Autalavou Matutua

O Suiga Tatou te Faia—ma Lē—Manao e Faasaga i Ai

Elder Ciro Schmeil

O Le Fitugafulu

O le a lau sini mo le taimi umi? Afai e te iloa le mea o loo e taumafai i ai, o le a e saunia, ma fiafia foi, e faia ni suiga i lou olaga.

Pe na i ai se taimi na tatau ai ona e faia se suiga e te lei maua moni ai le uunaiga e fai? Po o se suiga e te lei faamoemoe o le a manaomia ona e faia?

Pe tusa o le 15 tausaga talu ai na tau mai ai e la’u fomai ia te au e tatau ona ou faia se suiga o le olaga: “Amata ona toe toaga e gaoioi, po o le a lē umi tele se taimi e ola ai,” na ia fai mai ai ia te au. Sa ou matuai faatauaina lana valaaulia. Sa ou filifili e amata ona tamoe.

Ina ia manuia le suiga o lenei ituaiga o olaga, sa manaomia ona ou manatua pea le vaaiga umi aua afai e na o sina vaaiga puupuu na ou maua, o le a ou le alu mamao lava.

O la’u vaaiga umi o se sini faisoo e tamoe i se malafoni se tasi i tausaga taitasi. O lenei sini e fesoasoani ia te au e tu ai i luga ma tamoe i aso uma aua ou te iloa i se tasi aso faapitoa i le tausaga a sau, o le a ou tamoe ai i le 26.2 maila (42.2 kilomita). Ou te tumau i le aoaiga e aoao ma ausia a’u sini pupuu i vaiaso taitasi ona ou te iloa o loo latou saunia a’u mo le aso o le miliga.

O nisi taimi e i ai mea e taumafai ma taofia ai au, e pei o le tau. Atonu e vevela tele pe malulu tele fafo, pe atonu foi e timu. O lea e tatau ai ona ou tamoe i totonu o le treadmill, e ui lava ou te matuai manao lava e tamoe i le auala. E taumafai foi manu’a ma taofi a’u. Atonu ou te lei faloina lelei ae ou te lei tamoe, o lea ou te femiloa’i ai le maso o le vae. Pe atonu foi e le o mafua ia te a’u ona manu’a. Ae po o le a lava le mafuaaga, e le mafai ona ou fiu aua ou te iloa o le a ou tamoe i se malafoni i le tausaga a sau. O lea ou te faia ai ni fesuisuiai i a’u koleniga. Ou te toe malosi a ma toe foi i le tamoe.

O le tamo’e na aoaoina tele ai a’u e uiga i le talalelei. Ua tofu i tatou uma ma se sini o le talalelei mo se taimi umi ia tumau e oo i le iuga ma ausia le faaeaga. Ae tatou te faatutuina ni sini pupuu e pei o le tagofia o le faamanatuga i le lotu i vaiaso taitasi lea e fesoasoani tatou te oo ai iina. Tatou te faamanualia faaleagaga pe a tatou faia ni mea sese. Ae e lē tatau ona tatou fiu. Tatou te salamo, ma tatou toe foi atu ai iina. Na pau lava le auala e mafai ona tatou ausia ai la tatou sini mo se taimi umi o le faia lea o ni suiga laiti i le aluga o le ala e fesoasoani ai ia i tatou ia tumau i le ala.

Filifili e Sui

Mo le silia ma le sefulu tausaga, sa ou galue ai o se sui peresitene sinia mo Walmart i Pasila. Sa mausali le tulaga tautupe a lo’u aiga i mea tautupe, sa ou fiafia i la’u galuega, ma sa lelei le olaga. Ae sa faigata le galuega. Sa manaomia ai ona ou faimalaga soo, lea sa faalavelave i lo matou aiga ma la’u auaunaga i le Ekalesia. Ina ua mavae le 11 po o le 12 tausaga, sa amata ona tele naua.

Sa ma fefautuaai faatasi ma lo’u toalua ma fautua atu ou te tuua lenei galuega. Sa ma talanoaina ma le ma fanau, ma sa ma fai atu faatasi, “Ua oo i le taimi mo i maua e faia ai se suiga.“

Ina ua ou faamavae, sa ou oso ese mai le sui peresitene sinia i le leai o se galuega. Toeitiiti atoa le tausaga o sue ai ma talia se isi galuega. Ina ua iu ina ou talia se tulaga ma se kamupani laitiiti o fale ma fanua i le Iunaite Setete, sa ou maua se lagona lelei faatatau i ai. O lenei galuega e tuu maia ia te a’u le tuuto atili atu o taimi i mea e sili ona taua.

Ae sa tau mai e isi tagata ia te au ou te valea. Aisea e tuua ai se galuega mautu mo se kamupani fale ma fanua e leai se tasi na iloaina? Ma siitia atu i le afa o le lalolagi i le Iunaite Setete?

Sa sao i latou o se suiga tele lenei sa matou filifili e fai. Ae sa sese i latou ona ua faapea o se filifiliga le lelei.

Sa manaomia le tele o le faatuatua ia i matou e fesuiai ai galuega ma siitia atu ai i se atunuu fou, ae sa tausia i matou e le Alii. Ma sa tele atu lo’u taimi e faataunuu ai o’u tiutetauave o se tane, tamā, ma se tagata o le uarota.

