“O Lo Tatou Lava Auala i Emau,” Liahona, Iulai 2023.
Sau, Mulimuli Mai ia te A’u
O Lo Tatou Lava Auala i Emau
E lima ni gaoioiga faigofie e mafai ona fesoasoani ia i tatou e iloa ai o loo latalata mai pea le Faaola.
I luga o le Auala i Emau, saunia e Wendy B. Keller, faaaloaloga a Havenlight
Na maliu lo’u tama i le kanesa ina ua 4 o’u tausaga. Sa ou ola ae ma mafaufau pe aisea na tatau ai ona oti o ia. Sa ou fesiligia le Atua ma fesili atu pe aisea ua matua le talafeagai ai le olaga. I le sefulu tausaga mulimuli ane, ina ua 14 ou tausaga, sa ou feiloai ai i faifeautalai. A o la aoaoina i ma’ua, sa lagona e lo’u tina o loo la aoaoina le upumoni ma e tatau ona ma faalogo. Ina ua matou auai i le Ekalesia, o le talalelei a Iesu Keriso ma se malamalamaaga i le ata o le faaolataga na oo mai i lou olaga i se taimi na ou matuai manaomia ai lava.
Mulimuli ane, ina ua faamauina au i ou matua i le malumalu, sa musumusu mai lou tina ia te au, “Ou te lagonaina le i ai o lou tama.” A o ou mafaufau i faamanuiaga o le faamauina, sa ou iloa sa silafia e le Alii lo matou aiga ma sa faatasi soo o Ia ma i matou, e tusa lava pe matou te lei iloaina.
Sa iai se taimi na e mafaufau ai pe o silafia oe e le Faaola? Pe o Ia silafia ou tauiviga ma atugaluga? O le a Sana fetalaiga ia te oe pe afai e mafai ona e savali ma talanoa ma Ia?
Sa Ia Savavali faatasi ma i Latou
I le tolu aso talu ona mavae le maliu o Iesu Keriso, ae savavali ai le toalua o Ona soo i le ala i le nuu o Emau, lea pe tusa ma le fitu maila (12 km) mai Ierusalema. Sa manatu tele i la’ua i o la’ua lava mafaufauga ma popolega, ina ua faatasi atu ia i la’ua se tagata ese.
Na fesili atu le tagata ese, “O a ea ia upu ua oulua felafolafoai ai, o oulua o savavali, ma ua mata faanoanoa?”
Sa talanoa le au soo e uiga i mea na tutupu talu ai nei “e faatatau ia Iesu le Nasareta.” Sa latou talitonu ua afio mai Iesu e togiola Isaraelu, ae sa tausalaina ma faasatauroina o Ia ma le le tonu. Sa latou fai mai foi o i latou o e sa sili ona iloa Keriso o loo faapea mai ua toetu mai o Ia mai le oti.
Sa tau atu e le tagata ese ia i laua ua “telegese o latou loto e talitonu i mea uma ua fai mai ai le au perofeta.” Sa ia iloiloina mea na aoao mai e tusitusiga paia ma le ala na faataunuu ai e Keriso le valoaga. O lenei talanoaga na faatumulia ai soo i le olioli.
Ina ua latou taunuu atu i Emau, sa fai atu le au soo i le tagata ese e “tatou te nonofo ma i ma’ua [latou] nei.” I le taumafataga o le afiafi sa faamanuia ai e le tagata ese le areto ma tofitofi. Na faafuasei lava, ona iloa e le au soo o le tagata ese e le o se tagata ese, ae o le Faaola lava Ia! (Tagai i le Luka 24:13–32.)
O Loo Faatasi o Ia ma i Tatou
Atonu tatou te taumanatunatu pe aisea na le iloa ai e soo e toalua sa latou savavali faatasi ma le Faaola. Ae e faafia ona tatou le malamalama o loo ia savali faatasi ma i tatou? E tele taimi tatou te taulai atu ai i luitau, ma e oo lava i le olioli, i o tatou olaga i aso taitasi tatou te le iloa ai o loo i ai le Faaola i o tatou autafa.
