្ថែមថា ៖ « ខ្ញុំត្រូវតែនិយាយថា ពេលនៅជាមួយពួកយុវនារី ខ្ញុំមានអារម្មណ៍ដូចនៅផ្ទះអ៊ីចឹង » ។
ស៊ីស្ឬើរ រុននៀ បានមានប្រសាសន៍ថា គាត់បានទៅបោះជំរំជាមួយយុវនារីជាង ២០ ដងហើយ ។ មានឆ្នាំមួយនោះ គាត់ថែមទាំងត្រូវបានគេសូមឲ្យចូលរួមជាមេក្រុមលើកទឹកចិត្តក្នុងជំរំទៀតផង ។
គាត់ចង់ឲ្យយុវនារីទាំងអស់ដឹងថា តើព្រះវរបិតាសួគ៌ស្រឡាញ់ពួកគេប៉ុនណា ។ គាត់បានមានប្រសាសន៍ថា សេចក្តីស្រឡាញ់នោះគឺ « ធំដូចវេហា ជ្រៅដូចមហាសមុទ្រ » ។ គាត់បានបន្ថែមថា ព្រះវរបិតាសួគ៏ « សព្វព្រះទ័យឲ្យពួកគេទាំងអស់គ្នាត្រឡប់ទៅផ្ទះវិញ » ។
គាត់បានមានប្រសាសន៍ថា អារម្មណ៍នៃទំនាក់ទំនងនោះនឹងផ្លាស់ប្តូរជីវិតយុវនារី « ពីព្រោះវាបានផ្លាស់ប្ដូរជីវិតរបស់ខ្ញុំរួចហើយ » ។
ស៊ីស្ទើរ រុននៀ បានកើតនៅថ្ងៃទី ២ ខែ មីនា ឆ្នាំ ១៩៦១ នៅ ខនខត រដ្ឋកាលីហ្វ័រញ៉ា ស.រ.អា. ដែលមានឳពុកឈ្មោះ វីនសិន អាលម៉ា វូឌ និងម្ដាយឈ្មោះ ហ្គែល ហិលតុន វូឌ ។ គាត់បានធំឡើងនៅ វ៉លណាត់ ក្រីក រដ្ឋកាលីហ្វ័រញ៉ា ។
គាត់គឺជានិសិ្សតឆ្នាំទីមួយនៅសាកលវិទ្យាល័យ ព្រិកហាំ យ៉ង់ ដែលសិក្សាផ្នែកការផ្សាយសារព័ត៌មាន នៅពេលគាត់បានជួប អ ស្កត រុននៀ ។ ពួកគាត់បានរៀបអាពាហ៍ពិពាហ៍នៅខែ ឧសភា ឆ្នាំ ១៩៨១ នៅឯព្រះវិហារបរិសុទ្ធអូកក្លែន រដ្ឋកាលីហ្វ័រញ៉ា ។ ពួកគាត់មានបុត្រចំនួនប្រាំពីរនាក់ ហើយបច្ចុប្បន្នរស់នៅក្នុងទីក្រុង ប្រូវ៉ូ រដ្ឋយូថាហ៍ ។
ស៊ីស្ទើរ រុននៀ ត្រូវបានគាំទ្រជាទីប្រឹក្សាទីមួយក្នុងគណៈប្រធានយុវនារីទូទៅថ្មី អំឡុងសន្និសីទទូទៅខែ មេសា ។ គាត់នឹងចាប់ផ្តើមការបម្រើរបស់គាត់នៅថ្ងៃទី ១ ខែ សីហានេះហើយ ។
ក្រៅពីការបម្រើរបស់គាត់នៅក្នុងសាសនាចក្រ គាត់បានចំណាយពេល ២០ ឆ្នាំនៅក្នុងក្រុមប្រឹក្សាភិបាលសម្ព័ន្ធស្បៀងអាហារ និងការថែទាំក្នុងទីក្រុង ប្រូវ៉ូ ដែលផ្តល់ធនធានដល់អ្នកគ្មានផ្ទះសម្បែង និងអ្នកមានចំណូលទាប ។