2023
Auauna atu ma le Alofa Mama
Iulai 2023

“Auauna Atu ma le Alofa Mama,” Liahona, Iulai 2023.

O Mataupu Faavae o le Auaunaga

Auauna atu ma le Alofa Mama

E mafai ona tatou faia se eseesega loloto e ala i le faaalia o le alofa i auala masani.

placeholder altText

How Dorcas Helped the Poor [O le Auala na Fesoasoani ai Dorcas i e Matitiva], Faaputuga o Faatufugaga Masani o le Tusi Paia / laiseneina mai le GoodSalt.com

O Se Faataitaiga o le Alofa Mama

O Tapita (e igoa foi ia Toreka) o se soo o Iesu Keriso sa nofo i Iopa. Sa lauiloa o ia o se fafine “ua tele ana galuega lelei ma mea alofa na ia faia” (Galuega 9:36). Sa alofagia o ia ona sa ia faia le tele o mea e alofa atu ai i isi. E pei o le Faaola, sa ia tuuto atu lona olaga e auauna atu. Sa i ai ona tomai ma taleni sa ia faaaogaina e faia ai se eseesega.

O se tasi o na tomai o le faia o ofu tino ma ofu tetele, ae o nisi o na mea sa ave atu i fafine ua oti a latou tane sa manaomia le fesoasoani. Ia i latou na mauaina ana meaalofa, o ia o se tagata na aupito sili ona manaomia. Ina ua sau Peteru e vaai ia te ia ina ua mavae lona maliu, “ua tutu mai foi fafine uma lava ua oti a latou tane, o fetagisi mai, ma faaali mai ofu tino ma ofu tetele sa faia e Toreka, ina o ia te i latou o ia” (Galuega 9:39). Sa matua ootia o ia ma na ia faatuina mai ai o ia mai le oti, lea na mafua ai ona talitonu le toatele i le Faaola (Galuega 9:40–42).

Auauna atu ma le Alofa Mama

O le alofa mama o le alofa lea o Iesu mo i tatou ma le alofa ua Ia faamoemoe mai tatou te maua mo le tasi ma le isi. O le alofa i o tatou tuaoi e pei o i tatou lava (tagai i le Mataio 22:37–39), taulimaina o i latou ma le agaalofa, onosai, ma le alofa mutimutivale lava lea e tasi o le a tatou mananao i ai mo i tatou lava (tagai i le Mataio 7:12). O le auauna atu ia i latou, e pei o Tapita, e faaaoga ai meaalofa ma taleni ua tuuina mai ia i tatou.

E mafai ona tatou faia se eseesega loloto e ala i le faaalia o lo tatou alolofa i auala e masani ai i tatou—e tusa lava pe faigofie mea tatou te faia. Afai e te talenia i le suisui, e mafai ona avea lena ma auala e auauna atu ai, ae atonu e sili atu lou lelei i le faagaoioia o se moa vao nai lo o se laau suisui. Pe atonu foi o lau meaalofa o le iloa lea pe faapefea ona faalogo moni ma i ai iina o se uo moni.

Atiinaa’e o le Alofa Mama

E faapefea ona tatou atiinaa’e le uiga faa-Keriso o le alofa mama?

  • O le alofa mama o se meaalofa e faaee mai e le Tama Faalelagi i luga o i latou uma o e o soo moni o Iesu Keriso. “Tatalo atu i le Tamā ma le malosi atoa o le loto, ina ia faatumulia outou i lenei alofa” (Moronae 7:48).

  • Na aoao mai e Mamona le mea ua ta’ua o le alofa mama: “O le alofa mama e loa ona tali-tiga, ma e agalelei, ma e le losilosivale, ma e le faafefeteina, e le sailia e ia ana lava, e le faaitagofie, e le mafaufau i se mea leaga, ma e le olioli i le amioletonu ae olioli i le upu moni, e onosaia mea uma, e talia mea uma, e faamoemoe i mea uma, e onosai i mea uma” (Moronae 7:45). E le na o ni auala nei e iloa ai pe a faatumulia oe i le alofa; e fesootai foi ia uiga o le a saofaga i se gafatia faateleina e alolofa ai a o tatou atiinaa’e ia uiga.

  • E mulimuli mai le agaalofa i le lagona alofa.1 A o tatou saili ia malamalama i isi, tatou te tuuina atu le avanoa sili e tuputupu a’e ai le alofa mama. Faataitai le faia o fesili i se auala aoga ma alofa, ona faalogo lea ma le onosai ma le malamalama.

  • Faataitai le alofa mama. Tuu atu lou taimi ma isi punaoa, e aofia ai lau faamagaloga, ia i latou o e manaomiaina. Na aoao mai Thomas S. Monson (1927–2018): “E tatau ona fuifuilua faatasi le faamagalo atu ma le alofa. … O le tuuaia o isi e tumau ai le tiga. E na o le faamagalo atu e faamaloloina ai.”2