Atonu tatou te le vaaia pe faapefea ona Ia nofo faatasi ma i tatou, tauivi ma i tatou, galulue faatasi ma i tatou, ma tagi faatasi ma i tatou. E oo lava i o tatou taimi sili ona faanoanoa, afai tatou te matauina, e mafai ona tatou lagonaina o Ia faatasi ma i tatou ma faalogo i Ana upu: “Ina soia, ma ia outou iloa o Au lava o le Atua” (Salamo 46:10, faaopoopo le faamamafa; tagai foi i le Mataupu Faavae ma Feagaiga 101:16).
O o Tatou Lava Auala Patino
Ua tofu i tatou ma se taunuuga e oo i ai i lenei olaga. E i ai taimi i la tatou faigamalaga, atonu tatou te feagai ai ma gasegase pe tatou te ono tauivi foi ma o tatou lava vaivaiga. Atonu e i ai ni o tatou faafitauli tau tupe po o luitau e oo mai ona o le manuia, tamaoaiga, ma le faamaualuga.
A o tatou faimalaga atu i lo tatou auala patino i Emau, e le tatau lava ona tatou savavali na o i tatou. E mafai ona tatou valaaulia le Faaola e mau ma i tatou. O gaoioiga faigofie nei e lima o le a fesoasoani ia i tatou e faalatalata atu ai ia te Ia.
Ata na tusia e Lovetta Reyes-Cairo
1. Tatalo i Aso Taitasi
E tatau ona muamua le tatalo i o tatou olaga i aso taitasi. E mafai ona fesoasoani ia i tatou ia maua le mafutaga ma le taitaiga a le Tama Faalelagi. E mafai ona tatou ole atu mo le malosi e mulimuli ai i Lona Alo ma mo le mana o le Agaga, aemaise lava i taimi e mafai ai e o tatou mafaufauga ona taitai atu i tatou i le agasala.
O Iosefa Samita talavou, a o aioi atu i le Atua i le tatalo mo se tali, na maua ai le fili o taumafai e taofi o ia (tagai i le Iosefa Samita—Talafaasolopito 1:16). E pei o Iosefa, e tatau ona tatou faaauau pea i le tatalo ma faalagolago e le vaivai lava le Tama Faalelagi e faafofoga ia i tatou. O le a Ia fesoasoani ia i tatou ia malamalama i Lana taimi ma Ana tali.
2. Taumafa Fiafia i Tusitusiga Paia
Ua faatuina e le Faaola se faataitaiga mo i tatou e ala i le suesueina o tusitusiga paia. Sa Ia sii soo mai tuitusiga paia a o Ia aoao mai. O le suesue e le aunoa i tusitusiga paia e fesoasoani tatou te maua ai se mafaufau manino ma le matala, o se loto talia lea e faatauaina le afioga a le Atua, ma lima ua saunia e auauna atu.
A o tatou suesue i tusitusiga paia, e mafai e le Agaga Paia ona faatumuina i tatou i le manao e fai mea lelei. O le a faamaai ai la tatou vaaiga mamao e vaai po o a mea e le o vaaia e mata faalenatura. O le a fesoasoani ia i tatou e faalogo ai i tagi a e le tagolima. O le a faamanuiaina i tatou e mulimuli i le faataitaiga a le Faaola o le faamafanafanaina o i latou o e manaomia le faamafanafanaga (tagai i le Mosaea 18:8–9). Ma a o tatou feagai ai ma galuega o le aso, o le a tatou le savavali lava na o i tatou. O le a tatou savavali faatasi ma le Faaola i le laa e tasi i le taimi.
