“E Faaauau Pea Vavega a le Atua,” Liahona, Iulai 2023.
Atatosi o le Faatuatua
E Faaauau Pea Vavega a le Atua
Sa ou iloaina o talitonuga o le Au Paia o Aso e Gata Ai sa sili atu ona ogatusa ma le Tusi Paia nai lo le manatu faapea ua suia e le Tusi Paia ia perofeta ma faaaliga. Sa ou lagonaina le olioli moni ina ua ou iloaina atonu o loo ou ola i “taimi faatusi paia” i ona po nei.”
Ata pu’e mai faaaloaloga a le tusitala
I le aso 9 o Novema, 1989, sa faasilasila sese mai ai e se tagata o le malo a Siamani i Sasae e faapea, e amata loa lava, ona faatagaina tagatanuu o le aai o le laumua ona ui atu i le Pa o Perelini. I ni nai minute mulimuli ane, sa lei i ai se filifiliga a leoleo tuaoi na masani ona le fiafia i ai ae faatagaina le toatele o tagata ua faatoateleina e tuua le teritori o le Ripapelika Temokarasi o Siamani.
O i ma”ua ma la’u uo mamae, o Jakub Górowski—i lena taimi o i ai pea i le talavou lava—sa matamata i le vavega sa lei faamoemoeina na tatala mai i luga o le televise mai lo matou fale i Polani. Sa sasao faaafi moni lava le lalolagi ae le o se mea faataumaoi. O le agaga o le saolotoga ma le faamoemoe na faatumulia ai loto o le faitau miliona o tagata.
Mo ma’ua ma Jakub, sa ma miti e iai se aso e ma te siitia atu ai mai Polani i Sisifo—Tenimaka, Suetena, Siamani i Sisifo. Sa musuia i ma’ua e ata tifaga a Amerika ma ata o le TV. O le ata sa sili ona ou fiafia i ai O Tausaga Ofo. Sa ou fiafia i le siosiomaga o le olaga o pitonuu o Amerika.
Ou te manatu e leai se tasi i itu e lua o le Papupuni U’amea na manatu o le a muta fevesiaiga ma tauiviga i vaegaau i le va o malo. Ae e ese se fuafuaga sa i le Tama Faalelagi. I le 1975, i lo ma leiloaina, sa valaaulia ai e Peresitene Spencer W. Kimball (1895–1985) ia Au Paia o Aso e Gata Ai ina ia “auai i talosaga mamafa faifai pea i le Alii e tatala faitotoa o atunuu ma faamaluluina loto o tupu ma taitai ina ia mafai e faifeautalai ona ulu atu i laueleele uma ma aoao atu le talalelei.”1
I le lua tausaga mulimuli ane, sa asiasi atu ai Peresitene Kimball i Warsaw, Polani. I se tasi taeao, faatasi ai ma se vaega toalaiti o ana paaga, e aofia ai Elder Russell M. Nelson, na tuua ai e Peresitene Kimball lona faletalimalo, savalivali i tafatafa o le loa o le Fitafita e Le Mailoa, ma ulufale atu i le Paka o Saski. E le mamao mai se punavai tele o loo tu ai pea iina i le asō, sa ia tootuli ai ma toe faapaiaina Polani mo le talaiga o le talalelei.
Na sosoo ai ma le sefulu tausaga o fevesiaiga ma le tele o le tetee. A o lē talionuina e tagata matutua ma tetee i taitai faaupufai, e toatele tagata talavou na fesiligia nisi o tulaga faatauaina, tu masani, ma uiga faaalia o o latou matua. Sa ma lagonaina ma la’u uo o Jakub le faanoanoa i le faaKerisiano e pei ona ma malamalama i ai. Sa le toe i ai sona fiafia i mataupu faalelotu i se tulaga lautele, a o tosina au i filosofia na aliae i Asia.
Ia Aperila 1990, sa ma sopo faatalitali taavale ai ma Jakub i Auseteria. I Viena sa ma feiloai ai i ni tamaitai lelei se toalua sa tutu i le auala savali o se auala pisi. O se tasi o i latou sa uuina le Tusi a Mamona i le gagana Polani. Sa ia faamatala mai ia i ma’ua e uiga i le asiasiga a Iesu i tagata o Amerika anamua ma folafola mai e lafo atu le tusi i lo ma fale pe afai ma te tuuina atu ia te ia ma tuatusi. Sa ma tatalaina foi a ma tusi o tuatusi ma kopiina tuatusi o le toatele o a ma uo. Sa ma manatu o le a manaia tele le faate’ia o i latou i le mauaina o se meaalofa.
I ni nai masina mulimuli ane, sa faavaeina ai le Misiona a Poland Warsaw, ma sa taunuu mai ai faifeautalai se toafa i lo matou aai. Mulimuli ane, sa ou aoaoina ai o le aofaiga tele o “tagata na faasino mai”—o tuatusi a o ma uo—sa i ai se matafaioi taua i le faaiuga e tatala lo matou aai mo faifeautalai. Sa ou te’i i ni nai masina mulimuli ane, sa tau mai e Jakub ia te au e toalua faifeautalai “Mamona” na asiasi atu ia te ia ma ua ia filifili e auai i le la lotu.
Sa ou tiga i lana faasilasilaga. Sa ou taumafai mo le tele o tausaga ia fiafia o ia i mataupu faalelotu ae sa le faamanuiaina. E mafai faapefea e tagata ese mai se atunuu ese ona liliu faafuasei mai o ia? Sa ou naunau e faafesagai ma i latou ma faaali atu ia Jakub e leai so latou avanoa i se felafolafoaiga ma a’u.
