Ua Na’o Tusiga Faatekinolosi: Autalavou Matutua
O Auala na Suia ai e Faafitauli i La’u Aoga le Ala Ua Ou Vaai Ai i Suiga
O le auala na ou oo ai mai le lagonaina o le faaletonu i le lagonaina o le faamalieina i la’u malaga faaleaoaoga.
O iina sa ou sioa atu ai i se isi tusiga ma ni manatu faaalia ma ni fautuaga se tele. O le tele sa lelei ma aoga, ae sa ou lagonaina pea le faanoanoa. Talu ai o au o se tusitala, o la’u galuega o loo suia pea lava pea. E masani lava ona ou le afaina, ae o le taimi lea na ou le fiafia ai.
Pe na tatau ona suia mea uma i taimi uma?
O au tusiga sa le na o le pau lea o le mea na suia. O a’u fuafuaga mo le faauu i le iunivesite i se taimi faatulagaina sa suia foi. Ina ua uma ona auauna atu i se misiona, o le fesuiai o mataupu autu ma le KOVITI-19 na tuai ai la’u aoga. A o faauu uma a’u uo, sa faatoa afa lau aoga. O lea la, sa ou lagonaina letuuatoatasi. Na suia tele mea mai le ala na ou faamoemoe e oo i ai.
I le taimi lea, sa avea a’u ma se fesootaiga faataitai ma le BYU–Pathway Worldwide.
E ala i le galuega, sa ou talanoa ai i tamaiti aoga i le salafa o le lalolagi o ni matua nofotoatasi, sa toe foi mai i le aoga ina ua mavae tausaga e tele, po o tauiviga tautupe. O nisi na oo i ni suiga e sili atu ona le’i faamoemoeina nai lo a’u, ma sa faamanuiaina i latou.
Ae e faapefea?
Ina ua oo ina ou iloa ni tamaiti aoga patino se toalua, o Darlyn ma Alesana, sa ou tusia ni lesona sa la aoaoina ai a’u.
O Suiga e Le Maalofia
Ina ua ou faia se faatalanoaga i le initoneti ma Darlyn ma sa ia kiina lana meapueata, sa ia tuuina mai ia te a’u le ataata sili ona tele. O le taeao i Sigapoa, ma sa ia alapo ma te feiloai a o lei aveina lana fanau e toatolu i le aoga ma ia lava e faigaluega.
Sa manao lava Darlyn e maua lona faailoga o le matuaofaiva, ae i le 36, sa maua o ia i le tulaga lona fa o le kanesa o le fatafata. O lenei mea na faaletonu ai ana fuafuaga mo nisi aoaoga ma ana fuafuaga mo le olaga.
A o ou faalogologo i lana tala, sa ou manatu afai e i ai se tasi e le fiafia i suiga faigata, o Darlyn. Ae sa ia faailoa mai faamanuiaga ma le alofa mutimutivale sa ia mauaina ma tagata na auauna atu ia te ia. Sa taliaina e Darlyn le suiga o fuafuaga i le alofa tunoa. Nai lo le taulai atu i mea na ia lē mauaina, sa ia taulai atu i aafiaga sa ia mauaina. E pei ona aoao mai Peresitene Russell M. Nelson, “O le olioli o tatou lagonaina e itiiti lava se mea e faatatau i tulaga o tatou olaga ao mea uma o loo faatatau i le taulaiga o o tatou olaga.”1
Mulimuli ane, na faatasi atu Darlyn i le BYU–Pathway Worldwide ona sa manao o ia e faatumauina lona mafaufau ia maloloina. Sa ia fai mai ia te a’u na te le’i inoino i le mauaina o le kanesa—sa ia faafetai na taitai atu ai o ia i le BYU–Pathway ma ia faalolotoina lana sootaga ma Iesu Keriso.
Sa ou tuua lena talanoaga ma le manao e sui la’u vaaiga o le suiga. Ona sa tuu ese e Darlyn le inoino ma le ita e uiga i ona tulaga, o lea sa mafai ai ona ia pulea lona olaga. Nai lo luitau ma suiga e aveesea lona alualu i luma, sa uunaia ai o ia i luma.
E Lē Suia Lava le Tama Faalelagi
Sa nofo Alesana i lana taavale i Amerika Samoa ina ua ma talanoa i le telefoni. Sa ou maofa a o ia ta’u mai ia te a’u le ala na ia lafoaia ai lana sikolasipi lakapi ae auauna atu i se misiona. Ina ua toe foi mai i le fale, sa ia lagonaina le taialaina e fesoasoani i le pisinisi a lona aiga ma faaipoipo i lana manamea i le malumalu. Ona faatoa ia lagonaina lea o le uunaiga e faauma lana aoga, ma o le BYU–Pathway o le vaifofo sili lea mo ia.
Ina ua ta’u mai e Alesana ia te a’u sa ia lesitala ma toe nofo faalua mai le aoga ona o se afa ma se afi o le fale, sa faateia a’u. Sa ia filifili e auauna atu i le Alii mo le lua tausaga a o lei tulitulimatagauina lana aoga ma sa feagai ai ma faigata ogaoga—ae sa ia faaauau pea. Ina ua ou fesili atu ia te ia pe na faapefea ona ia agai pea i luma, sa ia ta’ua le tala ia Nifae i le aumaia o papatusi mai Ierusalema. E ui lava ina sa faia e Nifae le mea na poloai mai ai le Atua, ae safaatolu ona taumafaipea o ia ma ona uso ina ia faamanuiaina. Ae e lei aveesea lava le faatuatua o Nifae, aua sa folafola mai e le Atua e saunia se ala mo Ia (tagai 1 Nifae 3–4).
Na aoao a’u e Alesana e faapea o mea uma i le olaga e mafai ona suia vagana ai lo tatou Tama Faalelagi alofa. E pei ona aoao mai foi Peresitene Nelson: “E le tulemoe lava le Alii, e le moe foi o Ia [tagai Salamo 121:4]. ‘Ua tutusa lava o ia ananafi, i le aso, ma [taeao]’ (Mamona 9:9). O le a Ia le lafoaia Ana feagaiga, Ana folafolaga, po o Lona alofa mo Lona nuu.”2
Ua ou iloa moni lava i le taimi nei e tusa lava po o a suiga o loo ou feagai ai, o Ana poloaiga, faamanuiaga, ma le alofa e le masuia ma e faavavau. Na aoao a’u e Alesana afai ou te tuu atu lo’u ala e agai atu i le Atua ma Iesu Keriso ma faalagolago ia i Laua, o le a mafai ona ou feagai ma le lumanai le mautonu ma le faamoemoe ma le faatuatua.
Mauaina o le Filemu i La’u Lava Malaga
Faafetai i nei uo ma lo’u taimi i le BYU–Pathway, ua ou vaaia le suiga i se malamalama fou! O le toe tepa i tua, pe ana le suia la’u fuafuaga patino mo le a’otauina, semanu ou te le mauaina lava se mataupu autu ou te fiafia i ai pe feiloai i ni tagata ofoofogia i lo’u olaga. Ua ou iloa nei afai ou te faalagolago i le Tama Faalelagi ma taulai atu lou olaga ia Iesu Keriso, o le a mafai ona ou faatoilaloina soo se suiga e oo mai i lou ala.