3. Mulimuli i Perofeta Soifua
E tatau ona tatou mulimuli i le fautuaga a lo tatou perofeta pele, Peresitene Russell M. Nelson, ma isi perofeta, tagatavaai, ma talifaaaliga. Ona tatou iloa ai lea o lo tatou auala i Emau o le a saogalemu ma manino. O le a latou taialaina ma le saogalemu i tatou ma fesoasoani ia tatou iloa o loo faatasi le Faaola ma i tatou.
4. Valaaulia o Ia e Nofo ma i Tatou
A o tatou aoao e uiga ia Iesu Keriso ma a o tatou usiusitai i Ana poloaiga, ua tatou valaaulia le Faaola ia faatasi ma i tatou. E tatou te aoao ina ia iloa Lana faatosinaga i o tatou olaga.
Sa savavali soo e toalua i le ala i Emau faatasi ma le Faaola, talanoa ma Ia, ma lagonaina le mu o o laua loto i totonu ia i laua (tagai i le Luka 24:32). O la laua aioiga ia te Ia, “Tatou te nonofo ma i maua nei” (Luka 24:29), e tatau foi ona avea ma a tatou aioiga.
Ina ua iloa e le au soo le Faaola, sa faafuasei ona mou ese atu o Ia mai la latou vaai. Sa vave ona toe foi atu le au soo i Ierusalema ma molimau atu i Aposetolo ua toetu le Faaola. A o latou molimau atu, sa toe tu le Alii “i o latou luma” (Luka 24:36). E mafai foi ona tatou lagonaina o Ia pe a i ai o Ia i lo tatou lotolotoi.
5. Faafou E Le Aunoa Feagaiga
O sauniga ma feagaiga o le talalelei a Iesu Keriso e mafai ona suia ai lo tatou natura. Na saunoa Peresitene Dallin H. Oaks, Fesoasoani Muamua i le Au Peresitene Sili, “O la tatou tapuaiga ma le faaaogaina o mataupu faavae e faavavau e faalatalata atili atu ai i tatou i le Atua ma faalautele ai lo tatou gafatia e alolofa atu ai.”1 Mo se faataitaiga, o le papatisoga e mafai ai e le Alii ona faamama i tatou. Ma afai tatou te faamaoni ma usiusitai, o feagaiga ma sauniga o le malumalu e saunia ai i tatou e ola i se aso i le afioaga o le Tama ma le Alo.
E fesoasoani le faamanatuga tatou te manatua ai ma faatagaina i tatou e faafou a tatou feagaiga, ia salamo, ma toe taumafai. Pe a tatou tagofia le faamanatuga, tatou te faailoa atu lo tatou naunautaiga e tauave le suafa o Iesu Keriso i o tatou luga ma toe tautino atu i le manatuaina o Ia ma le tausia o Ana poloaiga. Ona folafola mai ai lea ia i tatou e faapea o Lona Agaga o le a iai pea e faatasi ma i tatou. (Tagai i le Mataupu Faavae ma Feagaiga 20:77, 79.) E tatau ona tatou manatua pea ia sauniga ma feagaiga ua tatou osia.
O Le a Latalata Mai le Faaola
I lo tatou lava ala i Emau, ua valaaulia ma le alofa i tatou e le Faaola ia o mai ia te Ia ma olioli ia te Ia. A o tatou tatalo i aso taitasi, taumamafa fiafia i tusitusiga paia, mulimuli i perofeta soifua, valaaulia o Ia e mafuta ma i tatou, ma faafou ma faamamalu a tatou feagaiga, o le a Ia latalata mai ia i tatou. Ona tatou iloa ai lea, e pei ona iloa e soo i le ala i Emau, ua toetu Iesu Keriso ma o loo soifua moni o Ia ma e alofa ia i tatou.
Ou te molimau atu o Iesu Keriso o lo tatou Faaola ma le Togiola. E naunau o Ia e faatasi ma i tatou ma ia taialaina i tatou ma le saogalemu i lo tatou ala.