“M̧ōņōņō n̄an ‘Ron̄jake E,’” Liaona, Jept. 2023.
Kam̧m̧oolol n̄an “Ron̄jake E”
Ewōr jidik pen ilo aō ron̄jake ilo m̧ōn jar eo, bōtaab bwebwenato in jān Kallim̧ur Ekāāl e jipan̄ loe bwe jekjek eo aō eoktak.
Ekar wōr joreen in ron̄jake ippa ilo aolepen mour eo aō im maron̄ melele wōt emaron̄ 20 bōjeen in ta ko rej kwaļo̧ki ilo maan eo ilio eitōn aolep kweilo̧k an Kabun̄. Jet ien, jaron̄ron̄ eo aō ekōm̧m̧an aō ajimakeke im jepeļo̧k, āinwōt n̄e jarlepju in jar eo rej ettōn̄ kōn kōjak eo an rikōnono eo bōtaab ijjab kōnke ijjab ron̄. Im ejjab kar n̄a wōt eo. Ro rerūtto ilo ward eo rej jiron̄ eō bwe er ebar wōr aer aban̄ ilo ron̄jake.
Jet ien, ālkin aō en̄taan n̄an melele juon eo emera an kōnono ilo kweilo̧k in kwojkwoj ak n̄e rikake in Jabōt Jikuuļ ej ba bwe ejeļo̧k aikuj n̄an kojerbal mic eo kōnke aolep remaron̄ ron̄, ij kōļm̧enļo̧kjen etke ijaam etal in jar ke ijjab ron̄. Iien ko aō ren kar em̧m̧anļo̧k joļo̧ki ilo m̧weo riiti Itok, Ļoor Eō katak ko ak ekkatak jeje ko rekwojarjar ke?
Ak, ikōņaan pokake im wōnm̧aanļo̧k n̄an pād ilo jar ippān baam̧le eo aō im kōkāāl bujen in peptaij eo aō n̄an keememej Rilo̧mo̧o̧r ilo aō bōk m̧ōttan kwojkwoj eo. Aolep iien ej juon kōjeram̧m̧an n̄an en̄jake Jetōb eo, im aolep iien ej en̄jake kōketak jān men ko ij maron̄ ron̄jaki.
Juon Jabōt high ko̧o̧ņjel eo ej kōnono ilo iien kwojkwoj ekar wōr juon an anikien eo eļap, ālikkar ma pidodo ad ron̄. Ekar kōmelele kōn bwebwenato ilo Kallim̧ur Ekāāl in kōrā eo ekar toorļo̧k iumin 12 iiō im kar wōr an tōmak bwe emaron̄ kar mour n̄e enkar un̄ur kobe eo an Jisōs ke ej etetal ļo̧k (lale Luk 8:43–48).
Rikōnono ekar kio letok juon kōļmenļo̧kjen eo em̧wilaļ me ekar kalel eō, ekar kōmelele bwe kōnke kōn jekjek eo an, liin maron̄ kar likut e ettoon im nej kar jab kōtļo̧k an pād ilo mōn jar. Iumin 12 years!
Ta eo ekar waļo̧k tokālik ekar bōk kūtwo. Jekdoon nan̄inmij, liin emaron̄ kar jab ājmour ke ejjab kar maron̄ etal n̄an jar, emaron̄ jet ien. Bōtaab kōnke kōn ikitōltōl ko eitōn elōn̄ iien, liin kar jab kōtļo̧k an pād. Ta juon menin melijon̄ eaitōk n̄an juon eo e tōmak.
