“O La’u Misiona Faaauau,” Liahona, Iulai 2023.
O Leo o le Au Paia o Aso e Gata Ai
O La’u Misiona Faaauau
O le tusi mulimuli a lo’u tama na o’o atu i lo’u lumanai, ma tuuina mai ai ia te a’u upu na sili ona taua ia te a’u.
Sa ou fiafia i la’u misiona talai i atumauga matagofie o Cajamarca, Peru, ina ua faafuasei ona mafatia lo’u tama i se pepē o le tino. E lei leva mulimuli ane, ae maliu loa o ia.
Ina ua ma feiloai ma lo’u peresitene o le misiona, sa ou tagi a o ou manatuaina sa aoaoina a’u e lo’u tama i le uiga o le avea ma se faifeautalai ma se alii o le amiosa’o. Sa ia tusi mai ia te a’u i vaiaso taitasi, faasoa mai lana molimau, aoao mai ia te au ni malamalamaaga mamana o le talalelei, ma uunaia au e faia le mea sili ou te mafaia.
Ina ua uma le matou fonotaga, sa tuuina mai e le peresitene o le misiona ia te au se tusi—o le tusi mulimuli lea mai lo’u tama. Na oo lana tusi i lo’u lumanai, ma tuuina mai ia te a’u upu na sili ona taua ia te a’u:
“O loo i ai se isi au [misiona] o le a oo mai i ni nai masina—o se misiona e sili ona faigata, lea o le a faitaulia ai oe e tuuto atu lou olaga i mataupu faavae ua e aoaoina atu, i le faia o mea, e oo mai i lenei taimi, ua na o lou talaia atu lava. E mafai ona avea ma misiona e sili ona faamanuiaina. E pei oe o le mea faafefete i totonu o le papa falaoa. …
“Matou te alolofa ma tatalo foi mo oe i aso taitasi. Galue malosi ma faia mea sa’o.”
A o ou faitauina ana upu, sa ou tagi—mo le faanoanoa, i le iloaina o ana upu mulimuli ia ia te au i lenei olaga, ma mo le olioli, i le iloaina o lo latou mana ma le faamoemoega mo au. Sa ou iloa o le isi a’u misiona—i aso uma o totoe o lo’u olaga—o se aafiaga tele mo mea uma lava ia te a’u. O le a avea ma se taimi o tofotofoga moni, ma o le a manaomia ai mea uma sa ou aoaoina ma oo i ai o se faifeautalai.
Ou te iloa o loo i ai se fuafuaga o se faamoemoega loloto a le Tama Faalelagi mo i tatou taitoatasi. E mafai ona Ia siitia o tatou taimi i luga o le fogaeleele ma tuuina mai ia i tatou mata e vaai ai ma iloa Lana upumoni. Ua ou vaai i lenei mea a o ou tuuto atu lo’u ola ia te Ia ma maua aafiaga o Ana faamanuiaga. Ma ua ou vaai i lenei mea a o ma galulue faatasi ma lou toalua lalelei e fausia se aiga e tumu i faamoemoega, fanau, ma le talalelei.
Ua aumaia e le Faaola ia i ma’ua le malosi a o ma toatutuli i ma tulivae, i tusitusiga paia, i le malumalu, ma i isi o loo auauna atu ai. Ua ou vaai i le aao o le Alii o faaali mai i taimi ofoofogia i lo’u olaga a o ou faasoa atu le talalelei i aiga ma uo.
O Lana galuega, o le “ia aumaia le tino ola pea ma le ola faavavau o le tagata” (Mose 1:39). O lena misiona e faaauau moni lava.