របាយការណ៍ ឆ្នាំ ២០២២ ៖ ការមើលថែដល់អ្នកខ្វះខាត
របាយការណ៍ប្រចាំឆ្នាំ ២០២២ របស់សាសនាចក្រស្តីពីការមើលថែដល់អ្នកខ្វះខាតបង្ហាញថា ការងារនេះរួមមានការចំណាយជាង ១ ពាន់លានដុល្លារ ៦,៣ លានម៉ោងស្ម័គ្រចិត្ត និងគម្រោងមនុស្សធម៌ចំនួន ៣ ៦៩២ នៅក្នុងប្រទេស និងទឹកដីចំនួន ១៩០ ។
ថវិកានេះបានផ្ដល់ទៅឲ្យជំនួយដង្វាយតមអាហារ ជំនួយមនុស្សធម៌ ទំនិញដែលបានចែកចាយពីឃ្លាំងរបស់ប៊ីស្សព និងហាងឧស្សាហកម្មដេសឺរ៉េត និងប្រតិបត្តិការផ្សេងៗដូចជា កសិដ្ឋាន កន្លែងផលិត និងវេចខ្ចប់អាហារ សេវាកម្មការប្រឹក្សាគ្រួសារ និងមជ្ឈមណ្ឌលការងារ ។
ការបរិច្ចាគជារូបិយវត្ថុដ៏ច្រើនជាងគេបំផុតដែលសាសនាចក្របានផ្តល់ឲ្យនៅឆ្នាំ ២០២២ រួមមានទឹកប្រាក់ចំនួន ៣២ លានដុល្លារដល់កម្មវិធីស្បៀងអាហារពិភពលោក (WFP) និង ៥ លានដុល្លារដល់កម្មវិធីអាហារូបត្ថម្ភជាសកលរបស់អង្គការយូនីសែហ្វ ដែលជួយកុមារដែលខ្វះអាហារូបត្ថម្ភ ។
ប្រធានសមាគមសង្គ្រោះទូទៅ ខាំមៀល អិន ចនសុន បានមានប្រសាសន៍ពេលការបរិច្ចាគទៅ WFP ត្រូវបានប្រកាសថា ៖ « ព្រះយេស៊ូវមានចិត្តទន់ភ្លន់ចំពោះកុមារ » ។ « ទ្រង់សោកសៅ ពេលឃើញពួកគេស្រេកឃ្លាន ។ ហើយទ្រង់សប្បាយព្រះទ័យចំពោះការខិតខំដ៏តូចបំផុតដើម្បីជួយពួកគេផងដែរ » ។
ការបរិច្ចាគដ៏សំខាន់ផ្សេងទៀតរួមមាន ទឹកប្រាក់ចំនួន ៥,១ លានដុល្លារទៅកាកបាទក្រហមអាមេរិក ( បន្ថែមពីលើនោះ ឈាមជាង ១ លានប្លោកបានបរិច្ចាគដោយពួកបរិសុទ្ធថ្ងៃចុងក្រោយ ) និងទឹកប្រាក់ ៥ លានដុល្លារផ្សេងទៀតទៅអង្គការ RotaryInternational សម្រាប់ការចាក់វ៉ាក់សាំងបង្ការជំងឺគ្រុនស្វិតដៃជើង និងតេតាណូសសម្រាប់មាតា និងទារក ។
សាសនាចក្រក៏បានធ្វើការរួមចំណែកផ្នែកហិរញ្ញវត្ថុដ៏សំខាន់ដើម្បីជួយជាដំណោះស្រាយដល់ការកើនឡើងនៃចំនួនមនុស្ស ដែលរងផលប៉ះពាល់ដោយគ្រោះមហន្តរាយធម្មជាតិ និងសង្គ្រាមផងដែរ ។ នេះរួមមានការជួយសង្គ្រោះដល់ជនភៀសខ្លួនអ៊ុយក្រែន អ្នកនៅរស់រានមានជីវិតពីរលកយក្សស៊ូណាមិនៅតុងហ្គា ជនរងគ្រោះដោយសារខ្យល់ព្យុះនៅរដ្ឋខេនថាកគី រដ្ឋផ្លរីដា និងអាហ្វ្រិកខាងត្បូង និងជនរងគ្រោះដោយសារសង្រ្គាមស៊ីវិលនៅសាធារណរដ្ឋប្រជាធិបតេយ្យកុងហ្គោ ។
ជូលៀជាសមាជិកសាសនាចក្រនៅប្រទេសអូទ្រីស ដែលបានជួយជនភៀសខ្លួននៅក្នុងប្រទេសអឺរ៉ុបខាងកើតជាច្រើនបាននិយាយថា ៖ « សេចក្តីស្រឡាញ់ និងបំណងប្រាថ្នាក្នុងការជួយគឺមានច្រើនលើសលប់ » ។ « ចិត្តមនុស្សត្រូវបានទាញទៅរកគ្នាទៅវិញទៅមក » ។