Ou te talitonu o suiga e tatau ona faatulagaina mo le ausiaina o o tatou gafatia. O le a le avea lava i tatou ma tagata e finagalo le Tama Faalelagi ia avea ai i tatou pe afai tatou te tumau i le mea e tasi i o tatou olaga. Ma e avea i tatou faapei o Ia pe a tatou faia ni suiga ma le loto i ai i le faatuatua.

Faamalosia ona Sui

O le isi suiga tele na tupu i lo’u aiga o le taimi na maliu ai lo’u uso laitiiti i se faalavelave tau taavale. Ma te lei filifilia pe mananao i lena mea mo ia pe mo i matou, ma o loo tiga pea, e oo lava i le mavae ai o le 10 tausaga. O suiga faamalosi e le faigofie lava.

Ae o suiga tatou te le filifilia e mafai foi ona avea ma avanoa e fausia ai lo tatou faatuatua i le Tama Faalelagi ma Iesu Keriso. E faigofie lava ona tumau i le faamaoni pe a agai i luma mea uma. Ae pe mafai ona tatou faatumauina le faatuatua ma faaauau pea pe a le tutupu mai suiga tatou te fiafia i ai?

O le tatalaina o faaipoipoga, lē fanauina o ni fanau, leai ni galuega, ma’i, ma isi aafiaga tiga faapenei e le o ni aafiaga ia tatou te faamoemoe ma fuafua i ai. E mafai ona latou aumaia ia i tatou le lagona e pei o le olaga o loo tupu i fafo atu o le mafai ona tatou puleaina. Ae e le moni atoatoa lena mea—i le lotolotoi o ou tulaga e lei faamoemoeina, o loo i ai lava mea e mafai ona e puleaina. E mafai ona e setiina ni sini laiti, e oo lava i le sini ia sopo atu i le tasi le aso. E mafai ona e faia! E mafai ona e gafatia mea uma ma le onosai! (tagai i le Alema 38:4).

O Iosefa o Aikupito o se faataitaiga atoatoa o lenei mea. Sa tumu lona olaga i suiga faamalosi—sa faalua ona aveesea lona saolotoga! (O le tasi taimi o le taimi na faatau atu ai o ia e ona uso e fai ma pologa, ma faapea foi ina ua faafalepuipuiina o ia e Potifara.) Ae sa lei gausia ai Iosefa ona o ona tulaga sa le manaomia pe sa lei fuafuaina foi. Sa ia fetuunaia ma tuputupu ae e ala i ona aafiaga. Ma i le iuga, sa ia laveaiina lona aiga ma se atunuu atoa. Sa mamanuina o ia e le Alii ma saunia o ia i le ala atoa (tagai i le Kenese 37–46).

E faigata ona onosai pe a suia faamalosi lau fuafuaga, ae ia manatua o le sini mo se taimi umi o le ausia lea o le faaeaga. Ua silafia e le Tama Faalelagi le mea e tatou te manaomia ina ia tatau oo ai iina: “E le mafai ona outou gafatia luma o le Atua i le taimi nei, po o le auaunaga a agelu; o le mea lea, ia outou faaauau pea i le onosai seia faaatoatoaina outou” (Mataupu Faavae ma Feagaiga 67:13).

E Fesoasoani Suiga ia i Tatou ia Avea atili ai e Faapei o le Faaola

E alofa le Tama Faalelagi ia te oe, ma e finagalo ia e manuia. E finagalo o Ia ia e fiafia. Ma ua Ia faataatiaina se fuafuaga mo oe e ausia ai na mea uma e lua.

Pe a ou vaai i le olaga faaletino mo le uiga o le avea ai—aoaoga faamasani—o suiga i lo’u olaga o le a sili atu ona aoga. E fesoasoani suiga ia te au e ausia ai la’u sini mo se taimi umi, o le avea lea e faapei o lo’u Faaola o Iesu Keriso. Ou te iloa o loo faasoa mai e le Tama Faalelagi le sini lava e tasi mo au mo se taimi umi ma mo Ana fanau uma. E pei lava ona iloa e la’u fomai e tatau ona ou suia se mea mo lo’u soifua maloloina, e silafia lelei lava e le Atua ia suiga e tatau ona tatou faia ia avea ai e faapei o Ia. Na te lagolagoina i tatou ma tuuina mai ia punaoa e pei o tusitusiga paia, o se faapotopotoga i le lotoifale, ma se perofeta soifua e fesoasoani ia i tatou i la tatou sailiga ia suia mo le lelei sili atu.

I aso sili ona faigata—o aso na e faigata ai ona aluese mai le moega ma fai ou seevae tamoe, pe a e iloa e manaomia ona e salamo, po o le taimi o loo e tauivi ai ma nisi suiga e lei faamoemoeina—tatou te faamanatu ia i tatou lava le alofa e le iu o le Atua ma Lona naunautai mo i tatou ia sili atu le fiafia nai lo le mea o tatou i ai nei.

O lena faamanatu tatou te maua ai le malosi e faia ai suiga e uunaia i tatou e le Agaga e fai. Ma e fesoasoani tatou te talitonu ai o suiga e lei faamoemoeina ua faamalosia i tatou e faia o se vaega o Lana fuafuaga mo lo tatou fiafiaga silisili.