Na ou Lagonaina se Mea Faapitoa
Ina ua ou vaai i faifeautalai talavou e toalua, laufofoga fiafia o tutu i le faitotoa o le fale o o’u matua, sa galo ia te a’u la’u sini e faamaonia lo la sese. Sa fiafia i la’ua ma malie. Sa la fesili mai ia te au le tele o fesili e uiga ia te au lava ia ma o’u talitonuga. Sa la faaaloalogia o’u talitonuga. Mulimuli ane sa la ta’u mai ia te au i le gasologa o lena feiloaiga muamua faatasi ma le alii faasausili ma se lauulu umi ma se ofuvae masae o sē sa ulaula sikaleti, sa faigata ia i la’ua ona mafaufauina o le a ou fiafia lava i le avea ai ma sē mulimuli ia Iesu Keriso. Ae sa ou lagonaina se mea faapitoa i lo la faatasi ai, ma sa ou fiailoa atili ona o le lā Ekalesia pau lea o le ekalesia Kerisiano sa ou iloaina e talitonu i se muai olaga.
Sa faagaeetia foi au i a la’ua molimau ma talitonuga maumaututu malosi a Jakub ma Robert Zelewski, o lana uo fou i le Ekalesia. O Ropati o se fomai o le mafaufau, o se tagata atamai e malamalamagofie, o ona manatu ma aafiaga na faamalosia ai lo’u fiafia i le tapuaiga o le Au Paia o Aso e Gata Ai.
O mea uma na ta’u mai e faifeautalai, o Jakub, ma Ropeti ia te a’u sa mata’ina, aemaise lava le aoaoga faavae o le ata o le faaolataga, e amata i le muai olaga ma faaiu ai i tikeri e tolu o le mamalu. Ae ou te lei vaai i se taimi i le auai i le Ekalesia seia oo ina mafai ona ou malamalama atoatoa atili i o latou talitonuga tulaga ese. O lo’u malamalama i le faa-Kerisiano o aso anamua, na faia ai e le Atua vavega, auina mai agelu, ma valaauina perofeta, ae o na mea uma e faasino atu i taimi faatusi paia. O le taimi lava na maea ai le Tusi Paia, e le’i toe manaomia faale tagata soifua ni vavega ma faaaliga aua o loo i ai i tusitusiga paia mea uma e manaomia ona tatou iloa.
Na oo mai se avanoa i le taimi o la matou talanoaga e uiga i le Liliuese Tele ma le Toefuataiga o le atoatoaga o le talalelei e ala mai i le Perofeta o Iosefa Samita. Sa ou iloaina o la latou talitonuga o le Ekalesia sa sili atu ona ogatusa ma le Tusi Paia nai lo le manatu faapea ua suitulaga le Tusi Paia i perofeta ma faaaliga. Sa ou lagonaina le olioli moni ina ua ou iloaina atonu o loo ou ola i ona po nei “taimi faatusi paia.”
Sa ou sauni e ole atu ma le faamaoni i le Atua mo faaaliga faaletagata lava ia, ae sa lei oo mai se tali. Mulimuli ane, sa ou fai atu, “Tama Faalelagi, afai na e valaauina Iosefa Samita e fai ma Au perofeta, o le a ou usitai i poloaiga uma na e faaalia mai e ala mai ia te ia.” Ona oo mai lea o le tali i lo’u loto ma le mafaufau ma le mautinoa, ma sa ou iloa ua toefuatai mai e le Atua le atoatoaga o le talalelei ma o loo maua i Le Ekalesia a Iesu Keriso o le Au Paia o Aso e Gata Ai.
Sa papatisoina Jakub i le aso 3 o Novema, 1990, ma tumau faamaoni seia oo ina oti i se faalavelave matautia o le savaliga sopo i le luasefulu tausaga mulimuli ane. Sa ou auai i le Ekalesia i le aso 11 Ianuari, 1991, ma le naunautai e auauna atu i se misiona. Sa valaauina Ropati e avea ma uluai peresitene i le lotoifale o le matou paranesi ma aveina atu au i Freiburg, Siamani, ina ia mafai ona ou maua ou faaeega paia o le malumalu. I le taimi o la’u faatalanoaga mulimuli ma ia, sa ou folafola atu ai ou te toe foi i Polani i le maea ai o la’u auaunaga i le Misiona a Ilinoi Sikako e faaaoga ai lo’u tomai faafaifeautalai e faamalosia ai le Ekalesia i lo matou atunuu.
I le lua tausaga mulimuli ane, sa faatalitonuina au e lo’u peresitene o le misiona e tatau ona a’otauina a’u i Amerika i le Iunivesete o Polika Iaga. Ae e lei galo lava ia te au la’u folafolaga ia Ropati.
Ina ua uma ona ou faaipoipo i le 2000, sa ou toe siitia atu i Polani ma lo’u toalua, o lē, i le 1988, sa avea ma se vaega faaopoopo i le vaega lona ono o le O Tausaga Ofoofogia. Sa ma auai i sauniga a le Ekalesia i Krakow, tausia ni atalii se toalua ma fesootai vavalalata ma le ma fanau matutua e toalua. Sa faasilasila talu ai nei e lo ma atalii matua ua ia filifili e auauna atu i se misiona talai.
I le taumafanafana o le 2021, sa ou aveina atu ai lo’u aiga i Perelini, lea na ou faaali atu ai ia i latou le nofoaga sa tu ai le puipui. Ua le toe taofia ai auauna a le Atua mai le faasoaina atu o le savali o le Toefuataiga i tagata o Europa i Sasae. E faaauau pea vavega a le Atua i o tatou aso.