សាសនាចក្រក៏បានជួយនាំយកអគ្គិសនីទៅកាន់សហគមន៍មួយឈ្មោះ ណាវ៉ាហូ នៅរដ្ឋយូថាហ៍ ហើយសមាជិកសាសនាចក្របានធ្វើការជាមួយក្រុមសាសនាស៊ីកស៍ នៅក្នុងគម្រោងសេវាកម្មមួយនៅអារ៉ាប់អេមីរ៉េតរួម ។ ពួកបរិសុទ្ធថ្ងៃចុងក្រោយបានធ្វើការជាដៃគូជាមួយអង្គការ NAACP លើគម្រោងការងារបម្រើសហគមន៍សម្រាប់ម្តាយនៅ មេមភីស ក្នុង រដ្ឋធេននីស៊ី ស.រ.អា. និងអ្នកដែលត្រូវការអាហារសុខភាពនៅទីក្រុង សាន់ហ្វ្រាន់ស៊ីស្កូ រដ្ឋកាលីហ្វ័រញ៉ា ។ ហើយកម្មវិធី Light the World Giving Machines បានប្រមូលមូលនិធិដើម្បីទិញអាហារ និងរបស់របរផ្សេងៗទៀត សម្រាប់អ្នកខ្វះខាតក្នុងទីតាំងចំនួន ២៨ នៅជុំវិញពិភពលោក ។
ម៉ោងស្ម័គ្រចិត្តចំនួន ៦.៣ លានម៉ោងត្រូវបានបរិច្ចាគក្នុងឆ្នាំ ២០២២ រួមមាន ការបម្រើនៅកសិដ្ឋាន សួនបន្លែ អារហារកំប៉ុង និងហាងឧស្សហកម្មដែសើរែត បេសកកម្មដើម្បីមើលថែដល់អ្នកខ្វះខាត និងការបោសសំអាតក្រោយមានគ្រោះធម្មជាតិ ។
ក្រៅពីគម្រោងមនុស្សធម៌ចំនួន ៣ ៦៩២ គម្រោង គម្រោងបម្រើថ្មីចំនួន ១៦ ២៨៥ ត្រូវបានសម្របសម្រួលដោយគេហទំព័រ JustServe.org ជាគេហទំព័រស័គ្ម្រចិត្តតាមអ៊ីនធឺណិតដោយឥតគិតថ្លៃរបស់សាសនាចក្រ ដែលមាននៅក្នុងប្រទេសចំនួន ១៤ ។ ឧបករណ៍នេះភ្ជាប់មនុស្សទៅនឹងឱកាសមប្រើដែលស្របនឹងចំណាប់អារម្មណ៍ និងទីតាំងរបស់ពួកគេ ។
ប៊ីស្សពជាអធិបតី ហ្គែរ៉ល កូសសេ បាន ហៅគេហទំព័រ JustServe ថា « ជាចលនា និងរបៀបមួយដែលយើងអាចរស់នៅតាមសេចក្ដីសញ្ញារបស់យើង » និង« ផ្ដល់ពរជ័យ និងពង្រឹងសហគមន៍ [ របស់យើង ] » ( នៅក្នុង « The Blessings Will Follow: Benefits of Implementing JustServe » [ វីដេអូ ], គេហទំព័រ ChurchofJesusChrist.org ) ។
សាសនាចក្រក៏បានបន្តការផ្ដួចផ្ដើមការគ្រប់គ្រងបរិស្ថានរបស់ខ្លួនផងដែរ ។ ចាប់តាំងពីឆ្នាំ ២០១៨ មក ទីស្នាក់ការកណ្តាលនៃសាសនាចក្របានកាត់បន្ថយការប្រើប្រាស់ទឹកប្រចាំឆ្នាំរបស់ខ្លួនចំនួន ១៤៤ លានលីត្រ ។ សាលាប្រជុំជាង ៥០០ នៅទូទាំងពិភពលោកឥឡូវនេះមានបន្ទះសូឡា ។ ឧស្សាហកម្មដែសើរែត បានដំណើរការទំនិញកែច្នៃឡើងវិញចំនួន ៧៣ លានផលិតផល ។ ហើយមជ្ឈមណ្ឌលបោះពុម្ព និងចែកចាយរបស់សាសនាចក្របានកែច្នៃឡើងវិញនូវក្រដាស លោហៈធាតុ ក្រដាសកាតុង និងប្លាស្ទិកជិត ៤ ០០០ តោន ។