E Faafeiloai atu mai i Lenei Lomiga

O Le Valaaulia a le Faaola e Faasoa Atu Lona Malamalama

I Luga o le Ala i Emau, saunia e Wendy B. Keller, i le faaaloaloga a Havenlight

A o lei afio a’e o Ia i le lagi, sa valaaulia e le Keriso toetu Ana Aposetolo o le Feagaiga Fou e avea o se molimau ia te Ia “i le tuluiga o le lalolagi” (Galuega 1:8). I le musuia ai i lenei tiutetauave, sa “le mapu ona aoao atu ma talai atu le tala lelei ia Iesu Keriso” e Aposetolo (Galuega 5:42).

I lana tusiga i lenei lomiga, ua faamalamalama mai ai e se Aposetolo o aso nei, o Elder Quentin L. Cook, le ala e mafai ai ona tatou faasoa atu le talalelei a le Faaola e ui lava i o tatou le atoatoa. Na ia tusia, “A o tatou ola ai i le talalelei, alofa ma auauna atu i isi, tutu malolosi i le feagai ai ma faaosoosoga ma sauaga, ma molimau atu i upu ma galuega, o le a tatou tosina atu isi ia Iesu Keriso” (itulau 4).

O le faalatalata atu i le Faaola lava ia, tatou te talai atu ai e ala i molimau ma faataitaiga. O le a i ai o Ia i lo tatou lotolotoi, e pei ona ou faamatalaina i la’u tusiga i lenei lomiga, pe afai tatou te faamamaluina a tatou feagaiga ma saili atu i Ana fautuaga e ala i upu a perofeta (tagai i le itulau 40).

I la tatou suesuega o auaunaga a Aposetolo i le Sau, Mulimuli Mai ia te A’u i lenei masina, sei o tatou manatunatu i o tatou lava tiute ma valaau atu e faasoa atu le malamalama o le Faaola ia i latou o siomia i tatou. Na afio a’e Keriso i le lagi i aso ua leva, ae a o tatou aioi atu ia te Ia tatou “nonofo ma i maua nei” (Luka 24:29) i le asō, o le a Ia savavali faatasi ma i tatou i le laa e tasi i le taimi.

Elder Patricio M. Giuffra

O Le Fitugafulu