ព័ត៌មានសាសនាចក្រ
ការសិក្សាអំពីការងារបម្រើជាប្រធានសាសនាចក្ររយៈពេលឆ្នាំប្រាំរបស់ប្រធាន រ័សុល អិម ណិលសុន
នៅក្នុងសុន្ទរកថាជាសាធារណៈលើកដំបូងរបស់លោក ដែលបានថ្លែងកាលពីប្រាំឆ្នាំមុនក្នុងនាមជាប្រធានទី ១៧ នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ប្រធាន រ័សុល អិម ណិលសុន បានផ្ដោតការយកចិត្តទុកដាក់ទៅលើព្រះយេស៊ូវគ្រីស្ទជាងរូបលោក ហើយបន្ទាប់សម្លឹងទៅមុខ ។
លោកបានប្រកាសថា « ព្រះអម្ចាស់តែងតែបាន ហើយតែងតែនឹងបង្រៀនព្រមទាំងបំផុសគំនិតដល់ពួកព្យាការីរបស់ទ្រង់ » ។ « ព្រះអម្ចាស់គង់នៅឯចង្កូតនាវា ។ ពួកយើងដែលត្រូវបានតែងតាំងឲ្យបម្រើក្នុងនាមជាសាក្សីនៃព្រះនាមបរិសុទ្ធរបស់ទ្រង់នៅទូទាំងពិភពលោក នឹងបន្ដព្យាយាមស្គាល់ព្រះទ័យទ្រង់ ហើយធ្វើតាម » ( « នៅពេលយើងបន្តឆ្ពោះទៅមុខជាមួយគ្នា » លីអាហូណាខែ មេសា ឆ្នាំ ២០១៨ ទំព័រ ៦ ) ។
ការទទួលវិវរណៈដើម្បីដឹកនាំសាសនាចក្រ
ប្រធាន ណិលសុន បានធ្វើតាមការដឹកនាំរបស់ព្រះអម្ចាស់ នៅពេលលោកបានធ្វើដំណើរទៅកាន់ប្រទេសចំនួន ៣៥ កែសម្រួលអង្គការសាសនាចក្រ ប្រើបច្ចេកវិទ្យាដើម្បីចែកចាយដំណឹងល្អ ដឹកនាំសាសនាចក្រឆ្លងកាត់ជំងឺរាតត្បាត ចេញនូវការអញ្ជើញជាប្រវត្តិសាស្ត្រ និងកសាងស្ពាននៃការយល់ដឹង ។
ក្នុងអំឡុងពេលកាន់តំណែងជាប្រធានសាសនាចក្ររបស់លោក ប្រធាន ណិលសុន បានមានប្រសាសន៍ទៅកាន់ពួកបរិសុទ្ធថ្ងៃចុងក្រោយរាប់រយពាន់នាក់ ហើយបានចូលគាល់ព្រះមហាក្សត្យ ជួបប្រធានាធិបតី និងនាយករដ្ឋមន្ត្រីជាច្រើន ។ លោកបានលួងលោមដល់ជនរងគ្រោះដោយឧក្រិដ្ឋកម្ម និងអ្នកផ្សេងទៀតដែលសោកសៅ និងពង្រឹងទំនាក់ទំនងជាមួយមេដឹកនាំកំពូលនៃសមាគមន៍ជាតិ សម្រាប់ភាពរីកចម្រើននៃប្រជាជនចម្រុះសាសន៍ ( NAACP ) ដោយទទួលបានការអញ្ជើញឲ្យមានប្រសាសន៍នៅក្នុងមហាសន្និបាត NAACP ឆ្នាំ ២០១៩ ក្នុងទីក្រុង ឌីត្រយ រដ្ឋ មីឈីហ្គែន ស.រ.អា. ។
