“E Te Talitonu i le Atua?,” Liahona, Iulai 2023.
O Leo o le Au Paia o Aso e Gata Ai
E Te Talitonu i le Atua?
A o faasoa mai e la’u uo ona atugaluga, sa faafuasei ona oo mai ia te a’u se uunaiga o le malamalama.
Ata na tusia e Katy Dockrill
I lo’u tuputupuae ou te lei masalosalo lava i le moni aiai o le talalelei. A o o’u taunuu i o’u tausaga talavou, peitai sa ou fesiligia pe moni lava sa i ai sa’u molimau pe na o le taliaina lava o mea na talitonu i ai o’u matua ma uo. Sa ou tatalo ina ia ou iloa e moni le talalelei.
E ui lava i o’u tauiviga, sa tau mai e se tamaitai talavou sa ou feiloai i ai i le kolisi o lo’u nuu, sa ia lagonaina sa ou malamalama i lo’u faamoemoega ma le taitaiga i le olaga.
“E te talitonu i le Atua?” na ia fesili mai ai ia te au.
Sa ou fai atu ia te ia, ou te talitonu iai ma o la’u ekalesia e aoaoina la matou sootaga ma le Atua ma le faamoemoega o le olaga. Sa ou ta’u atu foi ia te ia e uiga i le Perofeta o Iosefa Samita ma le Toefuataiga. Sa ia faalogo ma le faaeteete.
O le Aso Sa na sosoo ai i le lotu, sa ou aumaia ai ni tamaitusi e uiga ia Iosefa Samita ma le ata o le faaolataga mo la’u uo. Ina ua uma ona ia faitauina ma amata ona faitau le Tusi a Mamona, sa ou avea o ia i le lotu.
Mulimuli ane sa ia ta’u mai ia te a’u sa matua latalata lava o ia i lona tuagane matua. Sa avea o ia ma se pailate e faia gaoioiga faigata e faatinoina faaaliga i le ea i le lotoifale. O le mea e faanoanoa ai, o le taumafanafana ae ma te lei feiloai, sa maliu ai o ia a o lele i se faaaliga. Sa matua lofituina o ia i lona maliu ma sa popole e uiga ia te ia ona sa ia fai mai o lona tuagane o se tagata e le mautonu. Sa tatalo o ia ia iloa po o le a le tulaga o lona tuagane o iai ma lona tulaga i luma o le Atua.
A o ia faasoa mai ona atugaluga, sa faafuasei ona oo mai ia te au se uunaiga o le malamalama. O se lagona o le upumoni ma le malamalama mama. Sa ou malamalama e lei tupu faafuasei le ma feiloaiga. Ae, sa faafofoga ma tali mai le Atua i le tatalo faamaoni a lenei tamaitai talavou loto nutimomoia.
Sa faalotomaualaloina au i le iloaina sa silafia au e le Tama Faalelagi ma o le a manatu mai ia te au ua ou agavaa e avea ma se meafaigaluega i Ona aao i le taliina o lana tatalo. Sa ou malamalama i Lona atamai tele i le faaaogaina o lenei aafiaga e tali ai foi la’u tatalo ia iloa e moni le talalelei.
Ina ua uma ona sauniuni, sa ou teuina a’u ato mo le lua tausaga sili ona lelei o lo’u olaga. O le taimi lea, sa faia ai e faifeautalai lesona a la’u uo faatasi ma lona uso. O i laua uma na auai i le Ekalesia ma mulimuli ane auauna atu i ni misiona. Ina ua maea la’u misiona, sa talosaga mai la’u uo ia te a’u ou te faatinoa sauniga o le malumalu mo lona tuagane.
Ou te iloa e faafofoga ma tali mai le Atua i tatalo faamaoni, e ui o nisi taimi i se tulaga po o se taimi tatou te le o faamoemoeina.