Feagaiga Fou i le Matalalaga

O Le Aufono a Ierusalema

Saunia e Jared Ludlow

Polofesa o Tusitusiga Paia Anamua, Iunivesite a Polika Iaga

Aoao i mea o loo aoao mai ia i tatou e le aufono o loo faamatalaina i le Galuega 15 i aso nei.

O leGaluega 15 o loo faamatala mai ai se tasi o uluai aufono Kerisiano, le Aufono a Ierusalema, ma aoao mai ai mataupu faavae o loo faatatau pea i le Ekalesia i aso nei.

Sa fono aufono e talanoaina le mataupu o mea e tatau ona fai e Nuuese (e le o ni Iutaia) pe a liua i le faa-Kerisiano. E ui o tagata talitonu muamua o Iutaia o e na taliaina Iesu o le Mesia, o Nuuese na o mai mai se talaaga faalelotu ma faaleaganuu eseese, o lea na avea ai lo latou faaaofia ai i le Ekalesia Kerisiano ua aliae mai ma se faafitauli.

E masani lava, e lei fegalegaleai vavalalata Iutaia ma Nuuese ona o eseesega i talitonuga, aganuu, ma gagana, faapea foi tulafono o meaai (kosher) na mulimuli ai Iutaia. Sa taumanatunatu ia Kerisiano anamua pe tatau ona faaauau pea tu ma aga a Iutaia, talu ai na soifua ae Iesu ma Uluai Aposetolo uma o faia nei mea.

Vaaiga Eseese i Uluai Tagata o le Ekalesia

Sa faia e uluai tagata o le Ekalesia ni tofiga eseese i lenei mataupu. Sa aoao mai e nisi o alii o e sa mananao ia faaolaina ma talia Iesu e manaomia ona peritomeina, e pei ona sa i ai i lalo o le tulafono a Mose (tagai Galuega 15:1).¹

Sa suitulaga Paulo ma Panapa i se isi tofiga. Sa latou aoaoina Nuuese ma lagonaina sa fesoasoani le Agaga Paia e faaliliu i latou. Sa vaai Paulo ma Panapa i lenei mea o se molimau o le galuega sa la faia e moni (tagai Galuega 15:2–4). Latou te le’i manaomia le peritomeina po o le usitaia o tulafono o meaai a Iutaia mo le papatisoga.

O nei manatu tetee na manaomia ai se fono i taitai o le Ekalesia i Ierusalema e foia ai le mataupu.

O Le Faamatalaga a Peteru

O Peteru, le Aposetolo sili, na saunoa i le aufono. Sa ia faamanatu atu ia i latou ona aafiaga lea na ia aoao ai e tatau i Nuuese ona faalogo i le talalelei ma sa molimauina e le Agaga Paia le upumoni ia i latou e pei lava o Iutaia o e sa taliaina Iesu o le Mesia (tagai Galuega 15:7–8; tagai foi Galuega 10).

Sa ia taua e faapea, “e leai se eseesega na faia e le Atua i lo matou va ma i latou ma i latou, ua faamamaina o latou loto i le faatuatua” (Galuega15:9). O aafiaga o Nuuese ma le Agaga Paia o se faamaoniga lea o lo latou liua ia Keriso sa taliaina e le Atua. Ma sa latou oo i lenei mea e aunoa ma le tausia o mea e manaomia o le tulafono a Mose.

Na faaiuina e Peteru i lona faamoemoe e faapea “e faaolaina i tatou e ala i le alofa tunoa o le Alii o Iesu Keriso, e pei lava o i latou” (Galuega15:11).

Fetuunaiga a Iakopo

O Iakopo, le uso o Iesu ma se taitai anamua o le Ekalesia i Ierusalema, sa saunoa foi i le aufono. Sa ia faailoa atu aafiaga o Peteru na taitai atu ai o ia ia iloa o le a faia e le Atua se nuu o le feagaiga mai Nuuese. (Tagai Galuega 15:13--17; tagai foi Amosa 9:11.)

Ona ia fautuaina atu lea o se fofo mo vaega uma e lua. Sa ia fautuaina Nuuese e tatau ona aloese ia le itiiti ifo ma le fa ni mea e faatatau i le tausia o le tulafono a Mose (tagai Galuega 15:20, 29):

• Aano o manu e ofo atu i tupua

• Faitaaga (feusuaiga le mama)

• Aano o manu na titina (e lei faamasaaina le toto o le manu)

• Toto (e faatatau i le aloese mai aano o manu na titina)

O nei tapu o le a iloa ai tagata o Nuuese ua liua mai isi Nuuese talu ai o nei faatinoga o nisi taimi o se vaega o tapuaiga a Nuuese i atua ma atua fafine.