តាមរយៈវិវរណៈ និងដោយមានការគាំទ្រយ៉ាងពេញលេញពីគណៈប្រធានទីមួយ និងកូរ៉ុមនៃពួកសាវកដប់ពីរនាក់ លោកបានអនុម័តការផ្លាស់ប្ដូរគោលនយោបាយជាច្រើននៅក្នុងសាសនាចក្រ ។
ក្រោមការដឹកនាំដ៏បំផុសគំនិតរបស់លោក ថ្នាក់ដឹកនាំពួកបរិសុទ្ធថ្ងៃចុងក្រោយបានជំនួសការបង្រៀន និងការសួរសុខទុក្ខតាមផ្ទះដោយការផ្ដល់ការងារបម្រើ កែសម្រួលកាលវិភាគនៃការប្រជុំថ្ងៃអាទិត្យដើម្បីសម្របសម្រួលការសិក្សាដំណឹងល្អដែលគាំទ្រដោយសាសនាចក្រដែលផ្ដោតលើគេហដ្ឋាន ហើយបានសុំឲ្យសមាជិកប្រើឈ្មោះពេញ និងត្រឹមត្រូវរបស់សាសនាចក្រ ។ សាសនាចក្របានដាក់គោលនយោបាយមួយ ដែលអនុញ្ញាតឲ្យគូស្វាមីភរិយាដែលបានរៀបការតាមរដ្ឋប្បវេណីផ្សារភ្ជាប់នៅក្នុងព្រះវិហារបរិសុទ្ធភ្លាមៗ ពេលពួកគេបានត្រៀមខ្លួនរួចរាល់ ប្ដូរឈ្មោះការផ្ទៀងផ្ទាត់ដង្វាយមួយភាគក្នុងដប់ទៅជាការប្រកាសដង្វាយមួយភាគក្នុងដប់ និងបានបង្កើតគោលនយោបាយមួយដែលអនុញ្ញាតឲ្យស្ត្រីបម្រើជាសាក្សីនៃការផ្សារភ្ជាប់នៅក្នុងព្រះវិហារបរិសុទ្ធ ហើយស្ត្រី យុវវ័យ និងកុមារជាសមាជិកដែលមានភាពស័ក្ដិសមរបស់សាសនាចក្របម្រើជាសាក្សីសម្រាប់ពិធីបុណ្យជ្រមុជទឹក។
ប្រធាន ណិលសុន បានមានប្រសាសន៍នៅក្នុងសន្និសីទទូទៅរបស់សាសនាចក្រក្នុង ខែ មេសា ឆ្នាំ ២០១៨ ថា « រឿងមួយដែលព្រះវិញ្ញាណបានបំផុសគំនិតខ្ញុំម្ដងហើយម្ដងទៀត ចាប់តាំងពីការហៅថ្មីរបស់ខ្ញុំជាប្រធានសាសនាចក្រនេះ គឺថាព្រះអម្ចាស់ស្ម័គ្រព្រះទ័យដើម្បីបើកសម្ដែងព្រះទ័យ និងព្រះឆន្ទៈរបស់ទ្រង់ » ( « វិវរណៈសម្រាប់សាសនាចក្រ វិវរណៈសម្រាប់ជីវិតរបស់យើង » លីអាហូណាខែ ឧសភា ឆ្នាំ ២០១៨ ទំព័រ ៩៤ ) ។
នៅឆ្នាំ ២០២០ សាសនាចក្របានប្រារព្ធខួបលើកទីពីររយឆ្នាំនៃការនិមិត្តដំបូងរបស់យ៉ូសែបស្ម៊ីធ មិនមែនជាមួយនឹងការប្រារព្ធពិធីដ៏ធំមួយនោះទេ ប៉ុន្តែជាមួយនឹងការអញ្ជើញរបស់ថ្នាក់ដឹកនាំសាសនាចក្រ ឲ្យពួកបរិសុទ្ធថ្ងៃចុងក្រោយនៅទូទាំងពិភពលោករៀនស្តាប់សំឡេងរបស់ព្រះអម្ចាស់កាន់តែប្រសើរឡើង និងញឹកញាប់ជាងនេះ ។ នៅក្នុងសន្និសីទទូទៅខែ មេសា ឆ្នាំ ២០២០ ប្រធាន ណិលសុន បានបង្រៀន អំពីការប្រកាសដ៏ប្រវត្តិសាស្រ្តមួយ « ការស្ដារឡើងវិញនៃភាពពេញលេញនៃដំណឹងល្អនៃព្រះយេស៊ូវគ្រីស្ទ ៖ ការប្រកាសដល់ពិភពលោកនៃខួបលើកទីពីររយឆ្នាំ » ( សូមមើល « Hear Him » លីអាហូណាខែ ឧសភា ឆ្នាំ ២០២០ ទំព័រ ៩១–៩២ ) ។
