“Vaaia o Vavega a le Faaola i o Tatou Olaga,” Liahona, Iulai 2023.
O Vavega a Iesu
Vaaia o Vavega a le Faaola i o Tatou Olaga
O lesona e fa mai le faamaloloina e le Faaola o le tauaso.
Auiliiliga mai le He Annointed the Eyes (Na Ia Faauuina Mata), saunia e Walter Rane
E i ai taimi i o tatou olaga tatou te faamoemoe ai ma tatalo mo vavega. Atonu e mo se tasi e pele ia i tatou pe mo lo tatou lava manuia. O lo tatou faamoemoega o le tali mai lea o la tatou olega, o le faaleleia o se tulaga ua gausia, faamalūlūina o le loto toatama’i, ma ua tuuina mai e le Alii o vavega le fofo tatou te mananao i ai. Afai o le taunuuga e le o le mea sa tatou faamoemoeina po o le taimi faatulagaina sa tatou tatalo ai, e masani lava ona tatou mafaufau pe aisea.
Na aoao atu Moronae, “Ma ou te fia apoapoai atu ia te outou, ou uso pele e, ia outou manatua e tutusa o ia ananafi, le aso, ma le faavavau, ma o nei meaalofa uma ua ou tautala atu ai, ua faaleagaga, o le a le aveesea lava, pe o le a lava le umi e tu ai le lalolagi, ae nao le tusa ai ma le le talitonu o le fanauga a tagata” (Moronae 10:19).
Pe o maua pea na meaalofa ma vavega o loo tusia i tusitusiga paia i o tatou aso? E mafai faapefea ona tatou agavaa mo na faamanuiaga? Pe o silafia ea e le Faaola mea o loo tutupu i o tatou olaga ma naunau e laveai i tatou mai o tatou luitau?
Ou te fia faaaogaina le vavega a le Faaola o le toefuataiina o le vaaiga i le tauaso e fai ma faavae e tali ai nei fesili. (Mo se faataitaiga, tagai i le Mataio 9:27–31; 12:22–23; Mareko 8:22–26; 10:46–52; Ioane 9:1–11.)
O Le A Le Mea E Mafai Ona Tatou Aoao Mai e uiga i le Misiona a le Faaola mai Ana vavega?
Ina ia malamalama i le aafiaga o se vavega ia i tatou ma i o tatou olaga, tatou amata i le faamatalaina po o le a le vavega. O vavega “sa faamoemoe e avea o se faamaoniga i tagata Iutaia o Iesu o le Keriso. … O le tele o i latou sa faafaatusa foi, ma aoao atu ai … upumoni paia. … O vavega sa avea ai ma o se tali i le faatuatua ma lana faamalosiauga sili. Latou te lei faia lava e aunoa ma se tatalo, lagonaina le manaomia, ma le faatuatua.”1
Na saunoa faigofie ma le matagofie Elder Ronald A. Rasband o le Korama a Aposetolo e Toasefululua e faapea:
O vavega o ni aga faalelagi, o faaaliga, ma faailoaga o le mana e leai se tuaoi o le Atua, ma o se faamautinoaga o Ia “e tutusa o ananafi, le aso, ma le faavavau” [Moronae 10:19]. …
“… O vavega o faaopoopoga o le fuafuaga e faavavau a le Atua; o vavega o se laina laveai ola mai le lagi i le lalolagi.”2
O le mea lea, o se auala aoga e suesue ai vavega a le Faaola ma aoao mai ai, o le manatua lea o vavega taitasi e faasino i se mea e telē atu nai lo le mea na tupu, ma vaavaai mo upumoni patino e uiga i le Atua ma Lana galuega.
Sei o tatou talanoaina nisi o upumoni e mafai ona tatou aoao mai vavega a le Faaola o le toefuataiina o le vaaiga i le tauaso. E mafai ona vaevaeina i ni lesona se fa faapenei.
1. O le Toefuataiina o le Vaaiga o se Faailoga o le Mesia
O perofeta anamua o e sa molimau mai e uiga i le afio mai o le Mesia sa saunoa e uiga i vavega o le a Ia faatinoina, e aofia ai le tuuina atu o le vaai i le tauaso.