O Se Savali i le Au Paia

Sa malilie uma le aufono i le talosaga a Iakopo, o lea na latou auina atu ai tusi ma sui i Anetioka ma isi aulotu Kerisiano e faailoa atu ia i latou lenei aiaiga faavae (tagai Galuega 15:23–29). Sa latou faailoa mai foi i le tusi le matafaioi a le Agaga Paia i le molimauina o lenei aiaiga faavae sa lelei.

O le taimi nei, o Kerisiano uma, mai Iutaia ma Nuuese, e mafai ona aai faatasi i taumafataga. Sa faamamafa mai foi i le aiaiga faavae e faapea o le faatuatua ma feagaiga ia Iesu Keriso o le ala lea i le faaolataga, ae le o le tulafono a Mose.²

Lesona mai le Aufono a Ierusalema

E le itiiti ifo ma le lima mataupu faavae mai le Aufono i Ierusalema e faatatau i le Ekalesia i aso nei:

1. O le fefaasoaai o manatu eseese i se aufono e mafai ona fesoasoani i tagata a o latou sailia le finagalo o le Alii ma mafai ona taitai atu ai i se maliega e mafai e tagata uma ona mulimuli ai.

2. O le maliega mulimuli po o le faaiuga e tauaveina le pule a ona taitai; o sui auai o le aufono ma tagata lautele o le Ekalesia e mafai ona lagolagoina ma faalagolago i nei faaiuga faalepulega.

3. E mafai e le Ekalesia ona faaaoga aganuu eseese i se tino e tasi, ma e mafai e tagata o le ekalesia ona aoao po o a faiga faaleaganuu e feteenai ma aganuu faaletalalelei ma e manaomia ona lafoaiina.

4. O le a tuuina mai e le Agaga Paia se molimau malosi i le finagalo o le Atua ma o loo mulimuli i ai se tasi.

5. O le taliaina o Iesu Keriso e ala i le papatisoga ma isi feagaiga o le ki lea i le liuaina ma le auai i le Ekalesia.

O le mulimuli i nei mataupu faavae i aufono a le Ekalesia i aso nei o le a taitai atu ai i le faaaloalo mo manatu o isi. E mafai foi ona tatou faaalia le lotomaualalo e ala i le taliaina ma le lagolagoina o faaiuga a aufono.

O le Ekalesia a le Alii e Faatautaia i Aufono

“Na talo e le Atua se fono tele i le muai olaga e faailoa atu i ai Lana fuafuaga mamalu mo lo tatou manuia e faavavau. Ua faatulagaina le ekalesia a le Alii i aufono i tulaga uma, e amata i le Aufono a le Au Peresitene Sili ma le Korama a Aposetolo e Toasefululua ma oo atu ai i aufono a siteki, uarota, korama, ausilali, ma aiga. …

“Pe a oo atu se taitai o le aufono i se faaiuga, e tatau i sui auai o le aufono ona lagolagoina ma le loto atoa.”

President M. Russell Ballard, Sui Peresitene o le Korama a Aposetolo e Toasefululua, “Malosiaga i Aufono,” Ensign, Nov. 1993, 76, 78.

Faamatalaga

1. O leGaluega 15:5 o loo faaaoga ai le faalaniga “vaega a le au Faresaio sa talitonu” ia Keriso e faamatala ai nisi o “Kerisiano Iutaia” o e sa tumau pea i lo latou manao e faatumauina faiga faa-Iutaia o se vaega o le feagaiga FaaKerisiano. E le o le au Faresaio na ta’ua soo i Evagelia. O i latou o ni tagata Kerisiano liliu mai o e sa matuai mananao lava e faatumauina lo latou Iutaia ma atonu o i latou o le vaega a Faresaio a o lei liua i latou ma atonu sa faatumauina ni fesootaiga ma le au Faresaio.

2. Sa faaauau pea ona taialaina e le aufono le Ekalesia anamua. Mo se faataitaiga, na aoao mulimuli ane e Paulo e faapea o le peritomeina ma le mulimuli i le tulafono a Mose sa le manaomia ona talia Iesu Keriso, e ui ina sa faaauau pea ona aoao atu e isi nei mea (tagai Galuega 21:20–21), ma sa ia toe ta’ua ia manaoga autu e fa mo Nuuese ua liua mai le Aufono a Ierusalema (tagai Galuega 21:25).