ការដឹកនាំសាសនាចក្រអំឡុងកូវីដ ១៩
ជាមួយនឹងបទពិសោធន៍ជាគ្រូពេទ្យវះកាត់ផ្នែកបេះដូងមុនគេ ប៉ុន្តែកាន់តែពិសេសក្នុងនាមជាព្យាការី និងជាអ្នកដឹកនាំសាសនាទូទាំងពិភព ប្រធាន ណិលសុន បានដឹកនាំសាសនាចក្រនៅអំឡុងជំងឺរាតត្បាតកូវីដ ១៩ ដែលបានចាប់ផ្តើមនៅឆ្នាំ ២០២០ ។
ការឆ្លើយតបរបស់អង្គការសប្បុរសធម៌នៃពួកបរិសុទ្ទថ្ងៃចុងក្រោយចំពោះជំងឺរាតត្បាតនេះ បានក្លាយជាការឆ្លើយតបដ៏ធំបំផុតរហូតមកដល់ពេលនេះនៅក្នុងប្រវត្តិសាស្ត្រសាសនាចក្រ ដែលបានផ្តល់ជំនួយឲ្យទៅជាង ១៥០ ប្រទេស ។
នៅក្នុងបទសម្ភាសន៍កាលពីខែ ឧសភា ឆ្នាំ ២០២០ ជាមួយ សារព័ត៌មានសាសនាចក្រប្រធាន ណិលសុន បានមានប្រសាសន៍ថា « ទោះបីត្រូវឆ្លងកាត់ពពកនៃទុក្ខព្រួយក៏ដោយ ក៏នៅតែអាចរកឃើញសញ្ញានៃក្តីសង្ឃឹមដែរ » ( នៅក្នុង Sarah Jane Weaver » « Video ៖ President Nelson Talks about the « Painful » Decision to Close Temples amid COVID-19 »,សារព័ត៌មានសាសនាចក្រថ្ងៃទី ២៧ ខែ កក្កដា ឆ្នាំ ២០២០ thechurchnews.com ) ។ លោកបានមានប្រសាសន៍ថា សញ្ញានៃក្តីសង្ឃឹមនៃជំងឺរាតត្បាតនេះគឺ ការស្វែងរកវិធីដើម្បីចូលរួមជាមួយពួកបរិសុទ្ធថ្ងៃចុងក្រោយដោយមិនចាំបាច់ជិះយន្តហោះ ។ តាមរយៈបច្ចេកវិទ្យា ប្រធាន ណិលសុន បានថ្លែងទៅកាន់ពួកបរិសុទ្ធថ្ងៃចុងក្រោយនៅប្រទេស វ៉េណេស៊ុយអេឡា និងអឺរ៉ុប ព្រមទាំងនៅ រដ្ឋកាលីហ្វ័រញ៉ា កាណាដា និង រដ្ឋអូក្លាហូម៉ា ។ លោកក៏បានមានប្រសាសន៍ទៅកាន់យុវមជ្ឈិមវ័យនៅទូទាំងពិភពលោកផងដែរ ។
នៅខែ សីហា ឆ្នាំ ២០២២ ប្រធាន ណិលសុន បានធ្វើដំណើរទៅក្រៅ រដ្ឋយូថាហ៍ ជាលើកដំបូងចាប់តាំងពីជំងឺរាតត្បាតបានបន្តកើនឡើងនៅខែ មិនា ឆ្នាំ ២០២០ សម្រាប់ការឧទ្ទិសឆ្លងឡើងវិញនៃព្រះវិហារបរិសុទ្ធ វ៉ាស៊ីនតោន ឌីស៊ី ដែលបានកែលម្អឡើងវិញ ។