Ke ij lin̄ūri metak bōro eo me liin emaron̄ kar en̄jake jān an mo̧ an kabun̄jar n̄an Anij ippān ro jet rej tōmak kōnke kōn nan̄inmij eo an—juon men me ejeļo̧k an maron̄ ie—Jetōb ekar kōpeļļo̧k meja n̄an ekōjkan an jekjek eo an ainjuon eo aō make. Kar letok n̄an eō melele bwe jekdoon n̄e imaron̄ jab bōk koņaeō ilo dipio, ekar wōr ippa jim̧we eo n̄an pād ilo jar im ron̄jaki ta ko imaron̄. Liin ekar ejeļo̧k an kālet jab in. Ikar en̄jake jook kōn iien ko ikar ļo̧m̧ņak n̄an pād wōt m̧weo̧mō.
M̧ōkaj in wōt, Anij ekar kōnono ilo buruō, jiron̄ eō bwe E kar jab kōņan bwe in en̄jake bōd. Ekar kōņaan bwe in en̄jake kam̧m̧oolol—kam̧m̧oolol kōn jim̧we in pād ilo jar im kōkajoorļo̧k jān iaio ippān rikaļo̧o̧r an Kraist retōmak. Mekarta Ijjab maron̄ ron̄ aolep men, Imaron̄ m̧eļeļe jet men—im kajjojo iaaer kar kōjeram̧m̧an mour eo aō. Ewōr jet iien ko rem̧ake bwe Jetōb ekar jipan̄ eō m̧eļeļe men ko men ijjab maron̄ kar ron̄.
Ikar en̄jake kam̧m̧oolol kōn anemkwoj eo n̄an kabun̄jar Anij im m̧ōņōņō ilo kōjeram̧man ko rej itok jāan etal n̄an m̧weo Im̧ōn. Jetōb eo ekar kam̧ooln̄an n̄a bwe ekar etoļo̧k, em̧m̧an n̄an n̄a bwe in pād ilo kweilo̧k ko an Kabun̄, bōk m̧ōttan kwojkwoj eo, im ekkatak ta ko imaron̄ jān ke ikar jab pād.
Raan eo m̧wiliū eaar oktak. Ijelo̧kin en̄jake liejļōļ kōn likjab ko aō, aeņōm̧m̧an ekar kobrak buruō, im ikar kālet n̄an mije kōjeram̧m̧an ko an etal n̄an jar. Ikar kālet n̄an kōm̧m̧an juon kijejeto em̧ool n̄an kam̧m̧oolol kōn ta ko ij maron̄ ron̄ ijelo̧kin aō ebbwer jān ta ko ijjab maron̄.
Elder Dieter F. Uchtdorf jān Doulul eo an Jon̄oulruo Rijilōk ro ekar ba: “Ilo ad kam̧m̧oolol ilo iien eppen ejjab meļeļein bwe jej m̧ōņōņō ilo jekjek ko ad. Ej meļeļein bwe jān mejen tōmak jej lo etoļo̧k wōt jān kaban̄ban̄ ko ad raan kein.”1 Kōrā eo ekar un̄ur kobe eo an Jisōs ekar juon kakeememj em̧m̧an n̄an aō bōk jon̄an tōmak ilo Irooj n̄an lo etoļo̧k jān likjab ko aō im eļap tōmak ilo Anij n̄an jeļā E naaj kōjeram̧m̧an eō n̄an jutak lōn̄ļo̧k jān likjab in kanniōk ko aō.
Mour ej itok kōn aolep kain kaban̄ban̄ ko me rej bōk m̧ōttan jetōb ko ad, en̄jake, ak kanniōk, bōtaab jekdoon iien kein reppen, kar kōketak kōj n̄an kam̧m̧oolol kōn kōjeram̧m̧an ko jej m̧ōņōņō kaki. Irooj ekar ba:
“Ro jera, jab mijak, būruōmi ren ineem̧m̧an; aaet, m̧ōņōņō iien otemjej, im ilo men otemjej leļo̧k kam̧m̧oolol. …
“… Im aolep men ko kom̧ ar en̄taan kaki renaaj jerbal ippān doon n̄an em̧m̧an eo ami, im n̄an aiboojoj eo an Eta” (Katak im Bujen Ko 98:1, 3).
Rijeje eo ej jokwe ilo Utah, USA.