Ola ai ma Faasoa Atu le Talalelei

tamaitai talavou o loo vaai faatasi i tusitusiga paia

Mātua Pēlē,

O auala e lua tatou te faaali atu ai i le Atua lo tatou lotofaafetai mo le talalelei o le ola ai ma faasoa atu. O tusiga i le lomiga o lenei masina e taulai atu i le avea o le talalelei a Iesu Keriso o se vaega tele atu o o tatou olaga, pe ala i le faamalosia o le faatuatua ia te Ia, faia o suiga taua, po o le faasalalauina o Ana upumoni i le lalolagi atoa. O loo faatalitali mai le olioli ia i latou o e aoao ma mulimuli i aoaoga a le Faaola ma faasoa atu Ana savali i upu ma galuega.

Talanoaga o le Talalelei

Faasoaina atu o le Talalelei e ala i Molimau

Valaaulia tagata taitoatasi o le aiga e faasoa mai se molimau puupuu i se mataupu faavae o le talalelei e sili ona fiafia i ai. Faasoa atu upusii e uiga i le galuega faafaifeautalai mai le tusiga a Elder Quentin L. Cook i le itulau 4. Mafaufau e uiga i mataupu faavae o le talalelei lea faatoa e faasoaina atu, fesili: Pe i ai ni tagata e mafai ona tatou faasoa atu i ai nei mataupu faavae?

Faalatalata Atili Mai ia Iesu Keriso

Fesili i lau fanau pe o afea latou te lagona ai le sili ona latalata ia Iesu Keriso. Fai se lisi ma a latou tali. Faamalamalama atu gaoioiga e lima a Elder Patricio M. Giuffra e fausia ai le faatuatua (tagai i itulau 42–43). I le avea ai o se aiga, mafaufau e fai se tasi o nei gaoioiga e te ioeina e mafai ona faia ai se eseesega i lou aiga. Faatulaga faatasi se fuafuaga e taulai atu ai i lena gaoioiga i le masina lenei.

O Suiga e Mafai ona Taitai Atu ai i le Tuputupu Ae Faaleagaga

O suiga, e faamoemoeina ma e lei faamoemoeina, o se vaega o lo tatou aafiaga i le olaga faitino. Faitau le tusiga na saunia e Elder Ciro Schmeil o loo i le itulau e 30 e uiga i ituaiga suiga eseese i o tatou olaga. E mafai faapefea e nei suiga ona fesoasoani ia i tatou ia avea atili ai e faapei o le Faaola?

Mea Mālie Faaleaiga o le Sau, Mulimuli Mai ia te A’u

E Alofa le Atua i Ana Fanau Uma

Galuega 10

“E le faailogaina tagata e le Atua: a e peitai o le mata’u ia te ia i nuu uma lava, ma fai le amiotonu ua talia i latou e ia.” (Galuega 10:34–35).

O le Au Pulega Aoao e omai mai atunuu eseese. Pe tusa o le afa e omai mai le Iunaite Setete. O isi e omai mai Amerika Tutotonu ma Saute, Asia, Europa, Aferika, Oceania, Mekisiko, ma Kanata.

E mafai ona e faaigoaina se Aposetolo na fanau i Europa?
E mafai ona e faaigoaina se Aposetolo mai Amerika i Saute?
E mafai ona e faaigoaina se Aposetolo na o mai ona matua mai Suetena ma Finelani?
E mafai ona e faaigoaina se Aposetolo o lona aiga na uluai o mai mai Saina?

Atonu tatou te o mai mai nofoaga eseese, ae e alofa le Atua ia i tatou uma.

Talanoaga: O a ni auala tatou te ono tutusa ai pe ese ai mai isi tagata? Pe alofa ea le Atua ia i tatou e faavae i foliga tatou te foliga i ai po o fea foi tatou te o mai ai? Toe iloilo le tala ia Peteru ma Konelio o loo maua i le Galuega 10. O le a se mea na latou aoaoina e uiga i le faamasino atu o isi? O a uiga e taua i le Alii?