ការទទួលពានរង្វាន់ សន្តិភាពហ្កានឌី-ឃីង-មែនឌែលឡា ( Gandhi-King-Mandela Peace )
មហាវិទ្យាល័យ ម័រហោស៍ ( Morehouse ) ដែលជាមហាវិទ្យាល័យប្រវតិ្តសាស្ត្រសម្រាប់ជនជាតិស្បែកខ្មៅនៅ ជ័រចារ ស.រ.អា. បានប្រកាសថា មហាវិទ្យាល័យនេះនឹងផ្តល់ពានរង្វាន់សន្តិភាព ហ្កានឌី-ឃីង-មែនឌិលឡា ដល់ប្រធាន ណិលសុន ។ សាលានេះបានប្រគល់កិត្តិយសថ្មីនេះជូនដល់ព្យាការីវ័យ ៩៨ ឆ្នាំ កាលពីថ្ងៃទី ១៣ ខែ មេសា ឆ្នាំ ២០២៣ នៅឯមហាសន្និបាតអន្តរជំនឿវើលហោស៍ ( Worldhouse Interfaith ) និង ការជួបជុំជាអន្តរសាសនានៅឯ សាលាប្រជុំអន្តរជាតិ Martin Luther King Jr ។ សាលាប្រជុំអន្តរជាតិនៅទីក្រុង អាត្លង់តា ។
ពានរង្វាន់នេះបានដាក់ឈ្មោះតាម មហាត្មៈ ហ្កានឌីម៉ាទីន លូធើ ឃីង ជុញ័រ និងណិលសុន មែនឌិលឡា ។ សាលានេះបាននិយាយថា ពានរង្វាន់នេះត្រូវបានបង្កើតឡើងសម្រាប់បុគ្គលដែលលើកកម្ពស់សន្តិភាព និងការផ្លាស់ប្តូរសង្គមជាវិជ្ជមាន តាមរយៈមធ្យោបាយអហិង្សា និងប្រើភាពជាអ្នកដឹកនាំសាកលលោករបស់ពួកគេ ដើម្បីបញ្ជាក់ពីសន្តិភាព យុត្តិធម៌ ភាពខុសគ្នា និងពហុនិយម ។
ប្រធាន ណិលសុន បានទទួលពានរង្វាន់នេះតាមវីដេអូ ហើយក្រុមចម្រៀងរោងឧបោសថនៅឯវិសាលដ្ឋានព្រះវិហារបរិសុទ្ធក៏បានច្រៀងតាមអនឡាញផងដែរ ។
រយៈពេលប្រាំឆ្នាំនៃការងារបម្រើរបស់ព្យាការីត្រូវបានបំពេញដោយការជំរុញចិត្តស្រឡាញ់ និងគោរពមនុស្សគ្រប់រូប ។ នៅក្នុងព្រឹត្តិការណ៍មួយក្នុងឆ្នាំ ២០១៨ ដែលជាការប្រារព្ធពិធីរំឭកខួបលើកទី ៤០ នៃវិវរណៈឆ្នាំ ១៩៧៨ ស្តីពីពរជ័យបព្វជិតភាពដែលត្រូវបានផ្ដល់ដល់សមាជិកដែលមានភាពស័ក្តិសមនៃគ្រប់ពូជសាសន៍ទាំងអស់ លោកបានបង្រៀនពួកបរិសុទ្ធថ្ងៃចុងក្រោយឲ្យ « កសាងស្ពានសហប្រតិបត្តិការជំនួសឲ្យជញ្ជាំងនៃការបែកចែក » ( « Building Bridges » New Eraខែ សីហា ឆ្នាំ ២០១៨ ទំព័រ ៦ ) ។