O Mataupu Faavae Patino o le Talalelei

Faasoaina Atu o le Talalelei a Iesu Keriso

Pe a tatou mafaufau e uiga i faamanuiaga tatou te maua ona o i tatou o tagata O Le Ekalesia a Iesu Keriso o le Au Paia o Aso e Gata Ai, tatou te mananao e faasoa atu le talalelei ia i latou tatou te alolofa i ai. E mafai ona tatou faasoa atu a tatou molimau o le upumoni e ala i a tatou upu ma a tatou faataitaiga. E mafai ona tatou tatalo mo musumusuga ia iloa ai po o ai e faasoa atu i ai ma mea e fai atu ai.

Alofa i Isi

O se vaega taua o le faasoaina atu o le talalelei o le alofa atu lea i isi. Pe a tatou faaalia lo tatou alolofa i isi e ala i faatinoga faaKeriso, ua tatou faasoa atu le talalelei a Iesu Keriso—o nisi taimi e aunoa ma le fai atu o se upu. Ma a iloa e isi tatou te alolofa moni ia i latou, atonu o le a sili atu ona latou naunau e faalogo i o tatou manatu e uiga i le talalelei. (Tagai i le Gary E. Stevenson, “Alofa, Faasoa Atu, Valaaulia,” Liahona, Me 2022, 84–87.)

Faasoa atu i Auala Masani ma Faalenatura

E mafai ona tatou faasoa atu mea tatou te fiafia i ai e uiga i le talalelei. A tatou faia lenei mea o se vaega o o tatou olaga i aso uma, o le a le faigata pe le toafimalie. Mo se faataitaiga, e mafai ona tatou talanoa ma o tatou aiga ma uo e uiga i mea tatou te faia i le Aso Sa. Pe e mafai foi ona tatou tau atu ia i latou e uiga i le fiafia tatou te lagonaina pe a tatou auauna atu i isi. (Tagai i le Dieter F. Uchtdorf, “Galuega Faafaifeautalai: Faasoaina atu o Mea o Loo i totonu o Lou Loto,” Liahona, Me 2019, 15–18.)

Valaaulia Isi e Auai Faatasi ma i Tatou

E mafai ona tatou valaaulia isi e aoao atili e uiga i le talalelei. Mo se faataitaiga, e mafai ona tatou valaaulia i latou e o mai i se sauniga po o se gaoioiga a le Ekalesia, faitau le Tusi a Mamona, matamata i se vitio a le Ekalesia, pe asiasi faatasi ma faifeautalai. O nei aafiaga e mafai ona fesoasoani ia i latou e lagona ai le Agaga ma mananao ai e aoao atili.

Fesili atu e uiga i lo Latou Aafiaga

A uma ona o mai uo ma tagata o le aiga i le lotu pe fai se lesona ma faifeautalai, e mafai ona tatou fesili atu ia i latou e uiga i o latou aafiaga. O nisi o aoaoga o le talalelei atonu e fou ia i latou, e mafai la ona tatou taliina a latou fesili o i ai. E mafai ona tatou faaali atu lo tatou alolofa ma le lagolago mo a latou taumafaiga e o mai ia Keriso.

Faaopoopo i o Latou Talitonuga

Tatou te faatauaina ma faaaloalogia talitonuga o isi, ma tatou te taumafai e faaopoopo atu i le faatuatua ua uma ona latou maua. Mo se faataitaiga, o se uo na maua le mafanafana i tusitusiga paia e mafai foi ona maua le mafanafana i aoaoga tatou te faasoa atu mai le Tusi a Mamona.

Fesoasoani i Tagata Fou o le Ekalesia

Pe a auai tagata i le Ekalesia, e mafai ona tatou fesoasoani e faamalosia lo latou faatuatua. E mafai ona avea i tatou ma a latou uo, tali a latou fesili, ma lagolagoina i latou pe a latou mauaina valaauga. E mafai ona tatou uunaia i latou e faaauau pea ona mulimuli ia Iesu Keriso ma aoao e uiga i Lana talalelei.

Auauna Atu i se Misiona Faafaifeautalai

E faaopoopo atu i le faasoaina atu o le talalelei i o tatou olaga i aso uma, e mafai ona valaauina tagata o le Ekalesia e auauna atu o ni faifeautalai faamisiona. Afai ua saunia i latou, e mafai ona auauna atu alii talavou e amata atu i le 18 tausaga. E mafai foi ona auauna atu tamaitai talavou ma isi tagata matutua atu. E mafai ona e maua nisi faamatalaga i le ChurchofJesusChrist.org/callings/missionary.

Mai i Tusitusiga Paia

Na poloaiina e Iesu Keriso Ona soo e faasoa atu le talalelei i tagata uma (tagai i le Mareko 16:15).

O i latou e valaauina e auauna atu e tatau ona faia ma o latou “loto atoa, mafaufau atoa, manatu atoa, ma le malosi atoa” (tagai i le Mataupu Faavae ma Feagaiga 4).

O le a tatou maua le olioli tele pe a tatou fesoasoani e aumai isi i le talalelei (tagai i le Mataupu Faavae ma Feagaiga 18:15–16).

Punaoa i le Initoneti

“E mafai faapefea ona ou faasoa atu le Tusi a Mamona i se uo?” E faapefea ona ou faafesootaia la’u uo ma faifeautalai?” O nei fesili ma isi o loo taliina i le ChurchofJesusChrist.org/share.

O le Potu Tusi o le Talalelei (i le ChurchofJesusChrist.org po o le faaaogaina o le polokalama feaveai) e i ai foi sana faaputuga o punaoa, e aofia ai o tatou talitonuga faavae. Filifili le “Faasoaina Atu o le Talalelei” e aoao atili ai e uiga i le o le ā ma le auala e faasoa atu ai.

Ina ia aoao atili e uiga i le faamalolosia o tagata fou, tagai i le Potutusi o le Talalelei i lalo o “Tusitaulima ma Valaauga” ona sosoo ai lea ma “Valaauga o le Uarota po o le Paranesi.”

Sailiili Atili

Afai e i ai ni au fesili e uiga i le faasoaina atu o le talalelei, e mafai ona e talanoa i ou uso po o tuafafine o auaunaga, ou taitai o le uarota po o le paranesi, po o faifeautalai.