I le Tupu o Peniamina, sa fetalai atu i ai se agelu paia o le a “afio atu le Faaola i totonu o tagata, ma fai vavega tetele, e pei o le faamalologa o e mamai, faatutuina mai o e ua oti, faasavavaliina o e ua pipili, ma faapupula e ua tauaso” (Mosaea 3:5; tagai foi i le Isaia 35:4–5).3
O le mea lea, o vavega o le toefuataiina o le vaaiga i e tauaso ua faamautu ai na valoaga e uiga i le afio mai o le Faaola ma Lana auaunaga i fanau a le Atua.
2. O Iesu o le Malamalama o le Lalolagi
Sa manino le ta’ua o lenei upumoni ina ua tau atu e Iesu i se tagata sa tauaso mai lona fanau mai (tagai i le Ioane 9:1–11). Ina ua fesili le au soo pe na fanau mai le tagata tauaso ona o le agasala, sa fetalai Iesu e leai, “a e peitai ina ia faaalia ai galuega a le Atua ia te ia” (fuaiupu 3). Ona, a o lei toefuataiina le vaaiga a le tagata, sa tautino atu e le Faaola, “Manū o o’u i ai i le lalolagi, o a’u o le malamalama o le lalolagi.” (fuaiupu 5).
Na faamalamalama mai e Elder Bruce R. McConkie (1915–1985) o le Korama a Aposetolo e Toasefululua: “A o lei tatalaina mata o e tauaso, faaletino, sa faamanatu atu e Iesu i e na faalogologo i lana folafolaga talu ai, ‘O a’u o le malamalama o le lalolagi,’ e peiseai e aoao atu: ‘Soo se taimi lava e te manatua ai sa ou tatalaina mata tauaso, faaletino, ia manatua foi na ou sau e aumai le malamalama i mata, faaleagaga.’”4
E manaomia ona tatou manatua le masani ona mafaufau i ai o le agasala i tusitusiga paia o se tauaso ma se laveaiga mai le agasala o se aveesea o lenei tauaso. O Ia o lē o le “malamalama o le lalolagi” sa faaaogaina lenei mea na tupu e faatusa i le galuega maualuga atu na Ia afio mai ai i le lalolagi e faataunuu.
3. O Le Faatuatua e Muamua atu i Vavega
A o ui atu Iesu i alatele o Kapanaumi, sa mulimuli atu ni alii tauaso se toalua ia te Ia, ma alalaga atu, “Le alo e o Tavita, ia e alofa mai ia te i ma’ua.” Ona Ia fetalai atu lea ia i la’ua, ma fesili atu, “Ua oulua faatuatua mai ea ia te a’u ou te mafaia lenei mea?” Ma sa la tali mai, “Ioe, le Alii e.”
O le faamaoniga o lo la talitonuga e mafai e le Alii ona fesoasoani ia i la’ua o lo la finafinau lea e mulimuli ia te Ia ma i lo la uunaiga ma le ta’uta’u atu o lena talitonuga ina ua fesiligia. Sa pai atu le Faaola i o la mata, ma fetalai atu, “E pei ona oulua faatuatua, ia faapea lava ona faia ia te oulua.” O le aafiaga na tupu i le taimi a lena: “ona pupula ai lea o laua mata” (Mataio 9:27–31).
Sa matauina e Elder McConkie: “E masani lava i le tatalaina o mata o le tauaso, o Iesu, e pei o lea, sa o faatasi lana faatonuga na faaleoina ma se faatinoga faaletino. I lenei mea ma isi taimi sa ia pa’i atu ai i mata lē vaaia.”
Aisea na faia ai e le Faaola lena mea? “E leai se tasi o nei mea e le masani ai … o faatinoga e tatau ai i le faaaogaina o le mana faamalolo,” na faamalamalama mai e Elder McConkie. Ae ua tatou iloa o le faatuatua e muamua i vavega, ma o lea “o le faamoemoega manino o le Matai o le faamalosia lea o le faatuatua o le tagata tauaso po o le tagata logonoa.”5
4. O Nisi Taimi e Oo Mai Ai Vavega i Lea Fuaitau ma Lea Fuaitau
I Petesaita, na aumai ai e tagata se tagata tauaso ia Iesu. Ina ua uma ona taitai ane e Iesu le tagata i tua o le aai, “ua feanu foi ia i ona mata, ona faaee lea e ia o ona aao i luga ia te ia.” O le vaaiga a le tagata sa na o se vaega na toefuatai mai i le taimi lea, ma sa “toe faaee atu lea e ia o ona aao i ona mata,” ma aumaia ai se toefuataiga atoa. (Tagai i le Mareko 8:22–26.)
