Aua Tatou Te Fefefe

Saunia e Luis Robledo, Tamaulipas, Mekisiko

Ou te iloa o le a tatou fiafia pe a tatou faasoa atu le talalelei i le toatele o tagata tatou te mafaia.

O le toatele o a’u uo ma tagata o le vasega e le o ni tagata O Le Ekalesia a Iesu Keriso o le Au Paia o Aso e Gata Ai e masani ona fesili mai ia te au e uiga i le Ekalesia. Ina ua mavae sina taimi, sa ou lelava i le taliina pea lava pea o fesili lava e tasi, o lea sa ou maua ai se vaifofo.

Ou te fiafia e fai vitio o le initoneti e faafiafia ai tagata. Ou te faia vitio o musika, vitio mo faamatalaga, ma vitio o mea malie. I se tasi aso a o ou mafaufau e uiga i le mea o le a ou faia mo le isi a’u vitio, sa ou filifili ai e fai se vitio na taliina ai fesili e uiga i le Ekalesia.

Sa ou tago atu i la’u meapueata. Ma, e aunoa ma le tusia i lalo o le mea o le a ou fai atu ai ae o le manatuaina o mau taua sa ou manao e ta’ua, sa ou faia le vitio. Sa ou le iloa po o le a le mea o le a tupu. Sa na ona ou lagonaina le uunaiga e fai le vitio. “Ma sa taitai aʼu e le Agaga, sa ou lē muaʼi iloa muamua mea e tatau ona ou faia” (1 Nifae 4:6).

E aunoa ma le popole pe ono faape’i le tali mai a a’u uo, tagata o le vasega, ma aiga—tagata o le Ekalesia pe leai—sa ou utaina i luga.

I ni nai vaiaso talu ona uma ona utaina i luga le vitio, sa amata ona ou maua ni manatu faaalia i a’u faitotoa o ala o faasalalauga faaagafesootai. O tagata ou te lei iloaina na amata ona fai mai a latou faamatalaga ma faafetai mai ia te au mo lau vitio. Ona o la’u vitio, sa amata ai foi e se tagata e toatasi ona faia lesona mai faifeautalai. Mulimuli ane, sa filifili lena tagata e papatiso.

Talu ona ou faia le vitio, o tagata ou te iloa e le o ni tagata o le Ekalesia e foliga mai sa tutusa le latou vaai mai ia te a’u----pe atonu e sili atu. O nisi o i latou ua le toe faitioina le Ekalesia. O isi ua le toe faia fesili lava e tasi e uiga i le Ekalesia aua o lea ua latou mauaina tali.

Aua tatou te fefefe e fai le mea ua poloaiina ai i tatou e le Alii. Sa Ia poloai mai, O atu ia outou i le lalolagi uma, ina talai atu ai le talalelei i tagata uma lava” (Mareko 16:15).

Ou te folafola atu o le a tatou le faanoanoa ona sa tatou usiusitai ia te Ia.