អែលឌើរ អេឡាន ធី ហ្វីលីប

ពួកចិតសិបនាក់ដែលមានសិទ្ធិអំណាចទូទៅ

តាំងពីវ័យក្មេង អែលឌើរ អេឡាន ធី ហ្វីលីប មានអារម្មណ៍ថា សាសនាចក្រពិត ប៉ុន្តែលោកសង្ឃឹមថា នឹងមានសាក្សីផ្ទាល់ខ្លួនបន្ថែមទៀតអំពីព្រះអង្គសង្គ្រោះ មុននឹងចាប់ផ្ដើមបម្រើកិច្ចការផ្សព្វផ្សាយសាសនាពេញម៉ោង ។

លោកបានមានប្រសាសន៍ថា ៖ « ខ្ញុំបានតមអារហារ អធិស្ឋាន ចូលទៅក្នុងព្រៃ » ។ « ខ្ញុំកំពុងស្វែងរកចម្លើយដ៏ធំ » ។

បន្ទាប់មក នៅពេលដែលគ្រួសាររបស់លោកបានមានការចាត់តាំងឲ្យទៅឆ្ងាយមួយសប្ដាហ៍ លោកបានចូលរួមការប្រជុំសាក្រាម៉ង់ដោយខ្លួនឯង ។

« ខ្ញុំមិនបានស្វែងរកចម្លើយទេ ។ លោកបានមានប្រសាសន៍ថា ៖ « ខ្ញុំគ្រាន់តែនៅទីនោះ—រៀបចំទទួលទានសាក្រាម៉ង់ ហើយច្រៀងជាមួយក្រុមជំនុំ » « ជាលើកដំបូង ពាក្យ និងគំនិតថា ‹ ព្រះហស្តដែលត្រូវហូរឈាមដើម្បីបង់ថ្លៃ ›^១ សម្រាប់ខ្ញុំបានផុសឡើង ហើយចូលទៅក្នុងដួងចិត្តរបស់ខ្ញុំ ។ ខ្ញុំបានទទួលអារម្មណ៍នៃភាពពិតប្រាកដរបស់ទ្រង់ទាក់ទងនឹងខ្ញុំ លែងជាគំនិត លែងជាអរូបីទៀតហើយ ។ នៅខណៈនោះ ទ្រង់ជាព្រះអង្គសង្គ្រោះរបស់ខ្ញុំ ។

ក្រោយមក អែលឌើរ ហ្វីលីប បានអធិស្ឋានថ្លែងអំណរគុណព្រះវរបិតាសួគ៌ ហើយទូលទ្រង់ថា លោកនឹងស្មោះត្រង់ចំពោះចំណេះដឹងថ្មីនេះដែលព្រះបានប្រទានដល់លោកពេញមួយជីវិតរបស់លោក ។

នោះគឺជាគ្រាដែលភាពពិតនៃព្រះអង្គសង្គ្រោះត្រូវបានបញ្ជាក់ដល់លោក ។ លោកបានមានប្រសាសន៍អំពីអ្វីៗផ្សេងទៀតនៅក្នុងសក្ខីភាពរបស់លោកដែលសាងឡើងពី « គ្រឹះដ៏ខ្ជាប់ខ្ជួន » នោះ ( ហេលេមិន ៥:១២ ) ។

អេឡាន ធី ហ្វីលីប បានកើតនៅ ខេន ប្រទេសអង់គ្លេស ក្នុងខែ មិថុនា ឆ្នាំ ១៩៧០ និងបានធំឡើងនៅ បាក់ឃីងហេមសៀ ប្រទេសអង់គ្លេស ។ លោកបានរៀបការនឹង លីនស៊ី ឡោក នៅខែ កក្កដា ឆ្នាំ ២០០៥ នៅឯព្រះវិហារបរិសុទ្ធ មេសា អារីហ្សូណា ។ ពួកគាត់មានបុត្របួននាក់ និងជាសមាជិកនៃហាយផាកស្តេកប្រវត្តិសាស្ត្ររបស់សាសនាចក្រ ក្នុងទីក្រុងឡុងដ៍ ។

អែលឌើរ ហ្វីលីប បានទទួលបរិញ្ញាបត្រ និងបរិញ្ញាបត្រជាន់ខ្ពស់ពីសាលាទីក្រុងឡុងដ៍ផ្នែកសេដ្ឋកិច្ច និងវិទ្យាសាស្ត្រនយោបាយ ។ លោកបានធ្វើការឲ្យអង្គការផ្សេងៗក្នុងវិស័យពាណិជ្ជកម្ម ហិរញ្ញវត្ថុ និងការអប់រំរួមទាំងរយៈពេល ៤ ឆ្នាំកន្លងមកនេះ ជានាយកសិក្សានៃមជ្ឈមណ្ឌលសាកលវិទ្យាល័យ ព្រិកហាំ យ៉ង់ ទីក្រុងឡុងដ៍ ។

អែលឌើរ ហ្វីលីប បានបម្រើជាអ្នកផ្សព្វផ្សាយសាសនាពេញម៉ោងនៅក្នុងបេសកកម្ម មេនឆេសស្ទ័រ ប្រទេសអង់គ្លេស ។ លោកបានបម្រើជាទីប្រឹក្សាក្នុងគណៈប្រធានតំបន់អឺរ៉ុបខាងជើង ក្រុមចិតសិបនាក់ ប្រធានស្តេក ទីប្រឹក្សាក្នុងគណៈប្រធានស្តេក ទីប្រឹក្សាជាន់ខ្ពស់ និងទីប្រឹក្សាក្នុងគណៈប៊ីស្សព ។