Sa faasino atu e Elder McConkie upumoni e mafai ona tatou aoaoina mai lenei mea na tupu:
“E ono foliga mai o taimi faasolosolo mai o le fesootaiga faaletino ma Iesu sa iai le aafiaga o le faaopoopo atu o le faamoemoe, mautinoa, ma le faatuatua i le tagata tauaso.
“… E tatau i tagata ona saili atu i le alofa tunoa faamalolo o le Alii ma lo latou malosi ma le faatuatua atoa, e ui ua lava lena mo na o sina vaega o le fofoina. … E mafai ona o latou maua ai le mautinoa faaopoopo ma le faatuatua e faaatoatoa ai ma malosi lelei ai. E tele foi ina faamaloloina tagata mai o latou toatuga faaleagaga e auauai, o lea laasaga ma lea laasaga a o latou faaogatusaina o latou olaga ma fuafuaga ma faamoemoega o le Atua.”6
E ala i le faatinoina o lenei vavega i ni laasaga iloga se lua, na fesoasoani ai le Alii i le tagata tauaso ia saunia e maua le faamanuiaga atoatoa. Pe o mafai foi ona tatou vaai i lenei mamanu i la tatou lava sailiga mo vavega—se mea e tatau ona tatou faia, pe le faia, a o lei saunia mo se faalavefau maualuga atu?
Faatuatua E Le Faamaloloina
E ui e mafai ona tatou vaaia le taua o le faatuatua e faataunuu ai vavega, ae e taua le matauina o nisi taimi e oo lava i le Au Paia sili ona faamaoni o le a le taliina o latou moomooga ma olega.
Na aoao mai Elder David A. Bednar o le Korama o Aposetolo e Toasefululua:
“O le amiotonu ma le faatuatua ua mautinoa lava le aoga e fuliese ai mauga —pe afai o le fulieseina o mauga e ausia ai faamoemoega o le Atua ma ua tusa ai ma Lona finagalo. O le amiotonu ma le faatuatua e mautinoa lava e aoga i le faamaloloina o e mamai, tutuli, pe pipili—pe afai o faamalologa faapena e ausia ai faamoemoega o le Atua ma ua tusa ai ma Lona finagalo. O le mea lea, tusa lava pe malolosi o tatou faatuatua, e tele mauga o le a le aveesea ai. Ma e le o ma’i uma ma lē atoatoa o le a faamaloloina. Afai e faatapulaaina mea faafeagai uma, afai e aveesea uma ia faafitauli, o lona uiga o le a le faataunuuina faamoemoega autu o fuafuaga a le Tama.
“O le tele o lesona e tatau ona tatou aoaoina i le olaga nei, e pau le auala e mafai ona maua ai, e ala lea i mea tatou te oo i ai ma o nisi taimi e puapuagatia ai. Ma ua faamoemoe ma talitonuina i tatou e le Atua e feagai ma faigata le tumau o le olaga nei faatasi ai ma Lana fesoasoani ina ia mafai ona tatou iloa mea e tatau ona tatou aoao ai ma iu ai ina avea i tatou ma tagata e tatau ona avea ai i le faavavau.”7
Ou te fia faaopoopo atu la’u molimau i molimau a perofeta anamua ma aso nei. O loo tutupu pea vavega i lo tatou lotolotoi. O le Faaola o Iesu Keriso o le puna o le mana uma, malamalama, ma le toomaga. Ou te molimau atu e ala i lo tatou faatuatua ia te Ia, e mafai ai ona faamaloloina i tatou, ma i le tulaga e le faamaloloina ai i tatou, e mafai ai lava ona tatou maua le filemu e ala i le Alii o le Filemu, le Malamalama o le Lalolagi, ma Le Faamalologa o Faamalologa.